Algemene Ziektekosten Verzekering

Kico bo mes por haci pa recobra bo salud?
Aruba tin un cuido di salud bon regla. Tur hende tin acceso na un dokter di cas y via un carta di dje (verwijsbrief) na e specialistanan. Tambe nan tin acceso na un hospital moderno.

Henter nos comunidad ta responsabel pa mantene e sistema di cuido medico aki, pa asina garantisa su existencia,su calidad y su desaroyo continuo den futuro. Cada ciudadano ta contribui na e sistema di cuido medico, pesey como ciudadano ta importante pa bo haci uzo di dje conscientemente.

Cada adulto ta responsabel pa su propio salud. E mayornan ta responsabel pa salud di nan yiunan. Den bida nos a pifia con nos por cuida nos salud cu varios custumber y medida crioyo, esta loke nos conoce tambe como remedi di cas.

Si nos ta sinti cu nos tin algo cu un dokter por trata miho, anto e ora ey nos tin cu bay nos dokter di cas. Tambe ora nos no sa kico pa haci, nos por dicidi di busca conseho cerca nos dokter di cas.

Realmente hopi hende sa trata varios keho y sintoma sin acudi na un dokter. Esaki nos ta yama cuido propio (na Ingles self care y na Hulandes zelfzorg). Cuido propio tambe ta encera ‘e habilidad pa dicidi na cua momento bo mester bay dokter’.

E buki aki kier promove cuido propio.
Den e buki aki tin informacion valioso pa un cantidad di sintoma y malesa comun, pa asina por scoge e opcion mas adecuado for di nan.

Tin conseho:
1. Con pa reconoce e señalnan di e molester- y malesanan mas comun;
2. Tocante kico abo mes por haci pa alivia esakinan;
3. Ki ora ta consehabel pa busca ayudo di bo dokter di cas.

Ora den e buki aki tin skirbi “Tuma contacto cu bo dokter di cas”, esey kiermen: comunica cu bo dokter di cas na su consultorio.

Ora den e buki aki tin skirbi ‘Tuma contacto cu bo dokter di cas inmediatamente”, esey kier men: no vacila, acudi mesora na bo dokter di cas of e dokter na warda si esaki ta den oranan anochi of den weekend.

Ta consehabel pa, prome cu bo bay dokter, bo pensa riba kico bo ke papia of kico bo ke puntra. Skirbi’e riba un pida papel y bay dokter cu ne.

Si bo tin varios keho of pregunta, notifica dokter esey, ora bo haci bo cita.

Esaki ta e puntonan cu bo mester pensa riba nan prome cu bo bay cerca dokter:

• cua ta e rason principal cu bo ta bay cerca dokter?
• for di ki tempo bo tin keho of for di ki tempo e kehonan a bira pio?
• cua ta e remedinan cu bo ta uza! Skirbi e nombernan of, si ta necesario, bay cu e remedinan cerca dokter. Esaki ta conta tambe pa remedi cu bo mes a cumpra na botica, manera remedi contra dolor, laxante, yerba etc.
• si bo ta di opinion cu bo keho(nan) lo por ta relaciona cu uzo di cualke remedi, no vacila pa bisa dokter esey. Dokter por controla esey mesora.
• si bo ta di opinion cu bo keho(nan) lo por ta relaciona cu malesa of afeccion di antes, bisa bo dokter esey mesora. Si bo ta di opinion cu bo sa cua ta e causa, notifica esey tambe.
• tin circunstancia den bo bida priva cu por tin influencia riba e keho?
• si bo yiu tin keintura, percura pa bo midi su temperatura di antemano.

Sa sosode cu un hende cu ta fo’i tino ta haya gana di saca. Pa preveni cu e persona por stik den su saca of cu saca por bay den su pulmon, mester pone e persona fo’i tino den e asina yama ‘posicion stabiel drumi di banda’.

E ilustracion ta mustra con esaki mester sosode. Tambe bo por pone e persona drumi boca abou cu su cabes bira na un banda (esta, cu su banda di cara abou); particularmente cerca mucha, tambe ora nan tin steipi, esaki ta facil pa haci.

Pa hopi hende, ora cu nan yega pa prome biaha na Seccion di Asistencia di Urgencia, miho conoci como Prome Auxilio (Eerste Hulp) of Poli, nan ta cera conoci cu Hospital. Ki ora bo ta bay na Prome Auxilio y ki ora no? Hopi biaha ta masha dificil pa calcula esaki. Pa evita cu lo bo haya bo ta warda hopi innecesariamente, aki ta sigui informacion importante tocante Asistencia di Urgencia.

Cua pashent?

E Seccion di Asistencia di Urgencia taatende pashent cu:

• a sufri un accidente, por ehempel, un accidente di trafico, un kemadura of un corta;
• tin sintoma di malesa agudo, por ehempel, asma, alergia of atake di curason;
• nan dokter di cas a manda pa interna/trata nan cu urgencia.

E pashentnan aki ta bin riba nan mes of ambulance ta trece nan.

Durante cada warda tin diferente enfermero specialisa y 1 of 2 dokter na Seccion di Asistencia di Urgencia. Dependiendo di e caracter y e gravedad di e kehonan, nan por haci un apelacion na e specialistanan indica.

Wardamento

Ora bo presenta na e loket di Seccion di Asistencia di Urgencia di Hospital, ta stipula con urgente bo necesidad di asistencia medico ta. Esun cu tin necesidad mas urgente di asistencia medico ta prome na turno. Dependiendo di e urgencia y e cantidad di pashent cu presenta, bo ta yega na turno lihe of menos lihe. E wardamento ora ta hopi druk por bira largo pa un pashent cu no tin tanto urgencia.

Seccion di Asistencia di Urgencia di Hospital ta pidi bo comprension pa esaki.

Bay bo dokter di cas prome

E nomber ta papia pa su mes: Seccion di Asistencia di Urgencia. E seccion aki en principio ta destina pa pashent cu mester trata cu urgencia. Pa evita wardamento hopi largo, ta consehabel pa semper bo puntra bo mes prome con urgente bo necesidad di asistencia medico ta. Miho ta pa prome cu tur cos bo tuma contacto cu bo dokter di cas of e dokter na warda. Den caso cu bo mester di asistencia di un specialista, bo dokter di cas of e dokter na warda lo manda bo cerca un cierto specialista na Hospital of pafo di Hospital.

Privacidad

Relaciona cu privacidad y trankilidad di e pashentnan cu ta den e Seccion di Asistencia di Urgencia, Hospital ta suplica bo pa limita bo acompañantenan na un solo persona.

E otro acompañantenan por keda warda den e sala di espera. Sa sosode cu ta pidi e acompañante pa warda un rato den e sala di espera, pasobra mester efectua un saminacion mas profundo. Den caso cu bo por bolbe bay cerca e pashent, un di e enfermeronan den servicio lo yama bo.

Tur hende sa nota cambio na nan curpa cu no ta normal. Tin oro algo ta aparece y no ta bay of e ta keda reaparece regularmente. Ta miho e ora ey pa bo consulta un dokter. Esaki sigur ta recomendabel si ta trato di un, of mas, di e ocho señalnan di cancer, indica akibou. Cancer ta curabel si descubri’e na tempo.

1. CUANTO TEMPO BO TIN HERS

caba y/of cu e tosamento ey? Keda hers of cu un tosamento persistente, principalmente cerca humado, ta algo cu mester pone atencion na dje.

2. APARICION DI UN FRET OF UN MOEDERVLEK

nobo of un cu bo tawata tin caba ta mustra señal di cambio. Cu cambio ta referi na crecemento, sangramento, iritacion, cambio di colo, grawatamento persistente. Laga bo dokter samina e fret of e moedervlek cu a aparece of cu ta mustra cambio.

3. NO NEGLISHA UN HERIDA OF IRITACION.

Si e tarda pa cura of pa bay of si e ta reaparece, trec’e na atencion di bo dokter.

4. CAMBIO DEN BAYMENTO AF.

Cada persona tin un patronchi diferente den baymento af. Si bin un cambio den esaki, por ehempel, diarea persistente of barica cera cu frecuencia, ta bon pa bay un dokter.

5. E PESOTA BAHA SIN MOTIBO.

Perdemento di peso sin ningun motibo obvio, sin un dieta, sin cu bo ta haciendo mas ehercicio etc., no ta normal. Pone atencion na esaki y bishita bo dokter di cas.

6. REGLA FOR DI TEMPO, MANCHA-MENTO, Slijm CU SANGER.

Aki por ta trata di un liña di sanger den e slijm ora cu tosa, sanger ora cu bay af, sanger den orina, bo ta mancha of haya bo regla prome cu ta dia, sangramento of sacamento di otro

likido for di bo bigui di pecho, of mas fluho cu normal for di bo curpa abou. No tarda pa bay dokter si tin un of mas di e señalnan aki.

7. NO POR GULI BON.

Dolor ora bo guli? Dolor ora bo bebe bebida alcoholico of zuur? Bo ta sinti comosifuera e cuminda ta keda pega den bo garganta? Cuanto tempo bo tin ta sinti esey caba? Pone bo dokter na altura di esaki.

8. 0RA BO SINTI UN PIPITA/Bolita, BAY DOKTER MESORA!

Un pipita/bolita por sali na pecho, pero

tambe na otro parti di bo curpa. Mayoria di biaha esaki no ta haci dolo. Tambe klier hincha bou di brasa, na garganta of na bo las of un testiculo hincha, ta motibo pa consulta un dokter mesora.

Cu mayoria di e kehonan aki bo por warda un par di dia, pa wak si nan ta bay di nan mes. Ora ta trata di punto 6 y 8 ta recomendabel pa bo bay dokter lo mas pronto posibel.

Ora cu bo bay cerca dokter,splica bon kico bo ta sinti of kico ta molestia bo, cu ki frecuencia, ki ora y cuanto tempo caba. Mas bo dokter sa, miho e por yuda bo.

Awendia cada bes mas ta pidi e consumidornan pa tuma mas responsabilidad pa nan propio cuido di salud. Ta encurasha nan pa nan adopta un estilo di bida saludabel pa asina yuda evita diferente malesa. E consumidornan ta birando mas activo den tratamento di e malesa enbes di ta un recipiente pasivo di terapia.

Cu e aumento di responsabilidad aki mester bin mas reconocemento di e derechonan di consumidor di servicio di salud. Por considera derecho di pashent como derecho social y como derecho individual. Como derecho social: nan ta cubri aspectonan manera calidad y accesibilidad di cuido di salud. Como derecho individual nan ta relaciona cu derecho humano basico y derecho di consumidor.

Prescripcion pa consumidor saludabel.

1. Tur pashent tin derecho riba:
2. Cuido di salud apropia >y accesibel.
3. Cuido sin discriminacion.
4. Informacion y educacion.
5. Seleccion di un dokter of di otro trahado den salud.
6. Eleccion di un servicio di cuido di salud.
7. Autorisacion informa riba tratamento.
8. Participacion den nan propio cuido di salud.
9. Respet, privacidad, confidenciali-dad y dignidad.
10. Posibilidad di keho.
11. Indemnisacion den caso di lesion.

Aambei ta ader hincha of spatader rond di e ano y den dje. Bo ta ripara cu bo tin aambei door di perdemento di sanger despues di bay af, door di dolor, kimamento of grawatamento den e area rond di e ano.

E causa mas comun ta presmento (puhamento) pa motibo di ceramento di barica. Tambe door di embaraso y hayamento di yiu por surgi aambei.

Mayoria di biaha aambei ta inofensivo y no mester di ningun tratamento special. Generalmente despues di un par di dia e ta disparce.

CUIDO PROPIO: LOKE BO MES POR HACI

Evita ceramento di barica door di come cuminda cu por digeri facilmente (mira e capitulo “Ceramento di barica (Constipacion”). Evita presmento (puhamento) pa un rato largo. Bay w.c. asina cu bo sinti necesidad.

Ora e ta haci hopi dolor, bo por uza un unguente pa alivi’e. Bo por haya esaki na botica bou di diferente marca registra. Tambe bo por purba primi of pusha e aambei bek den e ano. Esaki ta hacie bira menos doloroso.

TUMA CONTACTO CU BO DOKTER DI CAS

• Si bo haya aambei cu ta sangra pa prome biaha.
• Si bo tin mas di 40 aña y bo haya aambei pa prome biaha.
• Si bo tin dolor.
• Si e aambei ta hopi grandi.
• Si bo ta duda cu ta aambei e ta.

Anshamento ta un condicion cu por surgi na cualkier edad. Ta importante pa por reconoce su desaroyo y pa sa kico ta pasa.

E pulmonnan ta haya nan mes demasiado yen di aire. E aire no ta cambia bira fresco suficiente, esaki ta conduci no anshamento.

Den hopi situacion e kehonan ta surgi pa motibo di infeccion di e canal respiratorio. Kico ta sosode e ora ey den e canal respiratorio?

• E flishinan di slijm den e canal respiratorio ta bira mas diki.
• E musculonan rond di e canal respiratorio ta contrae y nan ta hala cera duro.
• E flishinan di slijm ta cuminsa produci mas slijm y mas likido.
• E pasashi di e aire ta bira mas chikito. E canal pa aire pasa ta cera, esaki ta haci halamento di rosea mas trabahoso.

E predisposicion pa un canal respiratorio cu por irita lihe ta genetico. Ora cu un di e mayornan ta asmatico of alergico, e chens cu un yiu tambe ta predispuesto pa esaki ta cincuenta porciento. Ora cu tur dos mayor tin asma of alergia, e chens ta bira setenta porciento. Asma por cuminsa na cualke edad. Un hende por desaroya asma alergico solamente

ora e tin predisposicion pa esey. Ora cu un hende cu ta predispuesta drenta regularmente den contacto cu cierto material (stimulo alergico of alergeno), anto e ora ey poco poco un alergia por desaroya su mes.

Hende cu ta sufri di asma nan canal respiratorio por irita lihe. E ta wordo “irita” door di inhala, por ehempel, excremento di acaro (mijt) den stof di cas, polen, huma, holo y neblina. Por distingui e stimulonan aki den stimulo alergico y stimulo no alergico.

No ta tur hende cu asma tin molester di tur sorto di stimulo ni tampoco mes tanto molester. Te hasta ta diferente pa cada persona con y ki ora e ta reacciona riba un cierto estimulo: esun dia un hende ta haya anshamento mas lihe cu e otro dia y tambe, dependiendo di e temporada di aña, hopi biaha e kehonan ta diferente.

CUIDO PROPIO

Estimulo alergico

por haci cu un:

• hende cu asma por haya anshamento pa via di e estimulonan aki of por cuminsa ‘piep’. Esey por sosode denter di mey ora, pero tambe te 24 ora despues. Pesey hopi biaha ta trabahoso pa haya sa pakico un hende a haya anshamento.
• hopi hende ta alergico pa e asina yama alergeno.

LOKE BO MES POR HACI

Evita:

• acaro den stof di cas:
• casca di cuero di bestia, manera pushi, cacho, coneu y parha;
• polen di algun sorto di yerba, palo of mata;
• spor di beskem.

Algun hende ta alergico tambe pa proteina den cuminda (pisca, lechi, noot) of pa cierto remedi, pero esey ta sosode cu menos frecuencia, evita di come esaki nan si t’ e caso.

Estimulo no alergico

Curpa humano no ta traha anticuerpo contra estimulo no alergico. No tin anticuerpo contra neblina, frialdad, holo di alga cu ta hasa of perfume. Manera a bisa caba, no ta tur hende cu asma tin mes tanto molester di e simbolonan aki.

Tambe tin estimulo cu tur hende por haya molester di nan, manera huma of cierto holo. Hende cu asma por reacciona asina fuerte riba nan cu nan ta haya anshamento.

