Malesa di riñon ta wordo considera como un “silentkiller” y e tin un efecto grandi riba bo calidad di bida. Pero tin manera facil pa reduci e riesgo pa desaroya malesa di riñon.
1. Keda fit y activo
Ora bo ta fit bo ta reduci bo presion y asina reduci e riesgo di haya malesa di riñon.
2. Controla bo nivel di sucu regularmente
Mas o menos mita di e personanan cu tin diabetes ta haya daño na nan riñon. P’esey ta importante pa tur hende cu tin diabetes check nan funcion di riñon regularmente (1 biaha pa aña). Por preveni daño na riñon pa motibo di diabetes si detect’e trempan. Ta importante pa controla bo sucu den sanger (3-4 biaha pa aña).
3. Controla bo presion
Hopi hende sa cu door di presion halto bo por haya stroke of ataca di curason. Poco hende sa cu presion halto ta e causante principal di daño na riñon. E nivel normal di presion ta 120/80. Entre e nivel ey y 139/89 bo ta wordo considera pre hipertensivo y bo mester adapta bo sistema di biba y come. Un presion di 140/90 y mas halto mester wordo controla regularmente y controla cu bo dokter di cas. Presion halto ta causa daño na bo riñon mas lihe ora cu tin mas factor ta hunga un rol manera diabetes, colesterol halto y malesa di curason y adernan.
4. Come saludabel y mantene un peso adecuado
Esaki ta yuda preveni diabetes, malesa di curason y otro malesa asocia cu malesa di riñon. Reduci consumo di salo. 5-6 gram di salo pa dia ta loke ta wordo recomenda. Esaki ta un telep. Pa baha consumo di salo trata di come menos cuminda procesa, esta di bleki, boter of paki y menos cuminda di restaurant. No agrega salo na bo cuminda. Ta mas facil pa controla bo consumo di salo si bo mes prepara bo cuminda na cas cu ingrediente fresco.
5. Bebe suficiente awa (6-8 glas)
Bebe 8 glas di awa of likido sin caloria pa yuda e riñonnan deshaci di salo, urea y otro materia toxico for di nos curpa y asina baha e riesgo di haya malesa di riñon segun investigacion haci na Canada y Australia. Tambe bebe agresivamente 6-8 glas (2 liter) di awa den un shot no ta recomenda, esaki tin su consecuencianan negativo. Ta bon pa gradualmente aumenta e glasnan di awa cu bo ta bebe te yega 6-8 glas (2 liter) pa dia. Naturalmente mester tene na consideracion cu e cantidad di awa cu un hende mester bebe no ta pa tur hende mesun cos. Tene cuenta cu bo sexo, tipo di ehercicio, clima, condicion di salud, dunamento di pecho etc. Si den pasado dokter a constata un piedra den bo riñon ta recomendabel pa bebe entre 8 pa 12 glas (2–3 liter) di awa pa dia pa evita formacion di piedra.
6. No huma
Humamento ta baha e fluho di sanger pa bo riñonnan. E riñonnan no por funciona optimal ora nan haya menos sanger. Humamento ta subi e riesgo pa cancer di riñon cu 50%.
7. No uza remedi cu regularidad cu bo ta cumpra na botica sin recept
Remedi no-esteroide anti-inflamatorio ta conoci pa causa daño na riñon si bo uz’e regularmente (por ehempel advil, ibuprofen). E remedinan aki probablemente no ta forma un gran peliger si bo riñonnan ta den bon salud y si bo ta uz’e solamente den caso di emergencia. Ora cu ta trata di dolor cronico ta bon pa bo trat’e hunto cu bo dokter.
8. Laga controla funcion di bo riñon si bo tin un of mas di e factornan di riesgo halto:
- diabetes
- presion halto
- obesidad
- un di bo miembro di famia tin malesa di riñon
