AZV update tocante Covid19

Date: 18-03-2020

Esaki ta un update tocante e situacion di Corona virus na Aruba y e consecuencia pa e servicio di AZV pa su aseguradonan.

 

Servicio na AZV

Pa evita cu e virus sigui plama e gran mayoria di personal di AZV ta trahando for di cas. AZV ta duna servicio via telefon y email. Si tin cualkier pregunta por fabor yama na 527 9900 / 527 9991 / 527 9972 / 527 9996 / 7416406 / 7416454 / 7416438 of manda un email pa klantenservice@uoazv.aw

 

 

Pashentnan na Colombia

For di siman pasa caba, AZV ta haci esfuerso pa trece bek e pashentnan cu a bay exterior pa tratamento medico y ta cla  pa regresa Aruba. Den weekend un cantidad di pashent y acompanante a bin bek. Door cu Avianca a stop di bula pa Aruba e situacion a bira mas complica, pero AZV ta sigui haci tur posibel pa trece e personanan cu no tin nodo mas di haya tratamento medico bek na Aruba. AZV tin contact cu e personanan ey y e departamento internacional di e clinicanan.

Pashentnan cu ta bezig cu un tratamento por keda na Colombia y nan tratamento ta sigui normal.

Pashentnan y of acompanante social cu kier informacion por dirigi nan mes directamente na e departamento Internacional di e clinica na 1e instante of por comunica cu AZV tambe na email mu@uoazv.aw

 

Asegurado cu mester di tratamento den exterior

Door cu e frontera cu Colombia a cera no ta posibel pa manda pashent nobo Colombia sin mas. AZV ta bezig hunto cu Gobierno di Aruba pa bin na un palabracion cu e Gobierno di Colombia pa haya acuerdo pa manda nos aseguradonan cu tin mester di cuido medico urgente y cu no tin Corona virus por drenta Colombia.

Personanan cu mester di un tipo di tratamento den exterior cu no ta urgente (levensbedreigend) lo tin cu warda por lo pronto.

Banda di e esfuerso pa manda pashent Colombia AZV ta bezig cu un plan di back-up cu University of Miami. Den caso cu lo ta necesario, AZV lo por manda pashent Merca pa tratamento.

 

Bay dokter di cas

Si bo mester di cuido di dokter di cas, por fabor tuma contact cu'ne via telefon y sigui e recomendacionnan cu bo ta haya di e oficina di dokter di cas. No  bay personalmente na dokter si e no ta absolutamente necesario pa asina baha e chens di bin den contacto cu un persona cu tin e virus.

Dokter ta yuda pashentnan cu ta urgente y si tin algo cu por warda lo pidi pa warda of lo duna otro solucion.

Pa tur dunadornan di cuido, incluso specialistanan medico, ta conta basicamente mesun aviso, dus yama prome y sigui instuccionnan di dokter.

 

Tips

Keda pendiente pa e updatenan oficial di Gobierno y sigui e recomendacionnan di DVG, bo dokter y profesionalnan den salud.

Keda cas, cuida bo famia y amigonan cu ta den e grupo di riesgo y laba bo man frecuentemente. 

Por fabor tene comprension pa otro den e momentonan fastioso cu nos ta pasando aden.

 

Gradicimento

Last but not least AZV kier gradici TUR dunador di cuido cu ta yudando den e situacion aki.