LOKE BO MES POR HACI

Evita:

• material iritante cu bo ta inhala, manera huma di tabaco, holo di gas, holo di algo cu ta hasa, perfume, holo di un spaanplaat of di material di isolacion, holo di clorox y otro detergente (was pa bunder, terpentijn), damp di gasolin, gas di escape di auto y ink (pa imprimi);
• material iritante cu bo ta tuma, manera cierto remedi contra dolor y substancia pa conserva alimento;
• condicionnan atmosferico, manera neblina, awasero, tempo humedo, cambio fuerte di temperatura of aire.

Esfuerso y tension

Hende cu asma por haya anshamento tambe door di of despues di esfuerso fisico, sigur si nan no intensifica e esfuerso poco poco. Esaki yama “asma (pa via) di esfuerso”. Ademas stress y emocion fuerte tambe por ‘irita’ e curpa di tal forma cu un hende cu ta sufri di asma por haya anshamento door di esey. Un infeccion di e canal respiratorio ora di verkoud of griep tambe por empeora e asma temporalmente.

LOKE BO MES POR HACI

Ora bo haya bo cu un hende cu a haya un atake di asma:

• keda den cercania di e persona.
• di tur manera, keda trankil. Experencia un atake di asma ta masha angustioso. Si bo ta cerca, e ta un sintimento di impotencia. Si bo bay den panico, e victima ta ripara esaki y e mes tambe ta bay den panico.
• purba wak si e persona por inhala, cu e remedi Ventolin e anshamento por baha.

TUMA CONTACTO CU BO DOKTER DI CAS INMEDIATAMENTE

• Si inhalamento no ta logra of si e kehonan no ta baha despues di inhala Ventolin, anto tuma contacto inmediatamente cu e dokter na warda, cu Spoed Eisende Hulp na Hospital of ImSan
• Haci pregunta cu e persona por contesta bo cu ‘si’ of ,no’ of te hasta djis bisa si of no cu su cabes so. Percura pa e persona haci menos esfuerso posibel.
• Si ta necesario, yama un taxi of ambulance pa hiba e victima Hospital of cerca e dokter na warda; tambe bo por tuma contacto cu Central Di Alarma, tel. 911. Delibera kico bo mester sigui haci.

Beskem di pia ta manifesta su mes hopi biaha den forma di blaar chikito cu ta habri, un cuero duro, grawatashi y un dolor cu ta pica. Por tin sker den bo cuero tambe. Beskem di pia ta aparece hopi cerca hende grandi y cerca mucha tambe. Beskem ta crece facilmente den un ambiente humedo, manera piscina y den baño. Sapato cu no ta ventila bon, manera sapato di deporte of boots di rubber, ta promove beskem di pia.

CUIDO PROPIO:

LOKE BO MES POR HACI

Laba bo pia mainta y anochi. Seca bo pia bon, specialmente meymey di bo tenchi. Bisti tur dia mea limpi preferiblemente di catuna. Uza sapato cu tin bon ventilacion. Kita bo sapato ki ora cu bo haya un chens pa hacie. Uza un crema cu ta mata beskem (nan ta bend’e sin recept tambe).

Sigui cu e tratamento te dos siman despues cu el a cura. Den un fase trempan, si bo djis bet e cu tintura di yodo (jodium) hopi biaha ta suficiente.

Haci esaki dos bes pa dia y sigui hacie te un siman despues cu e fenomeno a disparce.

TUMA CONTACTO CU BO DOKTER DI CAS

• Si e tratamento menciona no trece mehoransa denter di 14 dia.
• Si e beskem sigui crece bou di bo huñanan,
• Si e beskem extende pa otro parti di bo curpa.

Wanga ta bichi cu por presenta tanto cerca mucha como cerca hende grandi. Nan tin un largura di mas o menos 1 cm, nan ta fini manera hilo y nan colo ta blanco. Wanga ta pone su webonan rond di e ano; nan ta ocasiona grawatamento. Door di grawata, bo ta haya e webonan riba bo dede y bou di bo huña. Asina ey facilmente nan por plama bay no otro persona of bolbe bay den bo tripa via bo boca. E ora ey bichi nobo ta bolbe sali for di e webonan. Wanga no ta causa dolor di barica ni perdemento di peso.

Bichi di tripa (Ascoride) parce bichi di tera bleek. Nan cola ta mas bruin y nan por bira 30 cm largo. Ascaride bo ta haya hopi cerca cacho.

Bichi di cinta ta poco comun. Nan ta forma pa pida pida cuadra di 1 pa 2 cm, cu tin biaha bo ta haya den sushi di hende. E fuente di contagio mayoria di biaha ta carni mucho curu. Nan por bira masha largo mes y nan ta conduci na biramento flaco.

Bo par haya wanga pa motibo di carni no bon cushina of door di sushi di bestia (por ehempel, den baki di santo!). Tambe via serbete, man di porta, cas di hunga, etc. Bichi di tripa bo por haya pa motibo di berdura no bon laba of no bon cushina.

CUIDO PROPIO:

LOKE BO MES POR HACI

Aunke bichi no ta cos cu nos gusta mira y nan ta iritante, toch nan ta inofensivo. Den caso di wanga hopi biaha ta necesario pa trata henter e famia.

Laba bo man cada bes cu bo bay w.c. y prome cu cada cuminda. Mantene bo huña semper limpi y cortico. Evita contacto di bo dedenan cu bo boca of nanishi.

Laba paña di cama, paña di abou y paña di drumi cu awa cayente. Uza diferente washandje y serbete di baño pa parti ariba y parti abou di bo curpa.

Limpia regularmente man di porta y tur otro cos cu hende ta mishi cu frecuencia. Colga regularmente un serbete limpi den w.c. Den caso di bichi di tripa y bichi di cinta, tratamento di e portado ta suficiente.

TUMA CONTACTO CU BO DOKTER DI CAS

• Si bo ta duda cu ta bichi e ta. Si ta posibel, hiba un bichi cerca dokter.
• Si bo tin bichi despues di a biaha pa otro pais tropical.
• Si despues di un tratamento, ainda bo tin bichi.

Ora hende papia di biramento di cabes, nan por ta referiendo na diferente cos. Por ehempel, “tur cos ta drey rond di mi, mi tin un sintimento di debilidad den mi cabes, e sintimento cu mi ta bay fo’i mi of un sintimento insigur den mi pianan”.

Biramento di cabes ta desagradabel y fastioso. E ta haci bo bira insigur y angustia.

Ta distingui tres sorto di biramento di cabes:

• bo ta sinti cu tur cos ta drey rond di bo.
• bo ta sinti debilidad den bo cabes.
• bo ta sinti bo insigur pa move.

Sintimento cu tur cos ta drey rond di bo

E biramento di cabes aki ta haci bo sinti tur cos ta drey rond di bo. Tin biaha ta parce cu bo mes tambe ta drey, move of cay. Por sosode cu bo ta cuminsa soda, bo ta bira bleek y ta haya gana di saca. Tambe por ta cu pa un rato bo no ta tende bon, bo horea ta cuminsa fluit of bo ta sinti manera cu bo horea a blaas. E biramento di cabes aki tin di haber cu bo organo di ekilibrio.

Tin un organo di ekilibrio na cada horea. Den caso cu un organo di ekilibrio no traha bon, bo cerebro ta haya informacion incorecto y pa e motibo ey ta parce cu tur cos rond di bo ta drey.

Sintimento di debilidad den cabes

E sintimento di debilidad den cabes of cu casi bo ta cay flauw por origina door di:

• tension, angustia y tristesa; tin biaha esaki ta bay hunto cu halamento di rosea lihe y superficial (hiperventilacion );
• emocion fuerte (por ehempel, spanto) of cansancia (por ehempel, pasobra bo ta para pa hopi tempo); prome cu bo haya e forma di biramento di cabes aki, bo por cuminsa soda y bira bleek;
• lantamento diripiente for di un stoel of for di cama;
• anemia (sanger abou);
• cierto remedi cu por tin biramento di cabes como efecto secundario, manera pildo pa orina, pildo pa presion di sanger, pildo pa drumi,
• antidepresivo, algun remedi contra dolor y algun antibiotico.

Sintimento di insiguridad pa move

Particularmente na edad avansa por surgi biramento di cabes, pa motibo di insiguridad pa cana. Ora cu bo ta sinta of drumi, e biramento di cabes ta disparce. Hopi biaha diferente factor ta hunga un rol den esaki: baymento atras di e bista, debilidad den e musculonan di pia, problema cu e pianan y efecto secundario di remedi.

CUIOO PROPIO:

LOKE BO MES POR HACI

Ta bon pa controla cua sorto di biramento di cabes bo tin y kico ta causa e kehonan. Tenemento di un diario pa cierto temporada por yuda. Den e diario bo ta skirbi tur loke tin di haci cu bo biramento di cabes.

Algun ehempel di pregunta cu bo por contesta den bo diario ta:

• Ki ora mi ta haya biramento di cabes?
• Kico mi ta haciendo e momento ey?
• Kico otro mi ta ripara na mi curpa! Con largo e biramento di cabes ta dura?
• Kico ta yuda mi baha e biramento di cabes?
• Mi tin miedo cu e biramento di cabes ta bolbe bini?

Door di lesa e diario, hopi biaha bo ta descubri cua sorto di biramento di cabes bo tin y kico bo por haci pa remedi’e. Si bo sa cua sorto di biramento di cabes bo tin, bo por tuma medida.

Esakinan por ta diferente pa cada persona, dependiendo di e causa di e kehonan. Tin biaha mester kita tension, door di haci algo cu e situacion na cas of na trabou.

Mientrastanto bo por purba sigui move y continua cu bo actividadnan di tur dia. Algun atake di biramento di cabes ta inevitabel. Si bo haya hopi biramento di cabes, e miho cos ta drumi te ora cu e pasa.

TUMA CONTACTO CU BO DOKTER DI CAS

Haci un cita cu bo dokter di cas, si e kehonan bira pio of no pasa despues di cuater siman. Bay cu bo diario cerca dokter; e ora ey por mira con cos ta bayendo y cua medida por tuma. No ta tur biramento di cabes ta cay bou di un di e gruponan menciona. Hopi biaha e causa ta keda desconoci.

Si bo bira hers diripiente, generalmente esaki ta ocasiona pa un infeccion di virus of forsamento di e cuerdenan vocal. Esaki por sosode pa motibo di papia duro of hopi of door di grita. Tanto den caso di un infeccion di virus como den caso di forsamento di e cuerdenan vocal un tratamento cu antibiotico no tin sentido.

CUIDO PROPIO:

LOKE BO MES POR HACI

Duna bo cuerdenan vocal mas tanto sosiego posibel. Purba di no papia. Si toch bo mester bisa algo, purba djis papia cu stem abou. No huma y evita luga yen di huma. No scrap bo garganta. Si bo ta sinti gana di nister, bebe algo. Bo por alivia e incomodidad bebiendo algo Iou y hopi awa.

TUMA CONTACTO CU BO DOKTER DI CAS

• Si e condicion di ta hers persisti pa mas di un siman.
• Si, ademas di ta hers, bo tin problema cu gulimento of halamento di rosea.

Blaar di keintura ta caracterisa su mes na cuminsamento door di pleki pleki cora, hincha y doloroso. Eyden ta surgi despues di tempo blaar cola geel. Ora esakinan seca, nan ta forma casca chikito.

E blaarnan ta cerca di otro rond di e lipnan of na otro luga di nos curpa. Hopi biaha ta e virus di herpes ta causa e blaarnan aki. E virus di herpes aki ta keda biba den e neuronanan (e celulanan di nervio) di bo cuero, sin cu bo ta ripara.

Despues di un prome infeccion di herpes, e kehonan por disparce pa hopi tempo, pa djey bolbe lanta diripiente. E virus di herpes ta haya chens di bolbe lanta pa motibo di bahamento di resistencia. Luz di solo directo, hopi friu, stress of menstruacion por laga e virus bolbe rebiba. Ma tambe ora e condicion general bira pio por ehempel, den caso di malesa cu ta trece keintura cu ne, bo por haya erupcion. E heridanan y e cascanan ta disparce generalmente denter di un siman, a menos cu surgi un infeccion. Si bo tin blaar of calor na bo curpa, bo por infecta otro hende tambe!

CUIDO PROPIO:

LOKE BO MES POR HACI

Si bo a yega di haya keho interiormente, tene hopi cuidou cu baño di solo. Proteha bo lipnan contra Luz di solo. Uza un stift (lip-balm) y un producto contra kemadura di solo cu un factor di proteccion hopi halto. Ora e blaarnan kibra, bo por pone un solucion di yodo (jodium) riba nan pa evita mas infeccion.

Ora bo tin e blaarnan riba bo curpa asina, bo mester percura pa uza un crema contra kemadura di solo cu un filter ultraviolet (UV), ora bo tuma baño di solo. Haci di esaki un custumber como un precaucion.

Purba di no grawata. Preveni infeccion di otro hende. No sunchi niun hende, tanten cu bo tin e blaarnan of e calor rond di bo boca of riba bo lipnan.

TUMA CONTACTO CU BO DOKTER DI CAS

• Despues di e prome infeccion di herpes.
• Si bo ta duda cu di berdad ta un infeccion di herpes e ta.
• Si e calor no disparce denter di 2 siman.
• Si e calor ta saca pus.

Tur hende por haya cambia den nan comportacion relaciona cu animo. Hopi biaha bo no tin niun idea ta di con bo animo por cambia diripiente asina.

Pesey bo mester ta masha alerto ora bo ripara cua/ke di e siguiente sintomanan.

E sintomanan ta:

• bo animo ta abou.
• bo ta haya pensamento negativo.
• bo curpa ta sin gana.
• e cuminda no ta smaak.
• bo ta sinti culpabilidad pa cualke cos.
• bo apetit ta cambia (diripiente bo ta come hopi of net nada).
• parti mainta bo no ta sinti bon.
• bo tin dificultad pa tuma decision.
• bo ta sinti bo mes un persona inutil.

CUIDO PROPIO

LOKE BO MES POR HACI

Na momento cu bo mes of bo famia ripara cualke di e sintomanan aki, esta cambia den bo animo normal, ta necesario y di gran importancia pa cuminsa papia riba esey mesora. Bo mester busca manera di descubri cua ta e factornan den bo bida cu ta pone bo animo cambia bira malo. Bo mester acerca sea e miembronan di bo famia of cualke persona di hopi confiansa pa busca guia riba e bon caminda pa bo haya mehoransa.

TUMA CONTACTO CU BO DOKTER DI CAS

• Si bo ta sinti ansiedad.
• Si bo haya cambio di beis (esaki por bira severo).
• Si bo bira melancolico y continuamente ta yora.
• Si e gusto di biba no t’ey mas.
• Si bo ripara lentitud y fadamento den bo bida: bo ta cuminsa cana mas poco poco, bo no tin energia pa haci nada, bo ta sinti fada, bo ta bira irita lihe y bo ta rabia sin ningun motibo.
• Si bo deseo sexual bira menos of mengua.
• Si bo tin problema cu drumimento.
• Si bo memoria a cuminsa faya.
• Si bo ta descuida bo curpa.

TUMA CONTACTO CU BO DOKTER DI CAS INMEDIATAMENTE

• Si bo ta sinti miedo y temor.
• Si bo ta sinti tristesa cu no ta kita pa un periodo largo.
• Si bo haya pensamento cu no ta cuadra cu realidad.
• Si bo a perde control asina severo cu bo no por funciona na trabou ni na cas.
• Si bo haya pensamento di comete suicidio.

Cansancio no ta un malesa. E ta un señal di sobrecarga. Esaki por tin hopi causa. Di tur manera, e ekilibrio fisico y/of mental entre loke bo por cune y loke abo mes of bo entorno ta exigi di bo, ta kibra. Bo por ta sobrecarga pa motibo di preocupacion of di trabou of pasobra bo resistencia fisico ta debilita pa via di malesa.

Ora cu bo lanta cansa, pero:

• bo ta drumi normal (anochi)
• bo ta come normal
• bo ta haya bo regla normal
• bo ta bay af y bo ta orina normal
• bo no ta uza alcohol
• bo no ta bira flaco,

anto e chens ta grandi cu bo no ta malo fisicamente, sino cu e causa ta di indole mental.

