Diabetes

Kico ta Diabetes?

Diabetes ta un condicion unda tin mucho glucose (‘sucu’) den sanger.
E cantidad di glucose den sanger normalmente ta wordo tene stabil.
Tin diferente tipo di diabetes, gran mayoria di pashent na Aruba tin diabetes tipo 2. Cu diabetes tipo 2 e pancreas ta produci insulina, pero e curpa no por uz’e suficientemente. Esey ta wordo yama resistencia di insulina.
Diabetes por empeora durante tempo: esey ta pasa ora e pancreas ta produci menos insulina.
Diabetes ta un malesa cu ta rekiri control regularmente, mirando cu e ta un malesa cu por cambia durante tempo.
Unabes bo tin diabetes, e no ta cura mas.
Diabetes ta un malesa cu mester wordo monitoria bon, mirando e chens pa desaroya complicacionnan.
Bon noticia ta, cu bo mes por haci hopi pa baha e riesgo riba diabetes of pa reduci e consecuencianan di diabetes.

Sintomanan di diabetes

Durante e encuentronan PRISMA bo lo a ripara cu hende cu tin diabetes por experiencia diferente sintomanan. Sintimento di e sintomanan, of aumento di e sintomanan aki, por ta un señal cu e nivel di glucose den sanger ta mucho halto. Akibou tin un paar di e sintomanan mas comun cu por wordo causa pa un nivel di glocuse den sanger mucho halto.

Orina frecuentemente

Ora e curpa no ta logra pa wanta e nivel di glucose den sanger bou di 10 mmol/liter, e ta bay over na un medida di emergencia. Via orina e glucose ta sali di e curpa. Desbentaha di esaki ta cu e ta duro pa e riñonnan y posiblemente bo tin cu sali di cama hopi anochi. Si e nivel di glocuse den sanger ta normal, e orina frecuentemente y e sed lo baha.

Sed

Ora e riñonnan ta saca e glucose via orina, tin mester di likido pa por disolve e glucose. Pues, e curpa tin mester di mas likido, esaki ta duna e sentimento di sed. Si bo ta ignora e sed, bo por seca. Saca glucose via orina tin prioridad. E sed lo baha maera e nivel di glucose den sanger ta baha y e curpa no tin cu saca mas glucose.

Falta di energia/cansacio

Glucose ta e combustibel, tur parti di e curpa tin mester di glucose. Si e nivel di glucose den sanger ta keda halto y ta yega insuficiente na e caminda unda tin mester di dje, ta crea cansancio. Tin un falta di energia. Manera e glucose por wordo tuma for di sanger e cansancio lo reduci.

Baha peso

Ora e glucose ta sali via orina ta perde energia. Si e curpa no por haya energia for di e glucose den sanger, e ta saca energia for di e vetnan cu tey den e curpa. Cierto hende ta bay ripara cu nan ta perde peso. Perdimento di peso ta parce un bon efecto y no un keho, pero perdemento di peso na e manera aki no ta saludabel pa e riñonnan. Manera e glucose den sanger ta mehora, e peso lo stabilisa bek.

Infeccionnan/infeccion di blas

Un infeccion ta wordo causa door di bacteria. Bacteria ta gusta cos dushi, pues nan ta gusta glucose. Un keho regular cu un pashent di diabetes tin ta infeccion di blas. Ora tin glucose den orina, pasobra e riñonnan ta saca e glucose dimas via orina, e ta bira un lugar ideal pa bacteria ta multiplica su mes. E ta resulta den un infeccion di blas fastioso, cu ta sigui bolbe bek regularmente. Ora no tin glucose mas den e orina, pasobra e glucose den sanger ta bou control, ta mas facil pa combati e infeccion di blas y tin menos chens pa e bolbe bek.

Bista wazig

Cu nivel halto di glucose den sanger ta sosede un cambio den lens di wowo. Door cu eynan tambe e nivel di glucose ta mas halto, ta disformele. E disformacion di e lens ta ocasiona un bista wazig, Manera e nivel di glucose den sanger ta normal, e bista ta drecha.

