Salo, Salud
door di Magaly Tobel
Salo ta importante pa motiva e cantidad di impulso di nervio, cu ta duna señal for di bo celebro pa por ehempel duna e musculonan e tarea pa hisa bo brasa, y hala cera e musculonan. Banda di esey, salo ta importante pa balansa e vocht den bo curpa y ta hunga un rol pa regula e presion di sanger.
Señal importante si bo tin salo di mas of di menos
Salo y awa ta hopi importante pa un curpa fuerte y sano. Hopi hende ta pensa cu ta bon pa elimina salo mas tanto cu ta posibel. Pero e berdad ta cu bo mester di salo pa bo ta salud, pero e mester ta den un cantidad balansa.
1. Bo ta wanta vocht
Bo ta sinti bo curpa manera hincha? Bo renchi dede ta preta na bo dede? Bo no a subi di peso? E chens ta grandi cu bo ta wanta vocht den bo cupra. Y esaki mayoria biaha tin di haber cu e cantidad di salo cu bo curpa ta tuma. Bebe suficiente awa ta yuda balansa e cantidad di salo den bo curpa.
2. Bo ta haya hopi sed
Bo ta sinti manera ta papel bo ta come? Salo ta trek awa den bo curpa. Bo ta sinti sed, boca seco esey por ta un di e señalnan cu bo tin basta salo den bo curpa.
3. Bo tin cu orina varios biaha
Bebe hopi awa no ta e unico motibo cu bo ta orina varios biaha. Si bo tin hopi salo den bo curpa tambe por duna e efecto ey. Bo rioñan nan ta trahando overtime pa elimina e salo dimas, pesey bo ta orina mas cu normal. Bo orina ta mustra mas scur.
4. E gana di come cuminda no saludabel
Si bo ta come salo dimas por ta asina cu bo ta perde interes den cuminda saludabel. Bo no ta haya cuminda no procesa dushi of hasta cu e cuminda tin smak bo ta haya falta di e extra salo. Ora bo custuma asina hopi cu hopi salo bo ta cuminsa prefera cuminda nan conserva cu salo.
5. Dolor di cabez
Bo ta haya molester di batimento di cabez? E por ta posibel door di comemento di salo dimas. For di un sondeo (https://bmjopen.bmj.com/ content/4/12/e006671.full) a resulta cu adultonan cu a come 3.5 gram di salo pa dia, casi un tercera parti tabata tin mas dolor di cabez compara cu esnan cu a come 1.5 gram di salo pa dia.
6. Calamber
Si bo ta haci deporte y bo ta fanatico di come salo bo ta reconoce e situacion cu bo muscolanan ta coy calamber. Salo cu Calcio ta responsabel pa e contracion di e musculonan, y Kalium ta laga e musculonan relaha. Si e balans entre Kalium cu salo no ta bon, durante y despues di haci deporte bo por haya molester mas lihe di ‘spierverzuring’.
7. Bo ta bruha
Salo di mas por ocaciona deshydratacion, y esaki por influencia bo capacidad di pensa cla na un manera negativo.
8. Presion halto di sanger
Bo presion di sanger por subi door di tin salo dimas. Si bo ta sufri di presion halto lo no ta noticia nobo cu bo tin cu baha man cu uzo di salo. Presion halto den sanger pa un largo tempo no trata por ocaciona malesa nan di curason, ader, stroke of daño na riñon.
Cuanto salo ta bon?
E reglanan general ta conta pa adulto no mas cu 2.4 gram pa dia, esey ta mas of menos 6 gram of 1 theelep di salo cu nos ta uza den cuminda. Mayoria salo ta scondi den cuminda procesa (den bleki of paki), den saus y den spice. No ta asina importante pa sinta fiha si bo ta reconoce mas of menos un di e 8 puntonan menciona, e solucion pa tur e puntonan ta practica mesun cos, reduci e uzo di salo y bebe mas awa.