CUIDO PROPIO:

LOKE BO MES POR HACI

Purba calcula cuanto tempo bo ta sinti bo cansa caba y si no ta posibel cu tin un causa no fisico su tras. Purba averigua si no tin algo cu a sosode cu lo por ta motibo di e cansancio. Purba adapta bo forma di biba. Laga e cosnan para cu bo sa cu ta malo pa bo. Come saludabel y varia. Haci mas ehercicio. No huma ni bebe, of bebe na midi.

TUMA CONTACTO CU BO DOKTER DI CAS

• Si durante varios siman bo ta sufri di cansancio sin cu bo ta compron-de pa ki motibo.
• Si bo baymento af a bira diferente for di loke bo ta custuma cu ne.
• Si bo apetit a baha.
• Si bo mester orina mas (tambe den oranan di anochi).
• Si bo ta haya hopi sed.
• Si diripiente bo haya grawata-mento.
• Si bo regla ta diferente for di loke bo ta custuma cu ne.
• Si bo ta perde peso.
• Si bo ta perdiendo apetit.

Bo por papia di casca ora cu den henter bo cuero di cabes bo ta haya yen di scama chikito. Hopi biaha bo cuero di cabes ta grawata un tiki tambe.

Si ta na un solo luga of na diferente luga plama, anto probablemente bo no tin casca, sino un otro afeccion di cuero.

Casca no ta contagioso. Hopi biaha e ta disparce spontaneamente y bo no ta bira coco pelon tampoco. Pa com-batie cu exito por dura basta tempo.

CUIDO PROPIO:

LOKE BO MES POR HACI

Purba uza un shampoo cu pirition di zinc (zinkpyrithion). Duna e shampoo chens pa traha den bo cuero, lagand’e den bo cabey di 5 pa 10 minuut. Laba bo cabey cada pasa un dia.

TUMA CONTACTO CU BO DOKTER DI CAS

• Si e combatimento menciona no duna resultado despues di 6 siman.
• Si e scamanan chikito no ta aparece riba henter bo cuero di cabes, sino solamente na un of varios luga.
• Si bo tin casca chikito riba bo cuero di cabes.

Nos por papia di ceramento di barica of Constipacion, ora bo bay af menos cu ta bo custumber.

Cada persona ta bay af diferente

Algun hende ta bay af tur dia. Otro hende ta bay af un par di biaha pa siman. Tur esey ta masha normal. Ta trata di si e patronchi di baymento af cu semper bo tabatin ta cambia y si bo ta bay af menos of cu mas dificultad. Esey por indica cu bo tin barica cera.

E causanan mas comun di ceramento di barica ta un alimentacion cu poco fibra, falta di ehercicio y mal custumbramento di bo tripanan. Esaki ta nifica cu bo no ta bay w.c., ora bo sinti necesidad. Tambe cierto remedi por causa ceramento di barica (leve). Esaki ta conta, entre otro pa preparadonan di hero, remedi contra depresion y preparadonan di morfina.

CUIDO PROPIO:

LOKE BO MES POR HACI

E miho manera pa evita ceramento di barica ta suficiente variacion den bo alimentacion y ehercicio fisico. Ora bo haci ehercicio fisico intensivo 1 ora

pa dia, cuminda ta pasa door di bo tripanan 3 bes mas lihe cu ora bo keda sinta henter dia sin haci nada.

Ta recomenda cuminda cu hopi fibra (aros integral (zilvervliesrijst), berdura curu, berdura di blachi (manera spinazie) den combinacion cu fruta (appel bon laba cu su casca, apelsina, mango, papaya) y pan integral (volkorenbrood). Eventualmente por agrega flishi di cereal (zemelen) na e cuminda. Kauw bo cuminda bon y bebe hopi awa. Pa adulto esaki ta un liter y mey pa dia. Mainta bebe un glas di awa Iou riba e stoma bashi. Bay w.c. asina cu bo sinti necesidad. No pospone esaki! Como laxante (purgashi) bo par tuma I of 2 cuchara di azeta di oleifi tambe.

TUMA CONTACTO CU BO DOKTER DI CAS

• Si tin slijm of sanger den bo sushi.
• Si bo baymento af baha notable-mente sin cu bo ritmo di bida (bioritmo) a cambia.
• Si bo patronchi cambia den sushi duro alternando cu diarea.

Cerca mucha mas grandi cram (di barica) ta mayoria di biaha consecuencia di un mal custumber di come of di tension. Purba investiga si ta trata di esey: tin biaha mucha por tin problema, manera cu nan ta ter nan na scol, anto nan no ta papia facil over di esey.

CERCA BABY

Baby ta haya cram (den barica) frecuentemente, tin biaha ya un par di siman despues cu nan nace. E ora ey e barica ta sensibel y hincha. Un reaccion natural di e baby ta di hisa su pianan, ora e haya cram. E problema ta disparce di mes despues di tempo. Masha poco mucha di mas di tres luna ta haya molester di cram. Mayoria di biaha e cram den barica ta origina pa motibo di gulimento di aira cu e no ta respo. Tambe pa via di otro motibo, manera infeccion di horea, e baby por haya cram.

Purba evita, door di keda calmo, di (tras)pasa bo inkietud/preocupacion eventual riba e mucha. E mucha por bira tenso, pa motibo di e comportamento di e mayornan/ cuidadonan mes.

Asin’ey ta crea un circulo vicioso. Den caso di cram, e mucha no ta haya keintura. Si acaso bo yiu toch tin keintura, anto e ora ey tin alga otro ta sosodiendo y bo mester consulta cu e dokter di cas.

CUIDO PROPIO:

LOKE BO MES POR HACI

• Durante comemento, laga e mucha sosega y respo un par di biaha.
• Sigui cu dunamento di lechi na pecho; lechi di mama ta e miho cos pa e stoma di e baby.
• Si bo ta uza lechi pa baby na puiro, paga tino pa e buraco di e tetero no ta mucho grandi. E cuminda por pasa rapidamente door di dje, pero e no mester basha si.
• Purba duna e barica di e baby un masashi cu cuidou.
• Cualke cos, carga e mucha pega na bo curpa. Esey ta duna e mucha un sintimento di proteccion, ta hacie respo mas facil y ta dun’e un masashi Ieve.

TUMA CONTACTO CU BO DOKTER DI CAS

• Si e (supuesto) cramnan ta presenta pa prome biaha y ta dura mas di mey ora.
• Si e mucha ta yora na gritamento.
• Si e mucha tin keintura tambe.
• Si bo ta preocupa pa e cramnan di bo yiu y si bo ta puntra bo mes si e cramnan ta berdaderamente e causa di e kehonan.

Afeccion na scarnir por tin diferente causa. Su causanan por ta hopi evidente tambe, por ehempel, verzwik-mento (mira e capitulo “Verzwikmento (di enkel)”). Sinembargo, tin afeccion cu ta mas dificil pa reconoce, manera desgaste di e weso moli (kraakbeen) di e scarnir, un inflamacion of un distur-bio den e metabolismo.

E keho- y sintomanan ta:

• dolor
• sintimento stijf, dificultad pa move
• hinchamento y tin biaha, biramento cora y sintimento cayente

Desgaste di e weso moli, yama artrosis, ta origina paulatinamente (poco poco). Na Hulandes nan ta yam’e “slijtage”.

E prome sintomanan ta dolor ora di cuminsa haci cualke movemento y sintimento stijf na heup, rudia of lomba mainta ora lanta. Unabes bo cuminsa move, e dolor ta mengua.

No tin un tratamento pa curacion. E consehonan general ta movemento dosifica, combatimento di sobrepeso, cautela cu uzo di remedi contra dolor relaciona cu e efectonan secundario y siña biba cu ne.

Artritis reumatoide ta un infeccion di scarnir cronico cu no ta asina comun na Aruba. E caracteristicanan ta afeccion di e scarnirnan mas chikito (na man y pia) cu hopi dolor, hinchamento y te hasta deformacion.

Den caso di gota (jicht) e cristalnan forma pa acido urico ta causa un dolor agudo y fuerte den un scarnir ora di haci movemento cu ne.

Cu frecuencia sa tin hinchamento y biramento cora tambe. Un predis-posicion genetico y factornan dietetico ta hunga un rol den su origen. Den e tratamento tanto dieta como bebe-mento di masha hopi awa ta mes importante cu e remedinan.

Dolor di scarnir, di musculo y di weso menos specifico ta aparece den caso di un gran cantidad di infeccion di virus. Door cu nan ta aparece den combinacion cu e caracteristicanan di malesa general, manera keintura y dolor di cabes, bo por reconoce nan.

Dengue (mira e capitulo “Dengue”) ta un ehempel di e fenomeno aki; na Hulandes nan ta yam’e “knokkel-koorts”.

CUIDO PROPIO

LOKE BO MES POR HACI

Purba describi bo dolor mas miho posibel a base di varios pregunta:

• Cuanto tempo bo tin e molester caba?
• EY a cuminsa diripiente (agudo) of el a desaroya poco poco (paulatinamente)?
• Kico ta haci e dolor bira pio y kico ta hacie mengua?
• Tin cos cu bo no ta tribi haci mas of cu bo no por haci mas?
• Ki influencia e tin riba bo actividadnan di tur dia?

Sea cauteloso cu remedi contra dolor y semper bebe hopi awa!

TUMA CONTACTO CU BO DOKTER DI CAS

• Si e dolor ta molestia bo hopi y bo no sa cua ta e causa.
• Si un dolor conoci diripiente ta bira pio of ta dura mas di un siman.

CERCA MUCHA

• Si bo yiu tin un infeccion di garganta of dolor di garganta y diripiente e haya dolor den su scarnirnan.

Dolor no ta un malesa riba su mes, sino un señal cu tin algo cu no ta bon cu nos curpa. Ta manera cu dolor ta obliga nos di haci algo contra dje. Manera busca sosiego, tuma un posicion cu no ta haci dolor of stop cu un cierto actividad.

Combatimento di dolor cu remedi no semper ta util ni rasonabel. Pa dolor cu ta aparece pa prome biaha sin ningun causa evidente, mester busca semper un eventual causa prome. Si bo tuma un remedi contra dolor sin cu bo sa cua ta e causa, bo por haya bo ta djis disimula e dolor. Bo ta pospone buscamento di e causa, pero entre-tanto e malesa por bira pio.

Generalmente e causa ta hopi evidente, manera den caso di dolor di menstruacion, dolor di djente, dolor di cabes, verkoud of dolor ocasiona pa un

lesion.

Dolor fuerte cu diripiente ta dal den bo barica of den bo pecho, semper ta sospechoso. Esey semper ta un motibo pa consulta un dokter.

CUIDO PROPIO:

LOKE BO MES POR HACI

Si bo conoce e origen di e dolor, bo por uza un remedi cu ta kita dolor pa un alivio temporal. Si bo ta sufri di stoma of si bo ta uza remedi cu ta haci bo sanger mas awa, no bebe aspirin ni remedi cu, mescos cu aspirin, ta contene acido acetilsalicilico. Parace-tamol si ta permiti.

Den caso di duda, consulta bo dokter of boticario. Semper lesa e instruc-cionnan (di uzo) den e empake. No tuma nunca mas di loke ta prescribi. Un cantidad mucho grandi ta aumenta e posibilidad di efecto secundario (mira tambe e capitulo “Remedi”).

TUMA CONTACTO CU BO DOKTER DI CAS

• Den caso di dolor cu causa desconoci.
• Si bo haya dolor cualke caminda y esaki dura mas di un siman.
• Si bo no por wanta e dolor facilmente.
• Si un dolor conoci pa bo diripiente bira pio, bira mas frecuente, cuminsa bira difuso of ta difundi su mes di otro forma.

TUMA CONTACTO CU B0 DOKTER DI CAS INMEDIATAMENTE

• Den caso di dolor fuerte repentina-mente sin causa conoci.

Dolor di cabes por tin hopi causa. Mayoria di biaha e causa ta stress of tension. Dolor di cabes tambe ta presenta hopi biaha pa motibo di keintura y den caso di malesa infeccioso comun, manera griep of verkoud. Un ke otro bes dolor di cabes

por ta consecuencia di un mal dentadura, un ambiente malo paden di cas (p.e. poco of mal circulacion

di aire) of presion halto (di sanger) cu a surgi den un tempo cortico.

TIN TRES SORTO DI DOLO DI CABES MAS FRECUENTE.

• Dolor di cabes pa motibo di tension. Esaki ta ocasiona pa tension y stress cu ta manifesta su mes door di un tension mas halto na e musculonan di nek y di schouder. Frecuentemente hende ta haya e sensacion di tin un banchi hopi cera rond di e frenta.

• Migraine. Esaki ta un dolor di cabes cu ta presenta cu atake. Un atake di migraine ta cuminsa hopi biaha cu keho di e bista, sigui pa un dolor di cabes masha fuerte frecuentemente na un banda) y tin biaha cu biramento di stoma y sacamento. Despues di e atake hende ta haya hopi biaha un cabes pisa. Por trata migraine general-mente cu remedi. Esakinan ta mas efectivo si tuma nan asina cu bo sinti cu e atake ta biniendo. Awendia tin tambe remedi cu por kibra e atake unabes cu e t’ey caba.

E causa di migraine ta desconoci, pero si tin factor causante conoci, manera traha bou di presion halto, cansancio, stress compaña of no pa hopi huma-mento y bebemento, menstruacion y cambio den presion di aire

• Dolor di cabes na frenta of na cara. Dolor di cabes na frenta of dolor di cabes na cara, hende por haya hunto cu sinusitis of despues di un verkoud. Tambe musculo sobre-carga rond di bo wowo (pa motibo di keda fiha intensivamente of door di bisti un bril robes) por causa dolor di cabes na frenta. Esaki ta presenta frecuentemente den curso di dia of anochi. Pa motibo di un dentadura cu no ta sinta bon por presenta un sobrecarga di e cachete. Esaki tambe por ocasiona dolor di cabes.

CUIDO PROPIO:

LOKE BO MES POR HACI

Percura pa suficiente aire fresco. Evita espacio yen di huma y percura pa un bon ventilacion na cas y, si por, na trabou. Drumi suficiente anochi den un

espacio fresco y cu bon ventilacion. Laga nan controla bo wowo, asina cu bo pensa cu bo bista ta bayendo atras. Bay dentista si bo ta kere cu algo ta pasando cu bo djentenan.

Den caso di dolor di cabes pa motibo di tension, check si ta pa via di un posicion di traha robes (por ehempel, un stoel mucho halto of mucho abou) bo ta sobrecarga bo musculonan di nek y di schouder. Puntra bo mes si no por tin tension emocional. Den caso di migraine mester elimina tur sorto di circunstancia cu ta causa dolor di cabes. Pensa den e caso aki riba stress (mira e capitulo “Stress”), presion di trabou pisa, bibamento iregular, masha poco drumimento (anochi), abuso di alcohol y humamento.

TUMA CONTACTO CU BO DOKTER DI CAS

• Si bo ta kere cu bo tin migraine.
• Si e dolor di cabes ta persisti pa mas cu un par di dia.
• Si, despues di un verkoud, bo keda cu dolor di cabes na frenta, mientras cu e otro oesternan a somenta.

TUMA CONTACTO CU BO DOKTER DI CAS INMEDIATAMENTE

• Si bo haya dolor di cabes fuerte repentinamente y sin ningun motibo.
• Si despues di un accidente of un caida, bo haya of keda cu dolor di cabes.

Dolor di garganta ta manifesta su mes door di dolor ora di guli y bo ta sintie na bo amandel, patras den bo garganta of na bo corocoro. Si dolor di garganta ta bay hunto cu verkoud, dolor di musculo y tosamento, generalmente esaki ta causa pa un virus. No tin remedi contra e virus aki. Door di resistencia di e enfermo e ta disparce di mes denter di un par di dia.