Sin sintomanan

Ora no tin sintomanan no kiermen automaticamente cu e nivel di glucose den sanger ta normal. E kehonan cu tini ora e nivel ta halto no semper ta obvio, tur hende ta sinti cansa tin biaha, tin pishi mas cu normal, tin un infeccion of ta sinti menos fit. Bista wazig of tin mas sed, no necesariamente ta val op. No mester tin perdemento di peso. Mayoria di hende ta experiencia un cambio ora ta cuminsa tratamento di diabetes, e ora ey nan ta ripara cu algo tawata andando.

Tratamento di diabetes

Movecion

E celnan ta bira mas sensibel pa insulina door di movecion. Nan ta absorba e glucose mas facil, resultando den un nivel mas abou di glucose den sanger. Si bo midi bo sanger prome y despues di mey ora di movecion, bo ta ripara esey facilmente. No solamente durante movecion e cantidad di glucose den sanger ta baha, pero tambe den e periodo despues. Banda di esaki movecion ta importante si bo kier baha tamaño di sintura. Menos vet den area di bariga ta zorg pa e insulina por traha mas mihor y e glucose ta baha. Movecion no solamente tin influencia riba tamaño di sintura y bahamento di peso, pero e ta yuda tambe pa baha presion di sanger, mihora colesterol, keda e curazon saludabel, baha stress y mihora bo beis.

Come saludabel

Glucose ta drenta sanger via cuminda. E carbohydrato cu bo ta come ta wordo desintegra den e tripanan pa bira glucose. Glucose na su beurt por wordo absorba den sanger via e flishi di tripa. Mas carbohydrato cu bo ta come, mas halto e nivel di glucose den sanger lo bira. Adapta loke bo ta come por tin un influencia grandi riba bahamento di e nivel di glucose den sanger. Productonan cu tin hopi carbohydrato ta pan, cereal, aroz,pasta, fruta y tur producto cu sucu a wordo añadi na dje, manera soft drinks, juice, cuki y mangel.

Bo por come e carbohydrato durante e dia enbes di porcionan grandi den un solo shot, cumindanan mas chikito y un snack. Tambe ta posibel pa come menos carbohydrato. Por ehempel pone menos aroz y reemplas’e cu berdura of salade. Otro manera pa uza menos sucu ta door di reemplasa productonan, diet soft enbes di soft normal, un buscuchi enbes di un bolo.

Menos vet den e area di bariga tin como consecuencia cu e insulina por traha mihor y e glucose ta baha. Pa logra baha e vet den area di bariga e curpa tin cu bay uza e reservanan di vet. Esey kiermen cu bo mester tuma menos energia cu bo ta uza. Tin 2 manera pa logra esaki: come menos (tuma menos energia) y move mas (uza mas energia).

Medicacion

Tin diferente pildo cu ta yuda pa baha e nivel di glucose den sanger.

Metaformine ta zorg cu e locknan di cel ta habi mas mihor, cu nan ta frustia menos. E glucose por drenta mas facil, cu ta resulta den bahamento di e nivel di glucose den sanger. Metamorfina tambe ta zorg menos glucose ta sali di e higra.
Tabletnan di Sulfonyluream (S.U.) por motiba e pancreas pa traha mas insulina. Tin biaha e tabletnan aki por logra cu bo nivel di glucose den sanger ta mucho abou. Esaki ta bin probablemente pasobra bo no a come suficiente of bo tawata mas activo of a bebe alcohol.
Tabletnan Thiazolidinedionen ta haci mescos cu Metformine cu e glucose ta drenta mas facil den e celnan. Un desbentaha di Thiazolidinedionen ta cu nan por tin efecto cu bo ta subi di peso.

Cerca un den cada tres hende cu diabetes tipo 2 e curpa mester di mas insulina. Tin diferente tipo di insulina, cu ta traha na diferente manera. Tin insulinanan cu ta traha poco poco durante henter un dia, nan ta yuda e curpa ful un dia cu un cantidad extra di insulina. Tin tambe insulinanan cu ta traha di biaha y ta limita e subida di e nivel di glucose den sanger despues di un cuminda. E cantidad y tipo di insulina ta depende di loke bo curpa tin mester extra. E ta wordo programa a base di loke bo necesidad. Si bo ta spuit insulina, no kiermen cu bo diabetes ta mas severo.

Un nivel di glucose den sanger halto ta mucho mas severo compara cu spuit insulina cu ta wanta e nivel di glucose den sanger bou control.

Algemene Ziektekosten Verzekering