Cancer. Un palabra cu ora bo scuchʾe por lo general bo cabeynan di cuero ta para. Nos curpa ta consisti di miyones di cel, den tur sorto y forma. Celnan di un musculo ta mustra diferente cu cel por ehempel di den nos pia. Tur e celnan aki den principio por dividi nan mes.
Diferente sorto di cancer
Cancer ta un palabra pa defini masha hopi diferente malesa cancereso sin embargo tur tin un caracteristica den comun: celnan di nos curpa cu constantemente por y ta dividi nan mes. E diferencia entre un cel di cancer y un cel normal ta cu esun cu ta cancer ta un cel cu a origina (nace) for di un cel normal pero algo no a bay bon den e material (fundeshi) di e cel. Consecuentemente e cel aki ta cuminsa dividi su mes completamente robes. E fout cu tin den e cel aki ta copia su mes y sigui bay den tur e otro siguiente celnan y asina e ta keda sigui di dos pa cuater, pa ocho,etc, etc. Di e manera ey un tumor por nace. Un tumor ta parecido na un pida carni cu ta crece.
Division incontrolabel
E division ta keda sigui y multiplica. Tambe e produccion di bloedlichaampjes den e sanger por bruha y consecuentemente e sanger ta produci demasiado bloedlichaampjes of bloedlichaampjes innecesario. Cu tempo tumornan maligno ta cuminsa crece den e tehido alrededor. Tin ora celnan di e tumor ta kibra y ta flota den e sanger of ta bay den e vasonan linfactico (lymfevaten). E celnan aki cu a los (asina yama micrometastasen) tin ora ta bay pega den otro parti di e curpa, unda nan ta crece y bira tumornan nobo. Esaki yama uitzaaïingen of metastasen.
Diagnostico
Ora un diagnostico wordo duna, e dokter lo prescribi un plan di tratamento. Cua tratamento ta e miho pa e pashent ta depende di e tipo di cancer cu e persona tin como tambe den ki condicion (fisico/emocional) e persona ta.
Diferente tipo di tratamento
Tin diferente tipo di tratemento pa cancer pero esunnan (mas) conoci ta:
- Cirugia. Kinan ta percura pa kita e tumor completamente of pa un gran parti. Tin ora tambe ta opta pa kita un capa di e tehido alrededor. Asina ta purba evita di duna e celnan di cancer cu a ‘staciona’ nan mes eynan menos chens di bolbe crece. Tambe sa opta pa kita algun lymfeklier cu ta den bisindario ya cu e uitzaaïingen ta gusta staciona nan mes den e lymfekliernan prome.
- Radioterapia. Kinan ta haci uzo di radiacion directamente riba e tumor pa asina mata e celnan di cancer. Ta purba pa solamente e tumor haya e radiacion pero tin ora no por evita cu e tehido saludabel tambe ta haya radiacion. E bon noticia ta cu awendia e ekiponan ta mas sofistica y ta evita cu tehido saludabel haya (mucho) daño.
- Kimoterapia. Esaki ta un manera pa mata e celnan canceroso. Esaki ta sosode pa medio di productonan kimico, asina yama cytostatica. Segun historia e prome cytostatica a wordo descubri na aña 1945 pa casualidad. Despues di esey hopi mas remedi efectivo a wordo desaroya. Awendia ta wak cu tin masha hopi sorto di cytostatica. Dokternan ta opta tin ora pa uza un combinacion di e cytostatica pa asina evita loke ta e efectonan secundario cu bo por haya. Tambe pa motibo cu ta purba evita cu e celnan di cancer bira resistente contra e cytostatica (kiermen nan no ta reacciona mas riba e remedi). Ta bon pa sa cu cada kimoterapia ta un tratamento riba su mes. No solamente e dokter tin cu scohe for di un gran cantidad di remedi pero tambe e mester dicidi tocante e cantidad y e diferente manera cu lo suministra esaki na e pashent.
- Tratamento hormonal den cierto caso. Por ehempel pa cierto caso di cancer di pecho.
- Tratamento specifico (ʾtargeted therapyʾ).
- Immuno terapia. Immunoterapia ta un tratamento unda cu ta manipula y purba reenforsa e defensanan natural di nos curpa contra cancer. Tin diferente sorto di immunoterapia, entre otro: tratamento cu anticurpanan monoclonal (proteinanan artificialmente fabrica), tratamento cu cytokinen, vacuna of genterapia (ultimo dosnan aki ta gran parti ainda den fase experimental). Immunoterapia generalmente ta wordo duna den combinacion cu kimoterapia.
- Tin ora un combinacion di e tratementonan ya menciona ta wordo duna.