Ora cu e dolor di garganta ta bay compaña pa problema cu gulimento y keintura halto, anto posiblemente ta trata di un infeccion di garganta of di amandel. E ora ey hopi biaha tambe bo por sinti klier hincha den bo garganta.

Tin biaha por combati esaki cu antibiotico, ora cu e causa ta un bacteria. Pero hopi biaha e ta pasa di su mes tambe.

CERCA MUCHA

Cerca mucha sano casi semper e amandelnan ta grandi. E ora ey nan ta ros mescos cu parti paden di e boca. Si nan ta inflama, nan ta cora cora. E ora ey frecuentemente bo por mira prop chikito geel.

CUIDO PROPIO:

LOKE BO MES POR HACI

Si bo tin un infeccion di virus, bo por tuma un remedi pa kita dolor (mira e capitulo “Remedi”). Tambe bo por baha e dolor door di bebe algo friu.

CERCA MUCHA

Gulimento ta haci dolor. No obliga e mucha come, pero percura pa e haya suficiente cos di bebe.

TUMA CONTACTO CU BO DOKTER DI CAS

• Si gulimento no solamente ta bira doloroso, sino tambe trabahoso.
• Si e molester persisti pa mas cu tres dia y bo temperatura di curpa ta mas cu 38,5˚C.

TUMA CONTACTO CU BO DOKTER DI CAS INMEDIATAMENTE

CERCA MUCHA

• Si e mucha tin problema cu hala-mento di rosea.
• Si e no por bebe ni guli.
• Si e no por guli su scupi.
• Si e tin dolor den su garganta y na su nek y keintura halto.

Dolor di horea por ta ocasiona pa eccema den horea of un prop den horea. Tambe e por ta ocasiona pa un infeccion den e horea meymey. Esaki generalmente ta consecuencia di un verkoud. E sintomanan di infeccion di e horea meymey ta: dolor di horea, e sintimento manera cu bo tin un prop den bo horea y keintura. Tin biaha awa ta sali for di e horea.

CERCA MUCHA

Ora mucha chikito tin verkoud, hopi biaha nan ta haya un presion leve riba nan horea. Esey ta pasobra e conexion entre e nanishi y e horea meymey (e tubo di Eustakio) ta cera.

E tubo aki, mescos cu e nanishi, ta cubri pa un flishi di slijm (mucosa). Ora cu e flishi di slijm aki hincha pa motibo di verkoud, e slijm produci eyden no tin caminda pa sali. Esaki ta pone presion riba e horea y e ta ocasiona dolor.

Despues di un par di dia e flishi di slijm (mucosa) ta baha atrobe, anto e slijm acumula ta haya caminda pa sali. Tin biaha tin bacteria ta acumula den e slijm.

E kehonan no ta pasa e ora ey. Frecuentemente tin un likido vies ta sali via e nanishi. E slijm acumula den e horea por kibra sali door di e tambu di horea.

E ora ey ta papia di un horea cu ta core. Den algun caso e infeccion ta manifesta su mes apenas ora pus sali for di e horea. E ora ey bo por haya un mancha geel riba bo cusinchi.

Generalmente no ta necesario pa trata infeccion di e horea meymey cu antibiotico. Mayoria di biaha e ta pasa di mes.

CUIDO PROPIO:

LOKE BO MES POR HACI

Tin biaha bo por haya alivio door di pone bo cabes un tiki mas halto riba cama. Bo por, particularmente tambe prome cu bo bay drumi, uza gota pa tira den nanishi cu bo por haya na botica sin recept (mira e capitulo “Remedi”). Bo por alivia e dolor tumando un remedi contra dolor (mira e capitulo “Remedi”).

CERCA MUCHA

Si e mucha tin e tendencia di haya infeccion di e horea meymey, bo por evita esaki den caso di verkoud, dunand’e gota pa tira den nanishi (mira e capitulo “Verkoud”).

Tambe bo por dun’e un remedi contra dolor, por ehempel, Paracetamol pa mucha. Percura pa anochi e cabes di e mucha keda mas halto cu e resto di su curpa.

TUMA CONTACTO CU BO DOKTER DI CAS

• Si bo tin dolor di horea, sea cu of sin keintura, cu no ta pasa despues di a tuma un remedi contra dolor.
• Si bo horea cuminsa core, aunke ya e dolor a pasa.

CERCA MUCHA

Si e mucha, a pesar di adun’e remedi, despues di mita dia ainda tin dolor di horea fuerte.

• Si e mucha, despues di tres dia, ainda tin dolor di horea leve.
• Si e mucha su horea cuminsa core.
• Laga dokter controla e mucha, si bo tin e suposicion cu e tin infeccion den su horea, pero e mucha ta mucho chikito pa e mes laga sa esey.
• Ora cu tur rond di e horea ta haci dolor.

Haci un afspraak cu dokter pa controla despues con skerpi e mucha su oido ta ainda.

TUMA CONTACTO CU BO DOKTER DI CAS INMEDIATAMENTE

CERCA MUCHA

• Si e mucha tin un horea cu ta core y e dolor ni/of e keintura no ta baha.
• Si e mucha bira suf.

Dolor di lomba generalmente ta ocasiona pa cram (calamber) den e musculonan cu ta manifesta su mes den un sintimento stijf. Esaki por ta consecuencia di sobrecarga, hisa un cos robes, friu of di mantene un posicion robes pa tempo largo, por ehempel na trabou (den caso di un stoel mucho halto of mucho abou) of di drumi riba un corchon mucho moli. Banda di esey tambe tension si kico (mental) por tin influencia riba e sistema muscular. Den caso di dolor di lomba repentino pa motibo di un movemento ‘robes’, ta papia di “spit” of lumbago. Despues di un dos dia e dolor generalmente ta bira menos.

Un otro posibel causa di dolor di lomba ta un hernia. Esaki ta un hinchamento of salimento di luga di un disco intervertebral (e disco moli cu tin entre dos vertebra den e weso di lomba) cu ta primi riba un nervio. E ora ey e dolor por pasa bay pa otro luga: den caso di dolor abou na e lomba, e por pasa bay pa e chanchan y e pianan; den caso di dolor den cercania di e nek, e por pasa bay pa e brasanan.

Durante pubertad, pa motibo di crecemento, por surgi desviacion den e vertebranan y den e structura di weso. Esaki por causa dolor. Mayoria di biaha dolor di lomba cerca hende jong ta ocasiona pa motibo di demasiado movemento mucho intensivo.

Otro posibel causa por ta sobrepeso.

CUIDO PROPIO:

LOKE BO MES POR HACI

Solamente ora cu e dolor a surgi agudamente (esta, diripiente) y ta hopi fuerte, mayoria di biaha bo por tene cama te un par di dia, si ta necesario. No keda drumi riba cama pa hopi tempo largo, sino bo musculonan ta bira stijf. Un kruik poni na e luga cu ta haci dolor ta un experiencia agradabel pa hopi hende. Eventualmente bo por tuma un remedi contra dolor (mira e capitulo “Remedi”). Si bo sa haya dolor di lomba regularmente, anto bo mester investiga cua ta causa di esaki. Si e dolor, segun bo, tin di haber cu bo trabou, delibera cu bo dunado di trabou, si por haci algo pa remedi’e.

Si bo tin e impresion cu ta tension mental tin influencia den esaki, bo por considera pa haci ehercicio di recreacion, por ehempel Yoga y/of Tai-Chi. Hacimento di sport. particularmente landamento, ta fortifica e musculonan di barica y di lomba. Semper cuminsa haci sport cu ehercicio di calentamento (warming up). Esaki par evita lesion den bo lomba. Mantene bo peso abou.

TUMA CONTACTO CU BO DOKTER DI CAS

• Si e dolor pasa bay pa un of tur dos brasa of pia.
• Si e dolor persisti pa mas di un siman.
• Si regularmente bo ta haya dolor di lomba sin cu tin un causa evidente.
• Si bo tin e sintimento cu bo chanchan ta “doof”.
• Si bo tin e sintimento cu bo brasa-nan y/of bo pianan ta “doof”.
• Si e dolor (tambe esun den bo pianan) bira pio ora bo tosa, pers (puha) of nister.
• Si bo experencia perdemento di forsa den un of den tur dos pia.

Ora bo tin inflamacion di blaas, bo ta haya bo ta orina hopi y bo ta sinti kimamento. Tin biaha e orina tin un holo fuerte. Bo ta haya inflamacion di blaas ora cu bacteria penetra den bo blaas. Hende muhe ta haya inflamacion di blaas mas frecuentemente cu hende homber, pasobra nan canal di orina ta mas cortico.

CUIDO PROPIO:

LOKE BO MES POR HACI

Bo por evita inflamacion di blaas te na cierto medida y te hasta cur’e tin biaha, door di bebe hopi awa/likido. Sacamento di e likido door di orina ta spula e blaas hacie limpi. Pesey bo no mester wanta bo orina. Bay toilet mesora cu bo sinti gana di orina. Purba orina prome cu bo bay drumi. Orina semper despues di relacion sexual. Un kruik cayente riba bo barica ta mengua e dolor.

TUMA CONTACTO CU BO DOKTER DI CAS

• Si bo ta supone cu bo tin inflamacion di blaas cu no a pasa despues di un dia.
• Si bo ta kere cu tin sanger den e orina.

Eccema ta un nomber general pa diferente malesa di cuero. E sintomanan mas caracteristico ta grawatamento, biramento cora y cascamento di e cuero. Tin biaha bo por mira blaar chikito yen di awa of cu awa ta sali for di nan. Eccema por aparece riba henter nos curpa.

Un posibel causa di eccema ta hiper-sensibilidad pa cierto substancia (alergia). Hopi biaha ta masha dificil pa averigua cua substancia ta e causa exactamente. Tension emocional por haci eccema flama mas. E disposicion pa haya eccema por ta hereditario.

Eccema den bo man por ta consecuencia di trahamento frecuente cu awa of di uzo di detergente (likido) of habon.

CUIDO PROPIO:

LOKE BO MES POR HACI

Purba averigua kico lo por ta e causa cu bo ta haya eccema. Si regularmente e ta presenta, averigua si esaki ta sosode pasobra bo a drenta den contacto cu cualke substancia na cas, na trabou of cualke otro caminda.

Tene e cuero seco vet cu un crema neutral sin perfume. Pa tratamento di eccema cerca mucha por haya diferente producto cu por tira den e awa pa baña.

No uza habon, specialmente no riba e luganan cu bo tin eccema. Habon ta kita e capa di vet protector cu e cuero ta produci. Baña cu awa lauw, pero no tur dia. Djis dep e serbete riba bo cuero, ora bo ta seca bo curpa. No frega riba dje! Seca e plooinan den bo cuero y tambe meymey di bo tenchinan bon.

TUMA CONTACTO CU BO DOKTER DI CAS

• Si despus di un siman, e molester no a mehora cu e medidanan menciona.

Fret ta bulto chikito cu parce cayo riba cuero di hende; nan superficie no ta liso. E causa di nan ta un infeccion di virus di e cuero. Nan ta masha poco contagioso.

Generalmente nan ta disparce di mes.

Bo mester tene masha hopi pasenshi si, pasobra tin biaha esaki por dura masha hopi aña mes.

CUIDO PROPIO:

LOKE BO MES POR HACI

Den tratamento di fret pasenshi ta e miho sistema di curamento. Sinem-bargo, si nan ta riba bo man of riba bo cara, por ta hopi dificil pa carga e pasenshi ey. Purba e ora ey cualke remedi contra fret cu bo por haya den comercio.

TUMA CONTACTO CU BO DOKTER DI CAS

• Si bo no por logra kita e fret(nan).
• Si un fret cambia di colo of cuminsa sangra.

Sinus ta e espacionan bashi patras di e nanishi den e cachete di ariba y den e frenta. Nan ta cubri cu e mesun sorto di flishi di slijm (mucosa) cu e espacio nasal.

E sinusnan ta den contacto cu e nanishi pa medio di canal masha smal. Pa motibo di hinchamento di e flishi di slijm ora di verkoud, e canalnan aki por keda verstop. E slijm den e espacio no por sali e ora ey.

E ora ey bo ta sinti un dolor presionante banda di bo nanishi of den bo frenta. Bo por haya dolor den e sinusnan sin cu bo tin niun infeccion. Esey ta e caso ora bo tin verkoud. E ora ey bo no tin keintura.

Tin biaha tin un infeccion den e espacio cera. Esaki ta sinusitis. E ora ey bo ta haya keintura y e dolor ta bira pio. Bo ta haya dolor si bo kauw of si bo baha bo cabes padilanti. Bo ta sinti comosifuera bo djentenan a bira demasiado largo. Bo por perde sinti

di hole y di smaak.

CUIDO PROPIO:

LOKE BO MES POR HACI

E cos mas importante ta percura pa e slijm por sali for di e cavidad cera. Bo por uza gota pa nanishi cu por haya sin recept na botica (mira e capitulo “Remedi”). Tambe bo por spula cu awa

salo.

Un otro tratamento ta inhala vapor. Bo ta haci esaki door di inhala e vapor cu ta sali for di un comchi di awa herbi cu bo cabes tapa cu un serbete. Bo por agrega gota di mentol na e awa.

Supla tur dos e buraconan di nanishi apart, sin primi e nanishi.

TUMA CONTACTO CU BO DOKTER DI CAS

• Si e tratamento menciona no yuda den transcurso di un par di dia.
• Si bo tin keintura y dolor den bo frenta of rond di bo wowonan.

Mayoria di muhe normalmente ta saca un segregacion minimo sin holo for di nan vagina. Si tin hopi segregacion y esaki ta ocasiona grawatamento of ta hole fuerte, esaki ta masha incomodo. E likido vaginal tin un grado halto di zuur. Esey ta e defensa natural contra micro-organismo, manera bacteria, beskem y yis.

Si e likido bira menos zuur, e organis-monan ey por expande nan mes, loke por resulta den molester. E biramento menos zuur por tin un causa fisico, manera menstruacion of menopausa. Pero tambe por tin causa externo, manera un higiena excesivo, pa motibo di ta laba meymey di e lipnan di vagina hopi cu habon y cu demasiado forsa.

Paña mucho pega na curpa of mucho poco cambiamento di tampon of di Kotex durante menstruacion por ocasiona e molesternan aki. Tambe bo partner por pasa e bacteria of e beskem ey pa bo, sin cu e mes tin ningun molester di dje.

Uzo di antibiotico por tin influencia riba segregacion. (Antibiotico no solamente ta mata e bacterianan dañino, sino tambe esunnan cu nos curpa mester pa por funciona bon.) Si e segregacion ta blanco y clompi clompi y e ta grawata, anto ta un yis ta e causa.

Si e segregacion ta geel of berde, anto probablemente ta trata di un infeccion door di un otro causa.

CUIDO PROPIO:

LOKE BO MES POR HACI

No uza Kotex of tampon pa mas tempo cu ta necesario. Tampon ”lubida’ ta causa di basta problema caba. Pa motibo di bacteria por surgi un infeccion, e asina yama ‘malesa di tampon’.

Uza por lo menos 4 bes pa dia un tampon limpi y paga tino pa sac’e tambe. Laba bo curpa di abou tur dia, pero no uza habon den bo vagina, solamente na e parti pafo.

Laba bo curpa di padilanti bay patras cu habon sin perfume. Si bo tin molester regularmente, anto bo mester consulta bo dokter.

Ora di relacion sexual, bo por traspasa e micro-organismonan pa bo partner, sin cu e ta haya molester di nan. E tambe ta contagia y e, na su turno, por bolbe traspasa nan pa bo. Pesey mester envolve bo partner den e tratamento. Ta recomendabel pa uza un condon te ora e molester disparce completamente.

TUMA CONTACTO CU BO DOKTER DI CAS

• Si bo ta supone cu bo tin un malesa di caya (malesa venerico).
• Den caso di segregacion scur of cu ta hole fuerte.
• Si bo tin keintura y dolor den bo curpa di abou.
• Si bo tin grawatamento fuerte y persistente.
• Si e kehonan no pasa despues di 1-2 siman.

