Beneficio

E cuido medico cu bo tin derecho riba dje ta ancra den e Ley di AZV. AZV ta un seguro medico pa cuido curativo. Esey ta nifica cu bo seguro ta cubri tratamentonan medico pa cura, monitoria of maneha e malesa cu bo tin.

Ora bo bira malo, bo ta acudi directo na bo dokter di cas. Su persona lo consulta cu bo y dicidi kico ta e miho plan di tratamento pa bo. E dokter di cas por yuda bo cu hopi malesa. Sinembargo, ora e dokter di cas haya cu ta (medicamente) necesario, e lo referi bo pa un specialista. Y claro, ora bo dokter di cas prescribi remedi, e lo tene cuenta cu loke AZV ta cubri pa bo.

E pakete di benificio di AZV ta consisti di:

  • Cuido di dokter di cas
  • Cuido di specialista
  • Cuido di partera
  • Cuido di fisioterapista
  • Cuido di dentista (cobertura limita)
  • Cuido di ortodontista (cobertura limita)
  • Cuido den hospital
  • Remedinan (segun Lista Positivo)
  • Medionan auxiliar
  • Cuido Medico den Exterior (cu aprobacion di AZV)
  • Screening di cancer di pecho
  • Cuido di logopedista

Cuido di un fisioterapista

AZV ta traha cu un clustermodel. E clustermodel ta un tabla unda ta categorisa diagnosticonan den un cierto cantidad di session cu bo ta haya cubri di nos. Generalmente e sessionnan ta di entre 6 pa 9.

Cuido di partera

E partera ta e persona adecuado pa yuda durante bo embarazo, na bo parto y despues di parto. Na momento cu bo ta sospecha cu bo ta na estado, bo por bay directo na un partera. AZV ta traha cu varios partera. Ta keda na abo pa scoge cerca kende bo kier bay.

Solamente den caso cu bo partera haya cu ta necesario, su persona lo referi bo pa un gineacologo. Bo seguro AZV ta cubri e gastonan di guia y consulta di partera, e parto den hospital y e consultanan di e partera despues di parto. Den caso cu ta un gineacologo ta trata bo, e ora AZV lo cubri e gastonan aki.

Cuido di specialista medico

E ta bon pa sa cu bo dokter di cas por yuda bo cu hopi malesa. Bo dokter di cas por laga haci algun test. Tambe e por receta remedi ora e haya cu esaki ta necesario. Ora bo dokter di cas conclui cu e evaluacion of tratamento di un specialista ta necesario, e lo duna bo un carta di referencia.

E carta di referencia ta wordo yena segun e specialismo na cual bo dokter di cas ta referi bo. Como asegurado bo ta liber pa scoge cua specialista bo kier bay dentro di e specialismo cu bo dokter di cas ta manda bo. Nos ta duna un ehempel. Si bo dokter di cas referi bo pa un dermatologo (specialista di cuero), esey ta nifica cu abo ta scoge cerca cua di e dos dermatologonan cu kende AZV tin contracto bo kier bay.

Consulta cerca e specialista

Bo ta yama na e oficina di e specialista pa bo haya informacion y pa traha un afspraak.Ta importante pa bo corda di hiba bo carta di referencia dia di bo afspraak. Adicionalmente bo mester corda di mustra bo digi-ZorgPas.

Durante di bo consulta cerca e specialista, e specialista lo splica bo kico ta su (prome) pensamento of diagnostico di bo malesa. Tambe e lo propone un plan di tratamento y dependiendo di e situacion, bo specialista lo traha e plan di tratamento cual por consisti di:

  • duna conseho di cambio di estilo di bida;
  • laga haci algun test of test adicional;
  • prescribi remedi;
  • propone operacion;
  • propone terapia;
  • propone un combinacion di loke ya caba a wordo menciona of;
  • propone otro specialismo pa haya sa kico bo tin den caso cu e no por yuda bo. Esaki lo sosode a base di un reporte medico (carta) pa e dokter di cas cu e peticion pa bo dokter di cas manda bo e specialismo cu e ta propone.

Consentimento pa tratamento

Bo specialista mester percura pa semper comunica den palabranan cla y facil pa abo comprond’e. E dokter ta splica bo kico su plan di tratamento ta incluyendo tur riesgo cu tin. Mester tin tur espacio pa evalua e diferente scenarionan cu por presenta. Ta importante pa bo tuma un decision bon pensa y un tratamento no por start sin cu abo duna bo aprobacion.
Ora e tratamento medico specialisa cla, bo por bay bek pa haya guia cerca bo dokter di cas. Bo dokter di cas lo keda monitoria bo salud y ora conclui cu ta necesario pa manda bo bek pa e specialista, bo dokter di cas lo haci esaki. Ta solamente algun caso extremadamente excepcional of complica lo keda continuamente bou tratamento di un specialista.

Scroll To Top

Algemene Ziektekosten Verzekering