Cuido Medico den Exterior

Aunke Aruba tin hopi specialismo medico, por sosode cu bo ta bira malo y haya un malesa cu na Aruba no por yuda bo. Bo specialista e ora ey ta haci un peticion na AZV pa bo haya cuido medico den exterior. Solamente cu un aprobacion adelanta di AZV, e gastonan di cuido medico den exterior ta wordo cubri. Percura pa tin bo paspoort na ordo. Den caso cu ta aplicabel, tambe un visa valido.

Comision CGZ

E peticion ta wordo evalua door di un comision independiente, esta e “Commissie Grensoverschrijdende Zorg” (CGZ).

CGZ ta evalua a base di dos punto:

Si e tratamento cu ta wordo pidi ta medicamente necesario.
Si e tratamento cu ta wordo pidi no por wordo haci na Aruba.

Despues di evalua e peticion, CGZ ta duna un conseho na AZV. Den mayoria caso, AZV ta tuma e conseho over di CGZ.

Aprobacion

Ora cu bo haya un aprobacion di AZV, esaki ta nifica cu AZV ta bay regla e afspraak, biahe y estadia pa e asegurado y su acompañante social. E asegurado ta bay e pais cu AZV ta indica. E tempo pa warda pa haya un afspraak ta depende di e cantidad di luga cu tin disponibel na e hospital.

AZV ta cubri

Pasashi (ida y buelta) di e pashent y di un acompañante social.
Gastonan medico (e.o. ingreso den hospital y e operacion of test).
Compensacion pa hotel den forma di un carta di garantia di AZV.
Un aporte (financiero) pa yuda den e gastonan di cuminda y awa di e pashent.

Dependiendo di e urgencia di e peticion, lo determina con lihe e asegurado ta bay exterior. E biahe ta pa medio di un avion comercial. Den caso di hopi urgencia, un air ambulance ta wordo regla dentro di 12 ora.

Aporte financiero (daggeldvergoeding)

E aporte financiero pa Colombia / Corsow / Merca
$25 pa dia (entrante 1 di september 2023)

E aporte financiero pa Hulanda
€ 30 pa dia (entrante 1 di september 2023)

Solicitud pa afspraak den exterior

Despues cu AZV bay di acuerdo pa cubri e tratamento pa bo, ta pidi un afspraak y e plan di tratamento cerca e hospital den exterior. Na mes momento, AZV lo pidi bo pa informacion manera un scan di bo paspoort y di bo acompañante social. E acompañante social ta un persona cu bo mes ta scoge.

AZV ta cubri pa un (1) solo acompañante social. E persona aki ta preferiblemente:

Mayor di edad.
Cu polisa valido di AZV (dus e mes ta un asegurado di AZV).
Cu tin permiso y visa valido (den caso cu ta aplicabel).
Cu por acompaña e asegurado durante ful su estadia.
Cu ta den bon condicion di salud.
Cu por domina e idioma di e pais, of Ingles.

Despues cu AZV ta ricibi e confirmacion di e afspraak di e hospital den exterior, AZV ta (bolbe) contact bo via email. Den futuro cercano, AZV lo haci uzo di un app (aplicacion den smartphone) pa informa bo.

Seguro di biahe

Ta conseha bo pa abo y bo acompañante social cumpra un seguro di biahe. Gastonan di malesa (inespera) durante cu ta den exterior no ta cay pa cuenta di AZV.

Yegada den exterior

AZV ta traslada pashent pa Colombia, Hulanda, Corsou y Merca, cual Colombia ta e pais unda e gran mayoria di pashent ta wordo traslada pa ricibi nan tratamento medico.

Colombia

Colombia ta un pais reconoci pa su hospitalnan acredita den e top di Latino America. Tin calidad halto den varios specialismo. E specialistanan trahando den e hospitalnan aki a prepara nan mes hopi bon tanto na Colombia como tambe na Merca y Union Europeo. AZV tin contracto cu seis hospital na Colombia. Ora bo wordo manda pa Colombia, lo bo haya tratamento cerca un di e hospitalnan aki:

Fundación Valle del Lili na Cali	(FVDL)	www.valledellili.org
Fundación Cardiovascular de Colombia na Bucaramanga	(FCV)	www.fcv.org
Hospital Internacional de Colombia na Bucaramanga	(HIC)	www.fcv.org
Fundación Santa Fe de Bogotá na Bogotá	(FSFB)	www.fsfb.org
Hospital Universitario San Ignacio na Bogotá	(HUSI)	www.husi.org
Instituto LatinoAmericano De Neurología y Sistema Nervioso	JEMARZ	na Bogotá

Departamento di Servicio (Colombia)

Tur e hospitalnan aki tin un Departamento di Servicio pa Cliente Internacional of un persona di contacto cu ta yuda e asegurado ora tin pregunta of inkietud. E specialista na Colombia y AZV tin contacto via un plataforma digital, desaroya specialmente pa AZV, bou di e nomber MRA (=Medical Referal Aruba). Esaki ta un di e formanan pa yuda AZV cumpli cu e meta pa centralisa y optimalisa e informacion tocante e asegurado/pashent.