Hopi biaha mucha chikito no tin gana di come, ora nan ta malo. No keda insisti. Duna nan mas co’i bebe y cuminda medio solido, manera yoghurt, Yello, sopi y of fruta. Pa dolor di musculo bo por duna nan Paracetamol pa mucha.

TUMA CONTACTO CU BO DOKTER DI CAS

CERCA MUCHA

• Si e keintura no a baha despues di cuater dia.
• Si e mucha no kier bebe nada.
• Si e mucha cuminsa saca.

TUMA CONTACTO CU BO DOKTER DI CAS INMEDIATAMENTE

CERCA MUCHA

• Si e mucha tin problema cu halamento di rosea: e ta hala rosea lihe, e ta hap buscando aire.
• Si bo ta kere cu e tin dolor ora e hala rosea.
• Si e ta slap.
• Si e ta suf of tur bruha.
• Si e no reacciona ora bo papia cu ne of si e no ta worry cu e hende-nan rond di dje.
• Si e ta saca of no kier bebe nada of tin habrimento di barica.
• Si e no por sinta recht of si e no por dobla su cabes padilanti.

Bo por papia di habrimento di barica (diarea) ora cu bo bay af awa 3 of mas biaha pa dia. Tin biaha baby ta pupu awa normalmente diferente biaha pa dia. Frecuentemente diarea ta bay pareu cu sacamento y/of keintura. Ademas di likido, bo ta perde salo tambe. Door di esey bo ta bay sinti bo slap.

Diferente infeccion di virus of cuminda putri por ocasiona habrimento di barica. Particularmente cu hende bieu y cu mucha chikito bo mester ta masha alerto pa deshidratacion door di perdemento di likido. Specialmente ora ta trata tambe di perdemento di likido pa via di sacamento, sodamento y keintura.

CERCA BABY

Habrimento di barica cerca baby bo ta reconoce na e cantidad di biaha cu e ta pupu y na e pupu cada bes mas awa. Cerca baby esaki por sosode masha lihe y por conduci mesora na un situacion peligroso, particularmente si e baby ta saca tambe of ta soda y no kier bebe nada.

CUIDO PROPIO:

LOKE BO MES POR HACI

E cos mas importante ta pa recupera e likido cu a perde. No bebe bebida cu ta contene gas/acido carbonico (p.e. refresco). Evita producto lacteo (di lechi) cu sucu. Bebe te slap of buyon.

Ora bo tin hopi diarea, e miho manera pa por complementa perdemento di salo tambe ta cumprando ORS (Oral Rehydration Solution). Esaki ta un mescla di salo cu glucose (sucu) cu por haya cumpra na botica bou di diferente marca registra. Pa haci e bebemento mas facil, bo por haya un solucion cu nan a agrega un smaak na dje. Ora ta trata di sacamento tambe, beb’e tiki tiki, pero masha hopi biaha tra’i otro si. Si e diarea bira menos, anto bo por tuma appel raspa, pisca gesmoor of carni sin vet cu pan tosta. Mayoria di biaha habrimento di barica ta masha contagioso.

Pesey laba bo man regularmente y desinfecta e toilet (tambe e parti abou di e bril di w.c.).

CERCA MUCHA DI MAS DI 1 AÑA

E cos mas importante ta pa recupera e likido cu el a perde. Pesey duna e mucha hopi co’i bebe. Te, eventual-mente cu glucose (sucu), y buyon ta hopi bon, tambe juice di appel. Si e diarea bira menos, bo por dun’e cuminda mas solido gradualmente. Cuminsa cu yoghurt.

Djey bo por cambia pa cuminda manera aros, wortel, carni sin vet y buscuchi.

Evita producto lacteo (di lechi) cu sucu y bebida cu ta contene gas/acido carbonico (p.e. refresco). Ta impor-tante pa, despues di a haci e mucha limpi, laba bo man bon. Si e mucha ya por bay toilet e mes, bo mester limpia e toilet (no lubida e parti abou di e bril di w.c.).

CERCA BABY

Ora cu entre 2 cuminda e diarea no stop, avisa bo dokter di cas! Mientras-tanto bo ta sigui e siguiente conseho: Si bo ta duna e mucha pecho, sigui dun’e numa. Stop tur otro cuminda, manera cuminda di fruta, berdura, pan etc. Dun’e ORS (pag 41). Esaki ta cu e intencion di complementa e likido cu el a perde. Duna e baby esaki mes tanto cu e kier, despues di cada biaha cu e pupu awa.

Si bo ta dun’e boter, stop cu ne y dun’e e bebida pa rehidrata (ORS). manera describi mas dilanti. No dun’e niun otro cuminda.

TUMA CONTACTO CU BO DOKTER DI CAS

• Si bo tin keintura tambe.
• Si bo ta supone cu bo tin un intoxicacion di cuminda of un intoxicacion of infeccion cu bo a haya den exterior.

CERCA MUCHA DI MAS DI 1 AÑA

• Si e problemanan no a pasa despues di 2 dia.

TUMA CONTACTO CU BO DOKTER DI CAS INMEDIATAMENTE

• Si tin sanger den e sushi.
• Si e mucha ta suf of ta tur bruha.

CERCA BABY

• Si e mucha despues di 2 cuminda ainda tin diarea.
• Si e mucha no kier bebe nada.
• Si e mucha ta saca tambe.
• Si e mucha tin keintura tambe.
• Si e sushi tin colo cora.

Nota: Den caso di habrimento di barica mientras ta uzando pildo contra embaraso, mester tene cuenta cu e ora ey e pildo no ta proteha mucho bon mas.

Bo por tin wowo cora pa motibo di un infeccion causa pa bacteria of pa virus. Esaki yama conhuntivitis (wowitis). E parti paden di e klep di wowo ta cora e ora ey y e cora ey ta plama su mes riba e blanco di wowo. Wowo cora y/of cu ta kishiki por wordo causa tambe pa hipersensibilidad, manera pa polen (di yerba, mota y palo y keintura di polen (hay-fever)). Tambe bo por haya wowo cora si cualke obheto of material straño cay den e wowo.

Wakmento den e rayonan di welder of uzamento di un lampi di rayo ultraviolet sin proteha e wowonan ta peligroso (conhuntivitis / wowitis acti-nico). Un inflamacion di wowo den profundidad di e wowo tambe por ocasiona wowo cora y dolor.

CERCA MUCHA

Wowo inflama ta presenta hopi biaha hunto cu verkoud. E malestar mayoria di biaha ta inofensivo y ta disparce di mes. E inflamacion ta masha superficial. Si e wowo ta saca hopi mekemeke, anto esaki por indica riba un infeccion door di bacteria.

CUIDO PROPIO:

LOKE BO MES POR HACI

Si bo bay bou di un lampi di rayo ultraviolet, semper bo mester bisti un bril di proteccion. Si cualke material cu ta pica cay den bo wowo, anto mesora bo mester laba bo wowo cu un gran cantidad di awa y djey bay Poli (Prome Auxilio) mesora. Si bo ta supone cu tin algo den bo wowo, semper bo por purba sac’e cu awa.

CERCA MUCHA

Limpia e wowonan cu awa herbi cu a fria of cu caneblum. Hopi biaha e cabey di wowo ta pega riba otro. Kita e mekemeke poco poco cu un pida catuna muha. Bo por limpia e parti paden di e klep di wowo di abou trankilamente cu un catuna muha. Trek e klep di wowo un tiki abou y pasa e catuna for di e band’i pafo pa e nanishi. Hamas uza catuna seco den e wowo, pasobra ta keda drachi di e catuna den e wowo. Semper uza un pida catuna muha of un gasa.

TUMA CONTACTO CU BO DOKTER DI CAS

• Si bo ta supone cu ta hipersen-sibilidad ta ocasiona e iritacion.
• Si tin mekemeke ta sali for di e wowo.

CERCA MUCHA

• Si e cora y e segregacion dura mas di dos dia.

TUMA CONTACTO CU BO DOKTER DI CAS INMEDIATAMENTE

• Si bo ta kere cu bo tin un obheto den bo wowo cu bo mes no por laba saca afo.
• Si bo tin dolor den bo wowo of si bo tin conhuntivitis/wowitis actinico.

CERCA MUCHA

• Si e wowo ta asina cora cu bo no por mira e blanco di wowo mas.

Bou di keintura nos ta compronde un temperatura di curpa di mas cu 38,5°C, cerca mucha 38°C. Keintura riba su mes no ta un malesa. Ta un reaccion natural di curpa humano ora cu causante di malesa, manera virus y bacteria, haci nos malo. Nos mecanismo di defensa ta traha miho, si nos temperatura ta mas halto.

Pesey no ta recomendabel pa semper combati cualke keintura mesora automaticamente cu aspirin of remedi similar. E miho caminda pa midi temperatura ta den e ano. Baha e thermometer di antemano te 36˚C y tene pa 2 minuut den e ano. Di antemano pone un tiki crema na e punta di e thermometer.

CERCA MUCHA DI MAS DI 1 AÑA

E grado di e temperatura ta menos importante cu e conducta di e mucha. Si e mucha ta hunga trankil di dje y ta reacciona normalmente, anto no tin mucho problema. Ora e mucha ta sin smaak, suf of tur bruha -hasta cu keintura leve of sin keintura-, anto

e por ta gravemente malo.

• Steipi di keintura

Den caso di keintura cu ta subi rapidamente, e mucha por haya steipi di keintura. E ora ey e no ta papia, e ta haya djimbi y ta drey su wowonan.

E atake aki mayoria di biaha ta dura un par di minuut so. Djey e ta pega soño.

Si e ta na soño, su halamento di rosea ta normal. Den caso cu el a cay flauw, e halamento di rosea ta pisa y bo por tend’e esey. No laga bo yiu durante un atake nunca su so.

Durante un steipi di keintura pone e mucha drumi stabiel riba su zij of boca ‘bou, cu e cabes abou y di banda, mira tambe ‘prome auxilio simpel’.

CUIDO PROPIO:

LOKE BO MES POR HACI

Bebe hopi awa. Ora bo tin keintura, bo ta perde hopi likido. Mester recupera esaki. Si bo ta sinti necesidad di keda riba cama y e camber ta friu, uza dekel. Si e camber ta calor, anto uza un solo laken. Un camber fresco y cu bon ventilacion ta preferibel.

Trankilamente bo por dal un douche diferente biaha.

CERCA MUCHA DI MAS DI 1 AÑA

Perdemento di likido door di sodamento pa motibo di keintura ta trece mas riesgo cu ne pa mucha cu pa hende grandi (mira e capitulo “Habrimento di barica/Diarea”).

Pesey percura pa nan haya suficiente co’i bebe. E mucha no mester keda den cama. Bisti e mucha cu paña fini y lag’e keda den un camber cu temperatura normal. Ora e mucha ta tur nervioso/desorienta, eventual-mente bo por dun’e Paracetamol likido of, si e no por guli facilmente, pone un supositorio (zetpil).

Den caso di keintura halto, pasamento di un spons cu awa Iou riba su curpa ta duna alivio. Si e mucha soda, esey kier men cu e ta mucho diki bisti; si e ta tembla, kier men cu ta mucho friu p’e.

TUMA CONTACTO CU BO DOKTER DI CAS

• Si, despues di un par di dia cu temperatura normal, e keintura bolbe subi.
• Si e keintura no baha denter di un par di dia y bo no sa cua ta e causa di e keintura.

CERCA BABY

• Si e mucha ta bebe suficiente likido, e no tin niun otro sintoma cu keintura y esaki no baha despues di dos dia.

TUMA CONTACTO CU BO DOKTER DI CAS INMEDIATAMENTE

• Den caso di un temperatura di mas di 40˚C
• Si bo nek ta stijf of si bo ta saca. Bo nek ta stijf ora bo no por dobla bo cabes padilanti.
• Si bo ta sinti bo sin smaak of no por concentra.
• Den caso di keintura despues di a caba di bishita cualke otro pais tropical.

CERCA MUCHA DI MAS DI 1 AÑA

• Si e mucha ta tur bruha of suf, sin tene cuenta cu e temperatura di e mucha.
• Den caso di steipi di keintura.
• Si e mucha ta saca.
• Si bo ta kere cu e mucha tin dolor.
• Si e mucha ta sinti benauwd.
• Si e mucha tin sintoma di meningitis: dolor di nek of dolor ora e dobla su cabes y sacamento.
• Si e mucha, hunto cu e keintura, tambe tin habrimento di barica of ta saca of no kier bebe nada.
• Anto mester avisa dokter denter di 24 ora!!

CERCA BABY

• Ora cu e fontanel (esey ta e pleki moli riba su cabes) ta gespan (e la bira bol).
• Ora cu e baby ta keha, si bo hisa su pianan, ora bo hacie limpi.
• Ora cu e baby ta saca y/of casi no ta bebe y/of haya habrimento di barica.
• Den caso cu e haya steipi.

Dependiendo di e gravedad di e kemadura, ta haci tres distincion.

• Kemadura di prome grado: e daño ta superficial y e cuero ta cora.
• Kemadura di di dos grado: e daño a penetra mas profundamente y ta causa formamento di blaar. E cuero ta hopi dolor.
• Kemadura di di tres grado: e daño a penetra te na tur capa di cuero. E cuero ta blanco of kima preto y ta menos sensibel of, te hasta, completamente insensibel.

CUIDO PROPIO:

LOKE BO MES POR HACI

Fresca e cuero inmediatamente si ta superficie chikito bou di cranchi y si ta grandi, bou di douche of den badkuip. Si bo no tin esaki na man, improvisa cu comchi, hemchi of kico cu ta.

Mantene esaki pa por lo menos 20 minuut. Kemadura di prome grado ta cura mas miho den aire liber. Pesey, no tapa nan cu verband, pleister of unguente. No puy/prik nan kibra, sino laga nan henter. Si acaso nan kibra toch, anto e ora ey si tapa nan cu verband steriel of cu verband rapido, pa sushi of bacteria no bay den e herida.

TUMA CONTACTO CU BO DOKTER DI CAS INMEDIATAMENTE

• Si bo tin kemadura di di dos grado den bo cara, riba bo man, brasa of pia.
• Si surgi infeccion riba e partinan cu kemadura.
• Den caso di kemadura di di tres grado.

Generalmente kemadura di solo ta un kemadura di prome grado, como consecuencia di demasiado luz directo di solo. E ora ey ta trata unicamente di un cuero cora y dolor. Tin biaha tin kemadura di di dos grado. E ora ey tin blaar tambe. Den caso di kemadura hopi grave (por ehempel, si un hende a pega soño den solo cayente) por surgi un situacion di shock y cu menasa di morto. E ora ey bo ta haya un infeccion den e cuero cu formacion amplio di blaar. Bo ta sinti bo malo. Consulta cu bo dokter di cas inmediatamente.

Considera, ademas, cu tumamento exagera di solo ta haci bo cuero bira bieu lihe. Y tambe e riesgo di haya cancer di cuero ta aumenta.

CUIDO PROPIO:

LOKE BO MES POR HACI

E cos mas importante ta pa evita kemadura di solo. No bay sinta di biaha pa hopi ora den solo, si bo cuero no ta custuma cu esey. Aumenta esaki poco poco.

Cuminsa cu maximo mey ora y si bo tin un cuero sensibel, hasta mas cortico. Uza na cuminsamento un producto contra kemadura di solo cu un factor di proteccion halto. Si acaso bo kima toch, pero bo no tin mucho molester di dje, no haci nada, pero no bay den solo.

Como cu e “kimamento” ta sigui toch, tambe ora bo no bay den solo, un baño cu awa friu por yuda evita mas daño. Contra e dolor bo por tuma eventual-mente un remedi contra dolor, manera Paracetamol. Mantene bo cuero cu vet riba dje.

