Algemene Ziektekosten Verzekering

Inscripcion

Con mi ta inscribi na AZV?

Tur  servicio di AZV ta sosode online, di dialuna pa diabierna di 7:30 te 16:00or.

Bo ta inscribi na AZV door di bay riba nos website y yena e formulario di inscripcion. Bo persona ta attach bo  identificacion valido (sea cedula, paspoort of rijbewijs)  y por ultimo primi riba ‘Manda’. Controla bon cu abo of e apoderado a haya un codigo despues di primi riba manda. Esey ta nifica cu bo peticion a drenta na AZV. Otro opcion ta pa bo entrega un peticion via nos emailadres [email protected]  hunto cu bo indentificacion valido. Unabes e departamento ricibi bo documentonan, nan ta haci e control y si bo ta cualifica pa inscripcion nan ta manda bo un instruccion pa download e AZV app. E prueba di inscripcion na AZV ta bo digiZorgpas cual ta un caarchi digital den bo AZV app. Bo por download e AZV app via Google Play of App store den bo smartphone despues cu bo a inscribi cerca nos.

Persona cu permiso of declaracion (verklaring toelating van rechtswege) 

Si bo tin un permiso di estadia of un declaracion (verklaring toelating van rechtswege) valido bo inscripcion na AZV ta caduca riba e fecha cu bo permiso of declaration ta caduca. E fecha ey bo lo por wak den bo AZV App (digiZorgpas). E ta importante pa bo renoba bo permiso of declaration pa bo inscripcion na AZV keda activo.

Tene cuenta cu si bo inscripcion NO wordo prolonga, bo insripcion ta caduca na e fecha den bo AZV App y eventual gastonan medico ta pa bo propio cuenta.

Pa prolonga bo inscripcion tuma nota di e informacion cu ta sigui.

Prolongacion di inscripcion cu permiso/declaracion

Si bo permiso/declaracion ta bay caduca bo mester renobe pa por prolonga bo inscripcion na AZV. Na e momento ey ainda bo no tin un permiso/declaracio nobo pero si bo a entrega un peticion na Dimas cu ainda ta den proceso.

Bo a entrega un peticion nobo pa un permiso of declaracion?  

• Si bo persona entrega un peticion pa prolongacion di permiso of declaracion na tempo na DIMAS, esey kiermen prome cu bo permiso of declaracion actual ta bay caduca, bo inscripcion na AZV ta wordo prolonga automaticamente den e sisterma di AZV pa un periodo temporal. Esaki ta a base di e colaboracion entre DIMAS y AZV. E fecha temporal nobo bo por wak den bo AZV App.
  Bo inscripcion temporal na AZV lo bira definitivo despues cu DIMAS a tuma un decision positivo riba bo peticion. E fecha nobo di bo permiso/declaracion ta wordo procesa automaticamente den e sistema di AZV. Bo por wak e fecha nobo den bo AZV App. Den caso cu bo permiso/declaracion a wordo otorga pa tempo indefini e ora ey e inscripcion na AZV no tin fecha di terminacion.
• Si bo entrega un peticion pa prolongacion di permiso of declaracion NO na tempo na DIMAS, esey kiermen despues di e fecha cu bo permiso of declaracion actual ta caduca, bo inscripcion na AZV tambe ta caduca automaticamente riba e fecha ey.
  Unabes DIMAS a tuma un decision positivo riba bo peticion bo inscripcion na AZV automaticamente ta drenta na vigor retroactivamente desde e fecha di e cuminsamento di bo permiso of declaracion nobo. E fecha di terminacion di bo inscripcion nobo bo por wak den bo AZV App. Den caso cu bo permiso/declaracion a wordo otorga pa tempo indefini e ora ey e inscripcion na AZV no tin fecha di terminacion.
  Si bo a haci gasto medico den e periodo di bo inscripcion nobo, bo por entrega un peticion pa restitucion na nos email [email protected] hunto cu un indentificacion valido incluyendo e factura.

Bo a ricibi un decision negativo di DIMAS?

