Obesidad (sobrepeso extremo cu por causa morto) of sobrepeso ta nifica cu bo tin demasiado peso y vet na bo curpa. Generalmente e falta di movecion y nutricion saludabel ta resulta den sobrepeso. Ora bo ta come mas di loke realmente bo curpa tin mester automaticamente e curpa ta bay procesa e resto di nutrientenan den vet. Aunke e vet originalmente ta necesario pa traha e reservanan (voedselreserve) den nos curpa, toch ora tin obesidad of sobrepeso e ta nifica cu tin dimas vet den nos curpa. Aki nos ta exclui un rato e personanan cu tin obesidad of sobrepeso pa motibo di un problema medico, por ehempel un malesa di e schildklier, depression of sobrepeso heriditario.
E concecuencianan di obesidad of sobrepeso por ta varios. Di sinti cu bo ta falta rosea te cu por ehempel dolor den lomba of pia. Of bo lo por haya complicacionnan mas serio. E sobrepeso ta trece riesgo pa haya presion halto, malesa di suco (diabetes), piedra na riñon, malesa di curason of cancer.
Sistema pa midi
Obesidad of sobrepeso ta algo cu bo mes ta wak y hopi biaha sinti. E ta duna molester. Pero si bo kier haya sa cuanto sobrepeso bo tin, mester midi e sobrepeso. Nos ta ilustra kinan dos di e formanan mas uza door di expertonan medico pa haya sa si bo tin sobrepeso. Of pa haya sa si bo tin sobrepeso extremo, esta obesidad.
- E sistema di midi e BMI cual ta nifica Body Mass Index. E Body Mass Index ta un cifra cu ta indica si bo peso ta cuadra (pas) cu bo largura. E ta bo peso den kilo dividi den e kwadraat di bo largura. Awendia tin diferente website y app cu e meter di BMI unda bo ta yena bo peso y largura pa asina calcula bo BMI. Un BMI mas halto cu 25 ta nifica cu bo tin sobrepeso.
- E circunferencia di bo bariga (buikomvang) tambe ta un bon metodo pa midi e cantidad di vet cu bo curpa tin. Pa esaki bo tin mester di un cinta di midi pa pone rond di bo bariga. Cerca hende muhe ta papia di un circunferencia grandi ora esaki ta mas cu 80 cm. Cerca hende homber esaki mester ta mas cu 94 cm.
Kico bo mes por haci?
E prome stap cu bo por tuma ta pa haci un cambio den bo estilo di bida. Esey ta mas facil pa bisa cu pa haci. Pero un cambio lo mester bin pa por yega na un peso saludabel. Generalmente por cuminsa cu cambionan chikito y gradualmente adapta te ora a haci e cambio completo. Por ehempel; si semper bo ta bebe koffie cu lechi y dos cuchara di suco, bo ta cuminsa na bebe koffie cu menos lechi y 1 cuchara di suco. Haci esaki pa un par di siman te ora bo curpa custuma. Despues bo ta bolbe cambia kitando e suco por completo. Incorpora movecion den bo bida diario. Si nunca bo a haci deporte, awor ta e momento. Busca un deporte cu abo ta gusta. Esaki lo haciʾe mucho mas facil pa bo adapta na un schedule di movecion.