TUMA CONTACTO CU BO DOKTER DI CAS

• Si partinan grandi di bo curpa a haya kemadura.
• Si bo haya blaar.
• Si ta baby of mucha chikito a haya kemadura di solo.

TUMA CONTACTO CU BO DOKTER DI CAS INMEDIATAMENTE

Den caso cu bo tin tambe un of mas di e sintomanan aki:

• calafriu
• sintimento ral
• sacamento
• keintura
• hartklop/batimento di curason

Pa motibo cu bo ta respo zuur, bo por sinti un kimamento den e parti mas ariba di bo stoma y den bo corocoro. Tin diferente causa pa esaki. Por ta cu e klep di stoma (e entrada cu tin entre e stoma y corocoro) no ta traha bon. Esaki ta sosode den caso di un asina yama breuk (hernia) na stoma.

Un breuk na stoma por origina ora cu e buraco den bo diafragma, caminda e corocoro ta pasa, ta mucho hancho. Otro posibel causa di kimamento di stoma y dolor di stoma ta ulcera (di stoma), infeccion di e flishi di slijm (e mucosa) of e uzo di cierto medicina, particularmente aspirin y e asina yama remedinan contra reumatismo.

E sintomanan por bira mas grave pa motibo di tension, stress, humamento of alcohol.

CUIDO PROPIO:

LOKE B0 MES POR HACI

Respeta bo stoma. No uza koffie, producto di tabaco ni alcohol. No come cuminda pica. Come cu frecuencia, pero tiki tiki. Come entre e cumindanan buscuchi cu te slap. Kauw e cuminda hopi bon. Evita remedi cu por irita bo stoma (bou di esakinan e.o. remedinan contra dolor).

Controla si stress por ta un di e causanan (mira e capitulo “Stress”). Drumi na tempo. Bo por cumpra remedi cu ta neutralisa kimamento di stoma na botica.

TUMA CONTACTO CU B0 DOKTER DI CAS

• Si regularmente bo tin dolor di stoma.
• Si bo ta birando flaco.
• Si bo a perde apetit.
• Si, a pesar di medida di dieet, e kehonan dura mas di 2 siman.

TUMA CONTACTO CU B0 DOKTER DI CAS INMEDIATAMENTE

• Den caso cu bo saca sanger.
• Den caso cu bo sushi ta preto.

Dengue

Dengue ta un malesa transmiti pa e sangura “Aedes aegypti”. Ora cu e sangura, infecta cu e virus di dengue, pica bo, bo por keda contagia cu un di e cuatro tiponan di dengue. Pa e motibo aki bo por keda contagia mas cu 1 biaha.

Tene cuenta cu

• Uzo di aspirin ta contra indica.
• Uzo di fruta citrico, manera apelsina, lamunchi y grapefruit. Motibo ta cu nan ta haci e sanger awa y esaki por tin como consecuencia sangramento interno.
• Mester bebe hopi likido, preferible-mente awa.
• Por bebe Calpol/Paracetamol pa dolor.
• Mester tuma sosiego.

PA PREVENI DENGUE:

• Controla bo camber riba sangura.
• Uza repelente of insecticida.
• Bisti carson y camisa manga largo, si bo tin hopi molester di sangura.
• Drumi bou di un muskitero.
• Controla rond di cas y den cas si tin recipiente cu awa aden. E sangura ta pone su webo, por ehempel, den hemchi, bleki, taira, florero etc. cu awa para.
• Por yama “Gele Koorts en Muskiet Bestrijding”, ora bo tin hopi molester di sangura, pa nan controla si tin e sangura cu ta transmiti Dengue.

TUMA CONTACTO CU BO DOKTER DI CAS

• Si bo tin 2 of mas di e siguiente
• sintomanan:
• Keintura di mas cu 38,5°C
• Dolor patras di bo wowo.
• Erupcion (Uitslag) riba bo curpa.
• Diarea di mas cu 3 bes pa dia.
• Sangramento di carni di djente.
• Dolor di weso of joint.
• Dolor di curpa.
• Malestar general.

TUMA CONTACTO CU BO DOKTER DI CAS INMEDIATAMENTE

• Si bo tin pleki blauw (hematoma).
• Si bo tin sanger den bo saca.
• Si bo tin sanger den bo sushi.
• Si bo tin sanger den bo orina.
• Si bo tin sangramento di nanishi.

No tin vacuna

contra Dengue!

Tin masha hopi malesa cu ta duna mucha mancha riba curpa. Mayoria di nan ta inofensivo y ta pasa di mes. Danki na nos bon programa di vacunacion tin un cantidad di malesa di mucha cu casi no ta existi mas na nos isla. Tin un cantidad di malesa di mucha hopi frecuente pa cualnan no tin vacunacion. Mayoria di nan ta ocasiona pa un virus. Bo no por preveni nan y no tin tratamento pa nan tampoco.

Bruela

Bruela ta duna un erupcion cu grawatashi cu blaar chikito y keintura leve. E erupcion ta expande su mes di e torso pa brasa y pia. E blaarnan por aparece te hasta na e boca y e wowonan.

Despues di algun dia e blaarnan ta seca. Masha contagioso, te ora cu tur blaar seca. Den caso di bruela, mucha no mester keda na cama. Nan mester keda paden si.

Roodvonk

Roodvonk ta cuminsa cu dolor di garganta, sacamento y keintura. Mesora despues of na e mes momento ta aparece mancha chikito tur caminda, menos rond di e boca. Prome e lenga ta bira blanco pa cambia bira cora y hincha mas o menos 3 dia despues (lenga di framboos). Despues di 2 te 3 siman e cuero ta haya manera scama (na planta di man y di pia). Duna sosiego segun cu tin mester. Pa roodvonk generalmente ta prescribi antibiotico.

Di cinco malesa/erythema infectiosum

E asina yama ‘di cinco malesa’ ta cuminsa generalmente cu ‘band’i cara rondo y cora manera appel’. Djey e ta extende pa brasa y pia. E manchanan ta mescla cu otro y e ora ey nan ta parce un mapa caprichoso. E manchanan por keda pa varios siman. Por lo demas no tin otro sintoma di malesa grave.

Di seis malesa/exanthema subitum

E malesa aki ta existi specialmente y frecuentemente cerca mucha bou di 3 aña. Mayoria di biaha entre e prome y e di dos aña di bida. E ta cuminsa

generalmente cu 3 dia di keintura halto (39-40°C), sigui pa un dia sin keintura.

Djey ta brota mancha chikito, ros y rondo. Nan ta cuminsa den cara y despues nan ta extende pa brasa cu pia. Tin biaha bo ta haya klier (hincha) na garganta y riba nek. E malesa aki, mescos cu e otro malesanan di mucha, ta general mente inofensivo y ta cura di mes.

CUIDO PROPIO:

LOKE BO MES POR HACI

No laga e mucha grawata e erupcionnan, pa motibo di e chens di haya infeccion y formamento di cicatriz. Uza den caso di grawatashi un mescla di puiro di mental (puntra bo boticario). Corta e mucha su huñanan cortico cortico. Laba su man un par di biaha pa dia. Ora e muchanan no ta suf ni sin smaak mas, nan por baha fo’i cama y ora cu e keintura disparce, nan por bay pafo atrobe tambe.

TUMA CONTACTO CU BO DOKTER DI CAS

• Ta bon pa laga bo dokter di cas controla mucha cu tin mancha cu bo no sa di kico nan ta, pa stipula un diagnostico.
• Si denter di un par di dia e keintura bolbe subi of no ke baha.

TUMA CONTACTO CU BO DOKTER DI CAS INMEDIATAMENTE

• Den caso cu e mucha tin mancha blauw cora of blauw biña cu no ke kita.
• Den caso cu e mucha no reacciona ora bo papia cu ne of si e no ta worry cu e hendenan rond di dje.

E sangramento cu hende muhe ta haya cada luna (tambe yama menstruacion of regla) ta un fenomeno normal durante un fase largo di nan bida. Un tiki cram den barica y perdemento di sanger vaginal ta e sintomanan conoci cu despues di algun dia ta pasa di mes.

E edad cu mucha muhe ta haya nan menstruacion pa prome biaha ta varia entre e di 10 y e di 17 aña, cu un promedio di 13 aña. E prome biahanan e por ta doloroso y e ciclo hopi biaha ta iregular, esta, cu esun luna e sangramento por aparece ya despues di dos siman y e otro luna despues di cinco siman etc.

Algun hende muhe ta haya nan tambe cu e fenomeno cu nan ta irita lihe y cu nan ta haya peishi.

CUIDO PROPIO

LOKE BO MES POR HACI

Remedi contra dolor, manera Paracetamol y Advil, generalmente ta suficiente pa combati e dolor.

Nunca tuma aspirin, pasobra esaki por

haci e sangramento bira pio (en bes di stop e sanger, e ta hacie sigui core).

Hende muhe cu ta den nan periodo di madurez sexual (fertilidad) – for di e prome menstruacion te mas o menos nan di 45 aña – por cuminsa uza anticonceptivo, den caso cu nan no ta desea di haya yiu.

Un efecto mas di e uzo di anticonceptivo ta cu e ta disminui e sangramento mensual. Den caso cu un hende muhe cu ta sexualmente activo no haya su menstruacion, e por haci un test di embaraso na cas mes (e test ta obtenibel na tur botica).

TUMA CONTACTO CU BO DOKTER DI CAS

• Si e remedinan contra dolor no ta efectivo.
• Si e dolor bira mas fuerte cada luna.
• Si bo ta sangra masha hopi y pa un tempo demasiado largo.
• Si e regla keda sin bin pa varios luna sin ningun motibo evidente (por ehempel, a pesar di un test di embaraso negativo).

Hopi hende ta haya peishi, generalmente den pubertad y tin biaha hopi tempo despues. Peishi y spinia no ta consecuencia di mal higiena of un dieet robes.

Nan ta sali particularmente caminda tin hopi glandula di vet, manera den bo cara y riba bo lomba y bo pecho. Na cada cabey tin un glandula di vet. Un glandula di vet asina por verstop. Esey por sosode pa via di sushi of un prop di celula di cuero morto. E ora ey ta nace un spinia. Spinia por nace tambe door di funcionamento excesivo di e glandulanan di vet. Tin cierto bacteria cu ta gusta biba den e glandulanan di vet. Nan por yega eynan masha facil for di bo cuero. Si esey ta e caso, e glandulanan di vet ta infecta. E ora ey nan ta bira cora y ariba nan ta haya un cabes geel.

CUIDO PROPIO:

LOKE BO MES POR HACI

Laba bo cuero cu awa y, si e ta vet, cu un habon suave. Haci esaki un pa dos biaha pa dia. No cera bo porionan

huntando crema of puiro. Despues di limpia bo cuero bon, bo por primi e spinianan (comedon) cu un sacado di spinia, cu por cumpra na botica. Laba

bo mannan bon prome y limpia e luga cu mester trata cu alcohol. No primi peishi si nan ta cora of ta haci dolor; esaki ta empeora e infeccion y ta causa cicatriz. Si tin un cabes geel riba e peishi, e ora ey bo por habrie y primie poco poco cu un pida catuna cu yodo. Pa combati peishi tin remedi excelente cu bo por haya na botica (tambe sin recept). Den e remedinan aki tin peroxido di benzoil (benzoylperoxide). Tene cuidou pa bo no mancha bo paña: peroxido di benzoil ta blikia paña. Luz di solo, tratamento cu solarium of lampi di rayo ultraviolet tambe tin bon influencia. Cerca hende muhe y mucha muhe algun pildo anticonceptivo tin biaha tin un efecto faborabel (Bo no por haya e pildonan sin recept).

TUMA CONTACTO CU

BO DOKTER DI CAS

• Si e peishinan ta expande nan mes demasiado of si nan origina cicatriz.
• Si e peishinan ocasiona hincha-mento duro.
• Si bo ta considera uzo di pildo anticonceptivo pa evita acne hubenil.

Mayoria di pica di insecta ta inofensivo. Sin embargo, bo por core peliger directo masha bon. Esey ta e caso, por ehempel, si un maribomba of un bij pica bo riba bo lenga of na bo garganta. Esaki por sosode ora e insecta bula bay den bo boca of si bo hay’e accidentalmente den bo boca ora bo ta bebiendo algo.

Tambe bo por ta hipersensibel pa pica di maribomba of di bij. E ora ey no ta importa unda nan pica bo. Esaki semper por ta peligroso, esta, pa motibo di e reaccion fuerte di bo curpa. Reaccionnan cu ta indica tal hipersensibilidad ta:

• biramento malo
• hinchamento di lip y di klep di wowo
• grawatashi
• caymento flou
• problema cu halamento di rosea (atake di asma)

Carpata ta insecta cu ta pega nan mes den e cuero y cu ta alimenta nan mes cu sanger di hende of di bestia. Un mordi di carpata por ocasiona un infeccion, pa motibo cu e carpata ta contagia cu un bacteria.

E ora ey bo ta haya un infeccion di cuero rond di e carpata (sintoma: e cuero ta bira cora y bo ta haya keintura). Mester trata esaki cu antibiotico y mester ranca e carpata for di e cuero.

CUIDO PROPIO:

LOKE BO MES POR HACI

Mayoria di pica di insecto no tin mester di tratamento. Grawatashi iritante bo por trata cu un unguente refrescante cu ta obtenibel na botica, Ta miho pa no uza un unguente of crema cu ta contene un antihistarninico. Esey por causa hipersensibilidad y net esey ta causa grawatashi.

Den caso di un pica di maribomba, bet e pica cu binager. Den caso di un pica di bij, saca e puy sin primi e sakito cu veneno, uzando un pincet cu masha cuidou. Djey bo ta bet e cu amoniak dilui (cu awa).

Si tin un carpata pega, bo por kit’e huntand’e cu vaselin of cu manteca. Esaki ta corta su rosea obligand’e pa laga los. Esaki por dura basta ora si. No purba ranc’e afo sin mas. Esey por tin como consecuencia cu e curpa por kibra for di e cabes, haciendo mas dificil pa ranca e cabes for di e cuero.

TUMA CONTACTO CU BO DOKTER DI CAS

• Si bo no por logra saca e puy di bij of ranca e carpata.
• Den caso di un mordi di carpata, si e cuero rond di e mordi bira cora despues di algun dia of siman.

TUMA CONTACTO CU BO DOKTER DI CAS INMEDIATAMENTE

• Den caso di un pica di insecto riba bo lenga of na bo garganta (tambe parti pafo).
• Si bo ta hipersensibel pa pica di insecto.
• Si, despues di un pica di insecto, bo haya un atake di asma cu halamento di rosea cu ta piep.
• Si bo haya blaar of erupcion na otro parti di bo curpa cu caminda e insecto a pica bo.
• Si bo bira malo.

Pieu ta insecto chikito di 2 te 4 mm largo. Bo ta haya pieu den cabey, pega na e cuero di cabes. Aki particular-mente e pieunan muhe ta traha nan neishi. Nan ta pone webo di 1 mm grandi cu ta parce pipito chikito blanco. E webonan ta pega na e cabey. Te hasta e higiena di mas profundo no por preveni hayamento di pieu.

Kier men cu bo no mester haya berguensa pa motibo di pieu. Regularmente tin epidemia na scol y na otro luga caminda hopi mucha ta bin hunto. Generalmente pieu ta pasa di un hende pa otro door di contacto di cabes cu cabes. Un epidemia ta propaga su mes masha lihe.

Platleis ta un otro sorto di pieu. Esaki ta wordo transmiti door di contacto sexual.

Esaki no ta traha su neishi solamente den cabey pubico, sino tin biaha tambe den barba of bigoti y otro cabey di curpa. Despues di contagio por dura

1-2 siman prome cu bo cuminsa haya grawatashi.

CUIDO PROPIO:

LOKE BO MES POR HACI

Pieu ta masha contagioso. Pesey evita fiamento na of di otro hende di, por ehempel, pechi, skeiro y peña. Mantene bo cabey limpi. Tur sorto di pieu bo por combati na e mesun forma.

