Dokter di cas
Ora bo inscribi na AZV bo mester scoge un dokter di cas, un botica y un dentista. Pa dokter di cas ta conta cu bo por scoge dentro di e cantidad di dokter di cas cu e momento ey tin luga disponibel. E dokter di cas ta un profesional cu a studia medicina general y despues a specialisa su mes como dokter di cas. E tin conocemento amplio y por yudabo cu diferente tipo di malesa.
Servicio di dokter di cas
Segun contracto cu AZV, e dokter di cas mester ta 32 ora pa siman disponibel pa atende e aseguradonan di AZV (consulta cu pashent). E resto di oranan den siman ta pa e dokter haci administracion manera por ehempel firma receta, lesa resultado di test y of haci bishiti na cas di pashent. Cada oficina di dokter di cas tin su propio ʼreglananʼ. E ta importante pa bo ta bon informa di e reglanan di e oficina. Bo dokter di cas of e asistente por duna bo informacion manera e orario di oficina, orario pa bo yama pa bo haya cita of orario pa bo yama pa pidi receta of resultado di test.
Adicionalmente bo ta haya informacion tocante unda bo por localisa bo dokter di cas ora tin un emergencia pafo di e orario normal di e oficina, unda pa acudi ora dokter bay cu vakantie of unda pa bay ora bo dokter mes bira malo.
E gran mayoria di e dokternan di cas ta wordo representa door di Huisartsen Vereniging van Aruba, esta e Asociacion di Dokternan di Cas di Aruba. Pa haya sa mas tocante nos dokternan di cas y nan bunita profesion bo por primi aki.
E asistente di dokter di cas
E asistente di bo dokter di cas ta un persona hopi importante. E ta fungi como un man extendi di bo dokter di cas. Su persona tin bon estudio y conocemento di e sistema di ʼtriageʼ y ta traha bou responsabilidad di bo dokter di cas. Triage ta e evalacion di pashentnan den diferente categoria basa riba e gravedad di nan sintomanan, lesion y malesa. E ta un sistema pa por determina e urgencia di e pashentnan cu ta yama pa haya un cita. E asistente a base di triage ta yena e schedule (agenda) di bo dokter di cas. E asistente di dokter lo evalua e historia medico di bo y ta hacibo pregunta tocante bo sintomanan (kehonan) pa percura cu bo ta haya e cuido na e bon momento.
E praktijkondersteuner (enfermera specialisa)
Na 2012 AZV hunto cu Stichting Wit Gele Kruis a introduci e praktijkondersteuners, esta e enfermeranan specialisa den cuido di pashentnan cu malesanan cronico, sea diabetes, curason , colesterol of presion halto. E praktijkondersteuner tambe ta traha -mescos cu e asistente di dokter- bou di responsabilidad di bo dokter di cas. Cu su experticio y dedicacion, e praktijkondersteuner lo duna bo informacion, guia bo y motiva bo pa bo cumpli cu e plan di tratamento pa bo recupera bo salud mas tanto posibel.
