Cera conoci cu director interino di AZV Edwin Jacobs
Door di Solange Tchong
E no ta un cara desconoci! Trahando hopi aña na SVb señor Edwin Jacobs conoce e sistema di seguridad social na Aruba bon bon. Awor como director interino di AZV e tin sigur un reto extra pa cumpli cu ne e siguiente lunanan.
SVb y AZV
No solamente el lo percura pa e trabounan na SVb continua pero tambe na AZV. Su prome simannan ta concentra riba e tres tareanan primordial cu el a ricibi, esta di trece trankilidad bou di e trahadonan, trankilidad pa e dunadonan di cuido y tambe continuidad di e proyectonan. Pa haya un miho bista di kico ta e ‘come y bebe’ di AZV, señor Edwin Jacobs a dicidi cu lo e tene combersacionnan orientativo y consultativo cu e team di AZV. Na mes momento lo e pone hopi atencion tambe na reuni cu tur e stakeholdersnan.
Prome y despues di corona
Segun señor Edwin Jacobs ta conta, AZV y Aruba no ta den un situacion facil. Prome cu e pandemia di coronavirus ya Aruba tabata para dilanti retonan grandi. Ya prome cu coronavirus a yega Aruba tabata tin presion riba e fondonan di seguro social, manera e pensioen di biehes. Pero tambe AZV. Pa hopi aña tabata tin ideanan pa adapta AZV sea den e cobertura of sea pa medio di e introduccion di por ehempel un aporte propio. E situacion di coronavirus a simplemente pone mundo y sigur Aruba den ‘overdrive’.
Futuro cercano
Segun señor Edwin Jacobs lo mester bay haci escogencianan importante pa nos pais. Tur partido envolvi lo mester colabora pa logra pone Aruba bek riba pia. Si kier keda cu e sistema di seguro social y AZV, e ta nifica cu lo mester haci cierto sacrificionan. Algo sigur cu ningun hende no a spera pero ta e unico forma pa recupera Aruba y su sistema di seguro social. Señor Edwin Jacobs ta convenci cu hunto lo logra. Su mensahe primordial ta pa tur hende purba keda positivo y calmo dentro di e situacion.