Na botica bo por haya lotion, shampoo y crema hopi efectivo. Sigui e instruccionnan di uzo minuciosa-mente.

Pieu por keda na bida dos dia, si nan no ta riba curpa di hende. Ta pesey ta consehabel pa laba tur lenso di cabes, pechi etc. cu hende a bisti, pero tambe peña y skeiro minuciosamente.

TUMA CONTACTO CU BO DOKTER DI CAS

• Si e pieunan no disparce despues di e tratamento menciona ariba.

Problema pa bay soño, lantamento fo’i soño trempan of regularmente den anochi por stroba un hende di sinti bon. E oro ey numa nos ta papia di

trastorno di soño. Necesidad di soño cerca hende sano ta varia di 5 te 9 ora.

Necesidad di soño ta baha general mente segun cu edad ta avansa. Hende mas bieu cu frecuencia ta drumi menos profundo y ta spierta mas lihe. Drumi malo un par di anochi no ta perhudicial pa bo salud. Mayoria di biaha hende cu ta bisa cu nan no ta drumi ta drumi masha bon, pero hopi leve.

Hopi biaha preocupacion y pensa riba tur sorto di cos ta causa problema cu drumimento. E temor cu bo no por drumi hopi biaha mes ta e causa cu bo

no por drumi dushi. Hende depresivo hopi biaha ta pega soño bon, pero nan ta lanta fo’i soño mucho trempan y nan tin problema pa bolbe pega soño,

CUIDO PROPIO:

LOKE BO MES POR HACI

No drumi den dia, si, pa via di esey, anochi bo ta drumi menos. Lanta tur dia na e mesun ora, esey ta yuda pa ahustamento di bo ritmo di den dia y di

anochi. No uza alcohol como medio pa drumi.

Ta berdad cu bo ta pega soño mas lihe, pero bo ta drumi leve y inkieto y bo ta lanta mas lihe fo’i soño. Tampoco no bebe koffie net prome cu bo bay drumi. Percura pa bo camber tin bon ventilacion y pa e no ta ni mucho cayente ni mucho friu. Pero na prome luga: no preocupa bo cu e cantidad di ora cu bo por bay ta na soño. Bo por tin suficiente cu sorprendentemente poco soño.

Preferiblemente no uza remedi pa drumi. Uza nan unicamente como excepcion. Remedi pa drumi no ta duna soño di berdad, sino cu nan ta zonza bo y, ademas, tin biaha nan por conduci bo na adiccion. Pa algun hende un cana anochi y/of un glas di lechi ta hopi beneficioso.

TUMA CONTACTO CU BO DOKTER DI CAS

• Si problema cu drumimento cuminsa domina y influencia bo bida diario.

Calidad ta costa placa. Sin embargo, no semper e cos mas caro ta esun miho y esun mas indica. Tampoco ora ta trata di remedi. Hopi biaha nan ta ofrece e mesun remedi bou di diferente marca (registra). E efecto ta igual, pero e prijsnan por varia enormemente. Abo y indirectamente comunidad tambe por spaar placa, si bo puntra bo dokter cua ta e remedi mas barata. No esun mas malo, sino esun mas barata

• Remedi por yuda combati malesa y sintoma di malesa, pero alabes nan por tin efecto secundario fastioso. Pesey, tuma of duna remedi unicamente ora ta absolutamente necesario.

• Algun remedi no ta bay cu otro. Cierto combinacion por causa reaccion indesea y te hasta peligroso. Pesey ta importante pa notifica un specialista of un dokter cua remedi bo ta uzando caba. Skirbi e nombernan den un buki di anotacion of riba un carchi. E buki of e carchi semper bo mester tin e cu bo.
• Tambe bo por pidi conseho na botica. Si bo ke uza remedi sin recept den combinacion cu otro remedi, consulta cu boticario si esaki no ta trece problema.

• Cierto medicina ta obtenibel sin recept. Ma esey no ta nifica cu nan ta inofensivo. Kier men cu bo no por uza nan sin limite. Cierto vitamina – A, B6, D, E y K – ta, por ehempel, te hasta dañino, si bo tuma mucho di nan. Si bo ta come saludabel y varia, abo no tin mester di extra vitamina ni mineral.

• Semper lesa e prospecto cu ta bin cu e remedi y sigui e instruccion-nan. Mantene bo mes na e dosis prescribi.

• Pa motibo cu nan tin menos peso (di curpa), mucha mester menos remedi cu hende grandi. Pesey, paga bon tino pa bo no duna nan di mas.

• Loke ta bon pa bo por ta peligroso pa un otro hende. Pesey, no hunga nunca dokter cu contenido di bo cashi di remedi. No fia ni duna un otro hende remedi cu ta destina pa bo. Tampoco si e otro persona ey tin ‘exactamente’ e mesun kehonan cu bo tin.

• Warda remedi den un ambiente seco y na un luga unda mucha no por yega.

• Bo por entrega remedi bieu na botica. Nunca bo no sa sigur si otro hende (mucha) por haya nan si bo djis tira nan afo. Ademas nan por daña medio ambiente.

Remedi contra dolor y remedi pa baha keintura

Remedi contra dolor por duna alivio, pero nan tin tambe nan inconveniencia y nan efectonan secundario. No uza remedi contra dolor nunca sin recomendacion di dokter pa mas di un siman sigui. Y no uza nunca mas di e dosis maximo indica. Tin dos sorto di remedi contra dolor simpel:

• cu acido acetilsalicilico (aspirin, APC etc.).
• cu Paracetamol (ta preferibel).

Paracetamol

Paracetamol tin un efecto contra dolor y pa baha keintura. E no ta dañino pa bo stoma. Den caso di sobredosis e por causa daño na bo higra. No mester uza e remedi aki hunto cu alcohol. Remedi contra dolor cu ta contene Paracetamol y tambe cafeina ta traha miho.

Acido acetilsalicilico

Acido acetilsalicilico tambe ta baha keintura y ta un medio contra dolor. Pashent asmatico, kendenan ta hipersensibel pa e remedi aki, por haya anshamento.

Hende cu erupcion di cuero cu ta grawata miho no tuma acetilsalicilico tampoco. Si bo tuma cantidadnan mucho grandi of si bo no mula e tabletnan fini, esaki por causa molester di stoma y te hasta sangra-mento di stoma.

Conclusion: Por lo general ta mas prudente pa uza Paracetamol cu remedi cu ta contene acido acetilsalicilico.

Ademas, e pregunta ta si ta bon pa combati keintura semper. Keintura ta nifica cu bo curpa ta defendiendo su mes contra intrusonan dañino (virus, bacteria). Como tal keintura ta un bon señal.

Remedi contra dolor y contra keintura cerca mucha

Tin fuerte indicacion cu acido acetilsalicilico por causa un reaccion di hipersensibilidad cerca mucha cu tin keintura cu por conduci na un afeccion celebral cu peliger di morto. Pesey ta di recomenda pa no duna e mucha aspirin pa mucha e ora ey. Den caso di dolor, sin keintura, e inconveniencia aki

no ta conta.

Paracetamol pa mucha no tin e inconveniencia aki. Naturalmente semper bo mester puntra bo mes si un remedi contra dolor en berdad ta necesario.

Gota pa nanishi y spulamento cu awa salo pa mucha y hende grandi

Gota pa nanishi no ta cambia nada na e causa di e malesa, sino solamente ta suprimi e sintomanan. Ora cu bo ke uza nan, uza nan preferiblemente prome cu bo bay drumi, pasobra drumi cu un nanishi cera ta masha fastioso. Nan efecto ta miho caminda tin slijm den e sinus. (mira pa un splicacion e capitulo “Verkoud”).

Mucha no por haya gota pa nanishi pa mas di 5 dia. Hende grandi tampoco pa mas di 5 dia. Si no e flishi di slijm di nanishi por bay hincha mas ainda, despues di un periodo cortico di alivio.

Bo ta haya sacamento, ora bo stoma no ta wanta e cuminda cu bo a tuma. E forma mas rapido pa bo stoma deshaci di e cuminda ta mandand’e ariba. Esaki ta sosode ora cu e stoma ta irita pa motibo di un infeccion viral of cuminda putri.

Den caso di un infeccion viral (gastro-enteritis = buikgriep) mayoria di biaha bo ta haya tambe diarea y keintura. Si e sacamento ta consecuencia di un infeccion, generalmente e ta bira menos despues di 24 ora.

Den e sacamento aki por aparece un tiki di sanger. Esaki no ta motibo pa alarma. Si tin mas sanger den e saca, esaki por ta un indicacion di sangramento di stoma y bo mester yama dokter mesora.

CERCA BABY

Ora e baby respo, hopi biaha e ta saca un tiki lechi tambe. Esaki no ta nada. Tosamento ta subi e presion den barica. E ora ey e sfinter na entrada di e stoma ta habri facilmente cerca baby y mucha chikito. Pero si e baby saca cu forsa (cu un ‘boog’), anto esaki por nifica cu tin un ceramento di e canal digestivo. Esaki ta sosode solamente den e prome simannan di bida.

CERCA MUCHA DI MAS DI 1 AÑA

Mucha ta saca mas lihe cu hende grandi. E causa por ta inofensivo, pero tambe hopi grave. Mayoria di biaha e causa ta fisico, pero tambe exitacion y

tension por ta motibo di sacamento.

Si e mucha ta saca, anto e no tin ningun otro sintoma di malesa y, pa lo demas, ta mustra salud, anto general- mente esaki ta motibo di mucho comemento di mangel y/of chucheria of pasobra el a come algo cu no tabata bon. Mayoria di malesa di mucha ta bay compaña pa sacamento.

Den caso di infeccion di garganta, di horea of cualke otro infeccion, hopi biaha e mucha ta haya tambe diarea y keintura. Esaki ta stop mayoria di biaha denter di 24 ora. Tambe hopi biaha mucha ta saca den caso di un verkoud cu ta cuminsando.

CUIDO PROPIO:

LOKE BO MES POR HACI

Laga bo stoma haya sosiego durante e prome oranan, kier men, no come nada ni bebe nada. Cuminsa cu un tiki awa of te slap. Si bo no saca esaki, bo por tuma buyon, awa of juice. Djey bo por cuminsa pasa poco poco pa cuminda mas solido, manera un buscuchi di soda.

CERCA BABY

Cuminsa despues di 2 ora cu awa of cu te den telep. Of si e ta haya boter, cu 10 cc di awa.

CERCA MUCHA DI MAS Di 1 AÑA

Sacamento por ta un experiencia angustioso pa un mucha. Pesey mes, purba trankilis’e, papiando cu ne cu calma. Evita (p’e bay den) panico. Apoya e mucha durante sacamento.

Percura pa reemplasa e perdemento di likido. Haci esaki preferiblemente cu un likido cu ta contene sucu y salo. Miho ta un likido (ORS-likido contra deshidratacion) cu bo cumpra na botica. Duna e mucha e likido aki regularmente den cantidad chikito. Un mucha cu ta saca y ta bebe toch semper ta mantene algo di likido paden. Pues, sigui cu esey. Cuminsa cu duna 2 ora despues cu e mucha a cuminsa saca. Si e mucha por soport’ e, bo por dun’e un buscuchi of un tiki papa despues di un par di ora. No oblig’e di come, si mesora despues cu e come algo, e bolbe saca.

TUMA CONTACTO CU BO DOKTER DI CAS

• Si bo ta sigui saca pa mas di un dia (tambe si bo ta haya migraine).

TUMA CONTACTO CU BO DOKTER DI CAS INMEDIATAMENTE

• Si bo ta saca y bo tin dolor di barica.
• Si bo saca sanger of likido cu sanger.
• Den caso di dolor di cabes repentino hunto cu sacamento (no si bo ta na haltura di migraine).

CERCA BABY

• Na e edad aki, pa regla, semper bo mester drenta den contacto rapida-mente cu bo dokter di cas, den caso di sacamento.
• Si e baby no ke bebe durante varios ora.
• Si ta parce cu e baby tin dolor di barica tambe.
• Si bo ta presumi cu tin intoxicacion.
• Si bo haya sanger den e saca-mento.
• Si e baby cuminsa saca despues cu el a cay.
• Si e baby ta sin smaak y no ta reacciona manera custumber.
• Si su wowonan a bay aden, su boca ta seco y su cuero ta slap.
• Si e baby no pishi of pishi masha poco durante mita dia.
• Si e baby saca cu un ‘boog’.
• Si e baby durante henter un dia no a bay af y su barica ta duro.

CERCA MUCHA

• Si bo yiu ta sacando pa mas di 1 dia.
• Si bo yiu no ke bebe nada tam-poco.
• Si bo yiu tin keintura halto tambe.

Sangramento di nanishi ta surgi pa motibo di un ader cu ta kibra den nanishi.

Esaki ta sosode mayoria di biaha pa motibo di cobamento den nanishi, pero e por sosode tambe den caso di verkoud (nistermento, suplamento di nanishi). Si bo ta sufri di presion halto, esaki por empeora sangramento di nanishi y ta mas dificil pa stop e. Esaki tambe ta e caso ora uza remedi pa haci e sanger mas awa.

CUIDO PROPIO:

LOKE B0 MES POR HACI

• Supla tur dos buraco di nanishi un tras di otro un biaha cu hopi forsa.
• Kinipi duro den e parti moli di e nanishi, na e punta.
• Keda sinta recht y hala rosea trankil via bo boca habri, mientras bo ta tene e nanishi cera.
• Mantene esaki pa por lo menos 10 minuut y djey lag’e los cu cuidou.

TUMA CONTACTO CU B0 DOKTER DI CAS INMEDIATAMENTE

• Si bo ta uza remedi pa haci e sanger mas awa.
• Si e sangramento no stop despues di a primi bo nanishi cera pa por lo menos 10 minuut.

Tur hende tin scup’i Dios of moeder-vlek riba nan cuero. Tin di nan cu t’ey for di nacemento. Algun otro ta sali den nos pubertad of despues. Muhe na estado hopi biaha ta haya mas scup’i Dios of moedervlek.

Scup’i Dios y/of moedervlek ta diferencia fuertemente cu otro pa loke ta forma, tamaño y colo. Mayoria di nan ta inofensivo, pero algun por converti den cancer di cuero maligno. Paga tino riba e señalnan di advertencia, cu ta skirbi den e seccion

“Tuma contacto cu bo dokter di cas”.

CUIDO PROPIO:

LOKE BO MES POR HACI

Contra scup’i Dios of moedervlek bo no por haci nada, pero si bo ta sinti hopi molester di nan, bo por delibera cu bo dokter di cas si por kita nan.

TUMA CONTACTO CU BO DOKTER DI CAS

• Si bo (tin e sensacion cu bo ta) ripara un of mas di e siguiente señalnan di advertencia na e scup’i Dios y/of moedervlek.
• E scup’i Dios of moedervlek ta bira preto.
• E scup’i Dios of moedervlek ta bira mas grandi: tin mas scup’i Dios of moedervlek chikito ta aparece (asina yama spatmento).
• E scup’i Dios of moedervlek ta bira mas diki.
• E scup’i Dios of moedervlek ta cuminsa grawata.
• E scup’i Dios of moedervlek ta sangra facilmente.

Mescos cu ta e caso cu cambio den comportacion relaciona cu animo, tur hende por haya cambio den comportacion relaciona cu nan actitud

sin sa ta pa ki motibo. Pesey ta importante pa sa e factornan di tal cambio, pa asina bo ta alerto pa bo por preveni di bira mas malo.

Si abo of cualke famia ripara un di siguiente sintomanan, ta motibo di preocupacion.

• Bo a bira masha inkieto.
• Bo ta intrankil.
• Bo falta energia, bo ta tristo y sin gana di haci nada.
• Bo ta mustra masha poco interes pa loke ta pasa rond di bo.
• Bo concentracion ta baha.
• Bo ta continuamente cansa y bo ta drumi hopi (aunke bo wowonan tin biaha no ta ni cera).

