Pa por cubri e gastonan medico di AZV, es decir pa cubri tur e gastonan di cuido medico cu nos tur hunto ta uza, tin mester di hopi placa. Cuido medico manera tur parti di mundo tin su prijs cu ne. AZV ta maneha anualmente alrededor di 440 miyon florin. Di unda AZV ta haya e placa aki? Tin cuater tipo di entrada pa e fondo AZV.
E prome ta e prima AZV. E prima AZV ta 10,5% total. E ta wordo dividi den un parti cu e empleado ta paga y un parti cu e dunado di trabou ta paga. Si bo ta traha, bo ta paga 1,6% di bo salario bruto na prima AZV cual ta bay pa Departamento di Impuesto. E resto, esta e 8,9% di bo salario bruto, e dunado di trabou ta paga pa bo. Si bo tin bo propio compania, bo tin cu paga e total di 10,5%. Un persona cu pensioen ta paga 10,5% di su entrada di pensioen na prima AZV.
E segundo entrada ta e BAZV. Esaki a wordo introduci na 2014. E ta nifica bestemmingsheffing y ta un impuesto riba e volumen di benta di un compania (omzetbelasting). Pa abo e ta nifica cu cada biaha cu bo bay cumpra un producto of servicio, bo ta paga 1,5% BAZV. E companianan ta paga cada luna e suma total di BAZV na Departamento di Impuesto. E Departamento di Impuesto na su turno ta manda e placa pa AZV. Cu e BAZV tin e bentaha cu tur hende incluyendo e turistanan ta contribui na e Fondo AZV.
E tercer entrada ta e derecho di AZV pa recupera placa bek, e asina yama ʾverhaalrechtʾ. Aki ta unda nos di AZV ta purba recupera e sumanan cu a paga na por ehempel accidente di auto via e seguronan di auto di e automobilistanan cu a causa e accidente.
E di cuater entrada ta e Contribucion di Gobierno (Landsbijdrage). For di inicio di AZV na 2001 semper ta existi e contribucion di gobierno. E ley AZV ta stipula cu ora AZV tin un likides, gobierno mester yuda y manda entrada pa e fondo AZV. Historicamente ta wak cu door di hisamento di e prima AZV pero tambe cu e introduccion di e BAZV, e contribucion di gobierno a baha relativamente.