• Si bo ricibi un desicion negativo di Dimas (afwijzing) riba bo peticion e ora ey bo inscripcion na AZV ta wordo termina. E fecha di terminacion di bo inscripcion bo por wak den bo AZV App.
• Un persona tin e derecho pa entrega un obhecion (bezwaarschrift) contra un decision. Si bo ta entrega na Dimas un obhecion contra e decision negativo, bo persona por manda un peticion pa haya un prolongacion temporal di bo inscripcion na AZV na nos email [email protected] hunto cu un indentificacion valido.
• Si bo no a entrega un obhecion contra e decision di DIMAS, bo inscripcion na AZV ta termina automaticamente riba e fecha den bo AZV App.
  Unabes bo ricibi un permiso of declaracion nobo for di DIMAS bo inscripcion na AZV automaticamente ta drenta na vigor retroactivamente desde e fecha di e cuminsamento di bo permiso of declaracion nobo. E fecha di terminacion di bo inscripcion nobo bo por wak den bo AZV App. Den caso cu bo permiso/declaracion a wordo otorga pa tempo indefini e ora ey e inscripcion na AZV no tin fecha di terminacion.
  Si bo a haci gasto medico den e periodo di bo inscripcion nobo, bo por entrega un peticion pa restitucion na nos email [email protected] hunto cu un identificacion valido incluyendo e factura.

Inscripcion di baby

Semper ta aconsehabel pa inscribi bo baby mas lihe cu ta posibel despues di su nacemento, tanto na Censo como na AZV. Pero den caso cu bo no logra mesora, e ora mester percura pa dentro di 2 luna desde e fecha di su nacemento bo inscribi bo baby. E ora e baby por wordo inscribi retroactivamente; esta di e fecha di nacemento di bo baby. Un di e mayornan of un apoderado ta haci e peticion pa inscribi e baby na AZV, conforme e procedura di Inscripcion Online.

Ki documento mester?

Pa inscripcion di e baby mester manda e siguiente documentonan:

• Identificacion valido di un di e mayornan of apoderado;
• Carta di apoderacion di e mayor(nan);
• Un potret di e baby.

Despues di manda tur documento e mayor of apoderado ta ricibi via email un QR-code incluyendo informacion di e inscripcion di e baby pa ingresa (yena) e baby den e AZV app di e mayor.

Tene cuenta (DNA-test)

Tene cuenta si tin cu laga haci DNA test bo mester haci esaki dentro di 2 luna desde fecha di nacemento di e baby. Ta importante pa avisa AZV y mustra bo peticion (prueba di pago) di e DNA test. E ora ey e baby su inscripcion ta drenta na vigor desde e fecha di nacemento. Bo ta haci e peticion pa inscripcion di e baby via e website aki of via nos emailadres [email protected]

Baby cu ta rekeri di un permiso.

A base di nos maneho e baby ta bin na remarca pa un inscripcion temporal si:

• Mayornan a entrega un peticion na DIMAS.
• Mayornan tin un permiso valido of un peticion pa prolongacion di permiso entrega na tempo na DIMAS.

E ora ey e inscripcion ta wordo duna pa un periodo (temporal) en espera di e inscripcion na Censo.

Tene cuenta:

E peticion na DIMAS pa e baby mester wordo haci mas pronto cu ta posibel pa e baby por wordo inscribi na AZV dentro di 2 luna desde fecha di nacemento di e baby. E ora ey gastonan medico di e baby desde fecha di nacemento ainda por wordo cubri door di AZV.

Si e peticion drenta despues di e 2 luna desde fecha di nacemento,  e inscripcion di e baby ta drenta na vigor riba e fecha cu a haci e peticion na AZV. Tene cuenta cu gastonan medico haci den e periodo cu e baby no ta sigura (verzekerd) ta pa cuenta di e mayornan. Na momento cu e baby ta inscribi na Censo, e mayornan por acerca AZV via emaladres [email protected] cu e peticion pa un inscripcion definitivo pa e baby. Pa prolongacion nos ta referi na e informacion bou di e titulo Prolongacion di inscripcion cu permiso / declaracion.

Ora baby nace y keda di biaha interna den hospital.

Si bo baby keda interna di biaha den Dokter Horacio Oduber Hospitaal (kiermen di biaha despues di bo parto/nacemento di baby), e proceso di inscripcion ta keda mescos cu e informacion akiriba duna.

Ora a bay exterior pa haya baby.

Si e baby a nace den exterior (cu aprobacion cu AZV pa motibo cu e mama mester a haya cuido medico den exterior) e mayor(nan)  tin cu haci un peticion na AZV mas pronto posibel ora regresa Aruba despues di inscribi e baby na Censo. Si ta trata di un baby cu ta rekeri permiso pa sigui e informacion akiriba tocante ‘baby cu ta rekeri un permiso’.

Unabes AZV procesa e peticion.

E mayor of apoderado ta ricibi for di nos e informacion di e inscripcion di e baby pa ingresa esaki den e AZV app.