CUIDO PROPIO

LOKE BO MES POR HACI

Papia cu famia of cu un persona di confiansa, pa nan guia bo y pa asina bo por sigui riba e caminda corecto. Come saludabel, drumi trempan, preveni stress y no consumi alcohol.

TUMA CONTACTO CU BO DOKTER DI CAS

• Si bo pensamento a bira caotico.
• Si tin cambio den bo interes pa cuido personal.
• Si bo tin un sintimento bashi.
• Si bo emocion a bira menos fuerte y superficial.
• Si bo ritmo di drumimento a cambia.
• Si bo ta sinti cu bo ta bira agita.
• Si bo intrankilidad y bo inkietud a bira pio.
• Si bo ta ripara cambio den bo apetit.

TUMA CONTACTO CU B0 DOKTER DI CAS INMEDIAMENTE

• Si bo ta haya pensamento y concentracion masha straño y bruha.
• Si bo ta haya pensamento cu no ta cuadra cu realidad.
• Si bo desconfiansa a bira pio.
• Si bo ta observa cos cu no ta cuadra cu realidad. Por ehempel, bo ta scucha bosnan cu otro hende no ta tende y bo ta mira cos cu otro hende no ta mira. E cosnan aki ta trece miedo y angustia pa bo persona.

Tur hende tin periodo den cualnan ta sinti nan mes cu menos gana di biba y ta sufri di presion of tension. Si esaki tin influencia grandi riba nos funciona-mento di tur dia, tanto mentalmente como fisicamente, anto nos ta papia di stress.

E ora ey e ekilibrio entre loke nos por cu ne of por supera y loke ta exigi di nos ta kibra. Door di esey cierto mecanismo di defensa por cuminsa funciona. >E mecanismonan di defensa aki por manifesta nan mes na mil y un forma.

Por ehempel, bo por haya molester corporal, manera dolor di cabes, dolor di lomba, pero tambe hiperventilacion.

Biramento malo por ta un medio pa scapa di mucho presion. Pasobra, si bo ta malo, bo no tin mester di haci nada. Tambe bo por haya molester mental, manera depresion of cansancio. En bista cu cada hende ta diferente, cada hende ta reacciona diferentemente riba stress.

Esun, por ehempel, ta bira cansa y no ta haci nada mas cu drumi, mientras cu e otro hustamente no por drumi.

Stress ta promove lantamento di malesa. Problema cu bo no sa con pa resolve, presion di trabou halto, insiguridad, perdemento di un partner of un famia y debe: tur ta factor cu ta promove stress. Si stress dura mucho largo, bo por bira hipertenso.

CUIDO PROPIO:

LOKE BO MES POR HACI

No tin solucion simpel pa stress. Circunstancia cu ta bin di afo mayoria di biaha bo no por cambia asina facil. Tampoco bo no por cambia bo mes asina asina.

Puntra bo mes si no ta miho pa enfrenta e problemanan y pidi yudansa of conseho pa nan y mira si por cambia of pone un fin na e situacion dificil. Pensa den e caso aki, por ehempel, na reglamento di debe.

Stress por tin di haber tambe cu un relacion dificil of cu trabou cu ta exigi demasiado di bo. Un cambio drastico den bo bida por ta pisa, pero bo trankilidad mental na termino largo ta bal mas.

Papia cu otro hende, specialmente si nan a experencia e mesun cos, por yuda. Pa cierto problema tin grupo di combersacion cu tin como meta (pa)

laga otro hende participa den e experencianan di hende cu a pasa door di problema similar y cu a supera nan.

Bo por busca informacion di e gruponan aki na Departamento di Asunto Social. E departamento aki t’ey pa yuda hende cu tin problema of manda nan cerca e instancia cu por yuda miho.

No bay bebe alcohol y no bay baha bo rabia riba e hendenan rond di bo.

Considera bon cu uzo di trankilisante ta hopi perhudicial pa salud. Bo por bira adicto na nan y nan ta baha tambe bo capacidad pa haci algo cu e situacion cu ta causa stress. Pesey por uza nan solamente den caso di molester grave, por ehempel, si surgi problema cu drumimento.

TUMA CONTACTO CU B0 DOKTER DI CAS

• Si, pa motibo di stress, bo tin e tendencia di no funciona bon mas.
• Si bo ta insigur di bo condicion fisico.

Bo mes por haci un cita cu un trahado social sin carta di bo dokter di cas (verwijsbrief).

Tosamento no ta nada otro cu un reaccion di defensa di curpa di hende, cu e intencion di haci e canal respiratorio liber. Tin biaha tosamento por ta fastioso. Si pasa anochi tosando, no ta corecto pa suprimie cu medicina. Ora cu tin slijm, mester tosa pa

sac’e. Tosamento por irita bo gar-ganta. E ora ey ta surgi un tosamento seco cu ta kishiki. Si esaki ta hopi fastioso, eventualmente por suprimie.

CUIDO PROPIO:

LOKE BO MES POR HACI

Bebe hopi likido, esaki ta duna alivio temporalmente. No huma y evita luga yen di huma. Nunca no ta bon pa huma caminda tin mucha. Esaki ta conta ainda mas den caso cu nan ta verkoud y nan ta tosa, of cu nan tin malesa cronico di e canal respiratorio

(asrna, bronkitis).

Percura pa bon ventilacion. Pone un man dilanti di bo boca ora bo mester tosa y hala atencion di e muchanan pa nan haci esaki tambe. Den caso di tosamento seco, bo por tuma un remedi contra tosamento (mira e capitulo “Remedi”).

TUMA CONTACTO CU BO DOKTER DI CAS

• Si bo tosa saca slijm cu sanger.
• Den caso di dolor ora di hala rosea.
• Den caso di halamento di rosea cu ta piep of cu ta haci boroto.
• Si e tosamento persisti pa mas di 2 siman.
• Den caso di rosea cortico.
• Si e tosamento ta bay compaña pa keintura y e keintura persisti pa mas di 3 dia.

CERCA MUCHA

Tur e motibonan menciona ariba y

• Si e muchanan ta baba tambe y no ta guli.
• Si e tosamento ta bay compaña pa keintura y e keintura persisti pa mas di 2 dia.

TUMA CONTACTO CU BO DOKTER DI CAS INMEDIATAMENTE

• Den caso di problema di halamento di rosea: halamento di rosea lihe, hap pa aire, halamento di rosea mas rapido, dolor ora di hala rosea of halamento di rosea pisa.

CERCA MUCHA

• Den caso di problema cu halamento di rosea: halamento di rosea lihe, hap pa aire, halamento di rosea mas rapido, dolor ora di hala rosea of halamento di rosea pisa.

E meta di tratamento di herida ta pa para un eventual sangramento, pa preveni un infeccion y pa promove curacion mas lihe posibel cu menos sintoma restante posibel.

CUIDO PROPIO:

LOKE BO MES POR HACI

Herida superficial chikito

Si bo a haya un herida, percura pa limpi’e cu cuidou. Laba kita santo y otro contaminacion cu awa di cranchi.

Desinfecta cu yodo Betadine of cu un solucion di dioxogen (hydrogen peroxide) di 1,5%.

E substancianan aki ta mata bacteria sin pica. Si ta trata di un herida superficial chikito, tap’e cu un pleister cu ta laga aire pasa. Cualke cos bo ta hunta un tiki unguente di yodo Betadine riba dje: esaki ta preveni pegamento di e pleister riba dje. Cambia esaki cada (dos) dia.

Den caso cu sanger pasa door di e pleister of cu e bira muha, mester cambi’e mas frecuente. Si e herida ta sangra, bo por purba para e sangramento primiendo (riba) e herida (no lubida di laba bo man prome). Si bo tin un herida cu ta sangra na bo brasa of bo pia, ta yuda si bo tene esaki na halto.

TUMA CONTACTO CU B0 DOKTER DI CAS

• Si presenta un herida spontaneamente sin causa probabel.
• Si bo haya keintura.
• Si e herida cuminsa haci dolor atrobe despues di un par di dia.

TUMA CONTACTO CU BO DOKTER DI CAS INMEDIATAMENTE

• Si tin un sangramento severo.
• Si no por haci un herida sushi limpi.
• Si ta trata di un herida hundo of un herida habri, mester cos’e denter di 8 ora.
• Si ta trata di un mordi di un hende of di un bestia.
• Den caso cu rond di e herida bira cora, eventualmente cu strepi na brasa of pia. Esaki por ta un indicacion di un infeccion di un Iymfeklier. Alabes por surgi keintura.
• Si nunca bo no a haya un vacuna contra tetano of si esaki a sosode mas di dies aña pasa.

Caracteristico pa un tripa sensibel ta un sintimento di cram y di tension den barica,specialmente despues di un cuminda. Esaki ta bay samsam cu baymento af iregular cu ta alterna entre pupu duro (door di ceramento di barica) y diarea.

E causa exacto di un tripa sensibel ta desconoci, pero si ta sigur cu tur sorto di emocion tin influencia riba e movemento di tripa. E movemento ey por ta tanto fuerte como suave. Pesey bo ta haya diarea ta alterna cu ceramento di barica. Tambe un seleccion di alimento robes y falta di ehercicio ta fomenta e molesternan.

CUIDO PROPIO:

LOKE BO MES POR HACI

Come cuminda cu poco (of sin) vet y cu hopi fibra. Eventualmente bo por agrega extra fibra na e cuminda (puntra na supermercado of botica). Suficiente pan grof, salada di berdura, carni sin vet of pisca hopi biaha ta yuda suficientemente. Percura pa bebe hopi likido. Esaki ta nifica (minimal) 1 liter di likido pa dia y esey ta ± 10 copi of 6 glas. Haci ehercicio regularmente, por ehempel, haci tur cos cu bo por haci na pia canando of cana tur dia por lo menos tres cuarto di ora. Come cu regularidad y bay toilet asina cu bo sinti necesidad. Controla si stress por tin influencia (mira e capitulo “Stress”).

TUMA CONTACTO CU BO DOKTER DI CAS

• Si cram di tripa, manera describi, persisti pa mas di un par di dia y esaki ta prome biaha cu e ta sosode (Esaki pa exclui cualke otro malesa).
• Si bo patronchi di bay af cambia diripiente. Esta, cu bo mester bay w.c. cu mas frecuencia of net menos frecuentemente. Bo sushi diripiente ta bira mas moli of net mas duro y bo baymento af ta keda obstaculisa. Si esaki dura 2 siman of mas, anto bay dokter.
• Si e atakenan di cram keda persisti pa mas di dos siman.
• Si bo perde sanger y/of slijm ora bo bay af.
• Si bo perde apetit of bo perde peso sin ningun motibo evidente. Peso di hende ta masha constante, si nan patronchi di bida no cambia, esta, si e cantidad di cuminda y di ehercicio keda mescos. Si bo baha mas di tres kilo sin ningun rason, anto bay dokter!

Verkoud ta un infeccion causa pa un virus. E ta cuminsa cu sinti malo, sacamento di catara, coremento di nanishi y/of nanishi cera.

Despues di 1 pa 2 dia e nanishi ta cuminsa core un likido awa y cristalino. Despues e catara di nanishi ta bira diki y berde. Den caso di un verkoud comun y coriente keintura no ta aparece, pero cerca mucha chikito si. Como cu e nanishi ta den contacto cu e horeanan, e sinus y e garganta, por presenta complicacion eynan.

Esaki por ta causa di infeccion di e horea meymey y sinusitis. E ora ey si hopi biaha por trata di keintura. Banda di esey por surgi un tosamento pisa, pasobra e slijm ta pasa pa e cavidad di garganta y ta kishiki e canal respiratorio. Otro sintoma cu ta compaña verkoud por ta: nistermento, biramento hers, dolor di garganta y un keintura leve.

Tin mas di 100 sorto di virus di verkoud. Pesey hende no por crea resistencia p’e. Contra virus no ta existi remedi, kier men cu antibiotico tampoco no ta yuda. Solamente bo por haci algo contra e sintomanan, manera habri e nanishi.

Verkoud ta disparce mayoria di biaha despues di 5 te 10 dia. Un hende cu tin verkoud por sali gewoon pafo, sigur si e no tin keintura. Bo no mester tin miedo cu bo ta coi friu riba dje of cu e ta bira pio.

CERCA MUCHA

Verkoud ta parti di mucha su bida. Particularmente si e mucha ta bay luga caminda hopi otro mucha tambe ta bay, manera speelschool of crèche.

CUIDO PROPIO:

LOKE BO MES POR HACI

Busca bon ventilacion. Drumi cu bentana habri (si ta posibel). Drumi cu bo cabes un tiki mas na halto. No huma. Si bo tin hopi molester di nanishi cera of di presion riba bo cachete of bo horea, bo por spula bo nanishi cu awa salo of bo por uza gota pa nanishi (mira e capitulo “Remedi”). No haci esaki pa mas cu un siman sigui.

Purba evita contagio di otro persona. Tapa bo boca y bo nanishi, ora bo nister. No duna man y laba bo man regularmente.

CERCA MUCHA DI MAS DI 1 ANA

Dun’e hopi likido pa bebe, likido cayente por tin un efecto di alivio. E mucha por sali pafo.

CERCA BABY

Un baby cu un nanishi cera cu mester bebe for di pecho di e mama of for di boter tin e opcion entre no bebe of stik. Automaticamente e baby lo no bebe. Door di esey e baby ta haya hamber y e lo cuminsa yora mas. E mucha por bebe ora e nanishi ta habri. Bo por promove esey door di dun’e gota pa nanishi (den un pipet) cu un solucion di awa salo. Djey bo ta limpia e nanishi cu un palito di catuna (eartip) muha (bo mes ta drey e y bay cu e punta te patras, no ariba!). Si ta necesario, bo por dun’e tambe gota pa nanishi special pa mucha den tur dos buraco di nanishi prome cu cada cuminda.

TUMA CONTACTO CU BO DOKTER DI CAS

• Si bo tin dolor (fuerte) na bo horea of sinus. Dolor na e sinus bo ta sintie banda di bo nanishi, den bo cachete di ariba of ariba di of patras di bo wowonan.

CERCA MUCHA

• Si, banda di e sintomanan di verkoud, e tin keintura pa mas di 3 dia.
• Si bo ta kere cu e mucha tin dolor.
• Si pa mas di 1 te 2 siman ta sali catara berde of geel for di su nanishi.
• Si e baby sigui yora.

TUMA CONTACTO CU BO DOKTER DI CAS INMEDIATAMENTE

CERCA MUCHA

• Si e baby, a pesar di e tratamento menciona ariba, durante dos cuminda (sigui) no por of no kier bebe.

CUIDO PROPIO:

LOKE BO MES POR HACI

Net despues di e verzwikmento bo por limita sangramento interno frescando e luga concerni cu awa friu of cu ijs. Hinca bo pia, por ehempel, den un hemchi di awa friu friu.

Mas lihe bo haci esaki, miho pa bo. Esaki por haci e periodo di recupera-cion considerablemente mas cortico.

Despues di esey uzo di un banchi di elastik ta consehabel (mira e ilustracion). Bolbe mara esaki un par di biaha pa dia, ora cu e verband no ta sinta lizo mas. Durante tres dia no para ni cana riba e pia y, ora bo sinta, mantene e pia verzwik na halto.

Bo por preveni verzwikmento, manteniendo bo mes den bon condicion.

Corda calenta bon prome cu bo haci deporte. Despues di un verzwikmento un bon training di e musculonan rond di e scarnir ta importante . Coremento di bicicleta ta un bon ehercicio.

TUMA CONTACTO CU BO DOKTER DI CAS

• Si despues di 3 pa 4 dia cu bo a sigui e consehonan menciona akiriba, bo no ta ripara mehoracion.

TUMA CONTACTO CU BO DOKTER DI CAS INMEDIATAMENTE

• Si bo no por para riba e pia.
• Si bo ta haya e hinchamento preocupante, y tambe si e hinchamento a surgi lihe, den algun minuut.
• Si bo tin hopi dolor.