Pakico mi mester acudi cerca e dokter di cas prome?
AZV ta stimula e prome liña di cuido. E dokter di cas ta un profesional medico cu a siña pa duna tratamento y cuido medico riba un tereno masha amplio mes incluyendo e guia pa personanan cu malesa cronico. Banda di esey, e dokter di cas ta un persona di confianza cu kende e pashent por consulta tur su sintomanan incluyendo su bienestar y of malesanan den famia. Esaki ta nifica cu tin hopi malesa cu e dokter di cas mes por trata.
Den ki caso mi dokter di cas lo mandami pa un specialista?
Ora e dokter di cas haya cu ta necesario y cu e como bo dokter di cas no por yuda bo of no por yuda bo mas paso ta rekeri di cuido specialisa. Sin embargo, despues di e diagnostico of tratamento di e specialista, semper e pashent por bay bek na man di su dokter di cas pa sigui haya e cuido via su dokter di cas.
Pakico ora mi yama pa haci afspraak na mi dokter di cas, e asistente ta haci mi pregunta tocante mi salud?
Awendia e mayoria di e dokternan di cas ta haci uzo di Traige. Traige ta e evaluacion di pashentnan den diferente categoria, na unda nan ta wordo clasifica segun e gravedad di e sintomanan, lesionnan y malesa. E (traige) ta wordo aplica na Spoed Eisende Hulp (SEH) di hospital y na e dokter di cas na warda pa por determina e urgencia di pashentnan cu ta yega. E meta di Traige ta pa establece prioridad y dicidi cua pashentnan mester haya tratamento medico prome y cua pashentnan por warda un tempo cortico of largo riba ayudo. Den oficina di e dokternan di cas ta poniendo cada biaha mas atencion na Traige hustamente pa contesta y guia den bon direccion e cantidad grandi di e pashentnan y pa percura cu e cuido wordo duna na e bon momento. Pa e motibo ey mes, e assistente di e dokter di cas lo haci abo como pashent pregunta pa asina yuda bo mas miho.
Pero ami no kier conta mi cosnan priva na e asistente di e dokter di cas.
No mester tin miedo pa conta e asistente di dokter loke ta pasabo. Cada asistente di dokter ta traha bou secresia medico igual cu e dokter di cas y tur otro dunado di servicio den e cadena di cuido medico na Aruba.
Mi ta pashent diabetico y awor ta wordo atendi door di un Praktijk Ondersteuner. Ken e praktijkondersteuner ta?
E praktijkondersteuner ta un persona studia riba e nivel HBO y cu amplio experiencia den e ramo di cuido di pashent. E rol di e praktijkondersteuner ta pa asisti e dokter di cas den e cuido y guia di pashentnan diabetico of pashentnan cu malesanan cardiovascular. E praktijkondersteuner ta e persona cu ta duna e pashent informacion, guia y motivacion pa e pashent por keda cumpli cu su controlnan regular y pa e pashent cumpli cu e tumamento di su remedinan segun prescripcion di e dokter di cas. E praktijkondersteuner ta traha independiente, siguiendo e plan di tratamento di e dokter di cas y bou di e responsabilidad di e dokter di cas. Por wak ambos como un ekipo trahando hunto na bienestar di e pashent.
Mi a haya un carta di referencia pa specialista. Cuanto tempo e carta aki ta valido?
3 luna
Mi ta bou tratamento di un specialista pero e asistente a caba di yama mi cu mi mester busca un carta di referencia nobo. Esaki mag y kico mi mester haci?
E specialista of e assistente di e specialista por pidi pa un carta di referencia nobo -e asina yama vervolgverwijsbrief – na momento cu bo persona ta rekeri di un continuacion di e tratamento specialistico y ora e validez di bo (prome) carta di referencia ya a caduca. Banda di esey, un continuacion di e tratamento cerca e specialista ta depende masha hopi mes tambe di e reportahe (comunicacion) entre e specialista y bo dokter di cas y dus e informacion cu bo dokter di cas a ricibi. Pues, por bay busca un carta di referencia nobo pero e dokter di cas lo mester na bon na altura si di tur loke e specialista ya a haci pa bo persona.
Mi a haya un carta di referencia di mi dokter di cas pa 1 (un) consulta cerca e specialista. Kico esaki ta nifica?
Un carta di referencia pa 1 consulta cerca un specialista ta nifica cu e specialista ta bay haci bo pregunta tocante di bo salud y e ta bay samina bo. Despues di e consulta aki e specialista lo duna bo un reportahe (terugrapportage) pa bo hiba pa bo dokter di cas of e specialista lo tuma contacto cu bo dokter di cas. E ora ey ta wordo dicidi kico e tratamento lo bira. E por sosode cu ta dicidi pa bo bay bo dokter di cas bek pa haya tratamento via bo dokter di cas por ehempel paso e specialista recomenda cierto medicamentonan. Pero por sosode tambe cu bo ta haya un carta di referencia awor pa bay e tratamento medico cerca e specialista mes. Pues e decision tocante kico ta bay sosode ta wordo tuma hunto; e specialista y e dokter di cas cu a evalua bo caso.
Mi ta bou tratamento di un specialista pero mi kier un segundo opinion, esaki ta wordo cubri door di AZV?
Un segundo opinion na Aruba ta wordo cubri door di AZV. Pa cu esaki bo mester acudi cerca bo dokter di cas pa consulta bo peticion pa un segundo opinion. E dokter di cas lo skirbi un carta di referencia (verwijsbrief) pa bo.
Pakico ta importante pa mi ta inscribi na un botica so?
AZV ta kere den un bon administracion di dunamento di remedi. E inscripcion cerca un botica tin benificio manera:
- Un miho control riba e combinacion di remedi cu ta wordo receta door di bo dokter di cas y door di otro dunado di cuido pa asina evita cualkier riesgo pa bo como pashent,
- Un solo luga unda abo como pashent por haci bo preguntanan tocante e uzo di bo remedinan.
Pakico ora dokter receta antibiotica e ta importante pa mi caba cu e tratamento si ya mi ta sinti mi bon?
Antibiotica ta remedi contra infeccion bacterial. Dokter lo receta antibiotica solamente ora ta necesario. E ta importante pa caba e tratamento paso aunke bo ta sinti miho, bo por tin bacteria ainda den bo curpa cu por haci bo malo atrobe.
Mi tin un malesa cronico y dokter a prescribi remedi pa mi. Pa cuanto tempo mi por haya remedi?
Pa malesanan cronico dokter por prescribi pa bo haya remedi pa maximo 3 luna. Esey ta nifica cu cada 3 luna lo bo mester busca un receta nobo cerca bo dokter pa hiba esaki botica.
Pakico dokter ta keda bisa mi cu ta importante pa mi keda cumpli cu e tumamento di e remedi?
Ora bo tin un malesa cronico, esey ta nifica cu nunca mas e malesa ta bay. Por ehempel ora bo tin presion halto of colesterol halto, e ta sumamente importante pa tuma bo remedinan segun e prescripcion di bo dokter pa motibo cu esaki lo yuda bo pa haya un miho control di bo malesa. Tambe door di tuma bo remedi segun e instruccion di dokter lo yuda bo pa evita di haya otro complicacion.