Corsou

Corsou tambe ta ofrece bon cuido medico. Na yegada, e asegurado y su acompañante social por tuma un taxi pa bay e hospital of e luga pa keda. Por ehempel e asegurado ta keda na Pietersz Guesthouse ora cu e ta haya tratamento na Curaçao Medical Center. Pashent y of su acompañante social ta keda den contacto cu AZV y ora cu ta cla, AZV ta regla e biahe di regreso bek.

Hulanda

AZV ta manda pashent Hulanda via e broker Transcaring. Transcaring ta traha cu diferente hospital. Pa tur pregunta of inkietud, bo ta tuma contacto cu Transcaring.
Number di telefon di Transcaring ta: +31 622 984319 of +31 646 887855

Adres: Mauritslaan 24
3454 XS De Meern
Nederland
[email protected]

Merca

Ora AZV duna un aprobacion pa bay Merca, AZV ta percura pa regla e biahe (ida y buelta) y e afspraak. AZV tin contracto cu Bascom Palmer na Miami. Aseguradonan cu wordo manda pa Bascom Palmer ta keda na Residence Inn. Durante e estadia na Merca, AZV lo tene contacto directo cu e hospital.

Acompañante social

Ora bo tin un aprobacion pa un acompañante social, AZV ta duna bo acompañante social un carta di declaracion cu ta informa cu e ta e acompañante oficial di bo. E carta aki por wordo uza (por ehempel) pa e dunado di trabou di bo acompañante social.

Cambio di acompañante social

Algun asegurado mester keda pa un tempo largo den exterior, p.e. 6 siman of mas. Ta comprendibel cu no tur acompañante por keda full e periodo. Cambio di acompañante ta posibel, sin embargo AZV no ta paga e ticket di biahe pa e segundo (of mas) acompañante. Den caso cu bo tin e intencion pa cambia di acompañante, avisa esaki adelanta na e Departamento di Cuido Medico den Exterior. E ora AZV por tene cuenta cu esaki.

Acompañante medico

Ora bo specialista ta haya cu bo tin mester di un acompañante medico, e specialista ta indica esaki riba e peticion. Por lo general, e specialista mes ta regla esaki tambe. Si AZV aproba un acompañante medico, e ora e gastonan di e acompañante medico ta bin pa cuenta di AZV.

Aporte financiero pa pashent

E aporte financiero ta conta pa cada dia di estadia, irespecto si e pashent ta interna of no.

Tuma nota! Den caso cu bo keda un tempo mas corto di loke a pensa, e ora bo ta entrega e resto di placa cu bo a ricibi bek na AZV pa medio di un transferencia di e resto di e placa riba cuenta di banco di AZV.

Ora mester keda mas tempo

Por sosode cu bo mester keda mas tempo den exterior. Den tal caso, e specialista den exterior ta percura pa manda un informe medico pa e consehero medico di AZV. Den paisnan unda AZV ta traha cu un broker, e informe medico mester wordo manda pa e broker.

Si e specialista den exterior recomenda un tratamento cu por wordo duna na Aruba mes, anto AZV lo traslada bo pa Aruba pa e sigui e tratamento aki. Den caso cu AZV duna un aprobacion pa keda mas tempo afo, e ora ta prolonga e aporte financiero pa dia.

Regreso pa Aruba – Aerolinea Comercial

Regularmente e hospital di exterior ta manda informacion pa AZV. Na momento cu bo haya informacion cu bo tratamento ta cla, bo mester tuma contacto cu e Departamento di Servicio pa Cliente Internacional di e hospital, pa asina nan regla bo biahe di regreso. Tambe e hospital di exterior ta pone bo specialista na Aruba na altura cu bo tratamento a keda cla. Mayoria biaha e biahe di regreso ta bay via un aerolinea comercial.
E biahe di regreso semper ta wordo regla despues cu e Departamento di Servicio Pa Cliente Internacional of broker ricibi e informe medico. E informe medico ta inclui e confirmacion cu bo por bay cas bek. .
Den caso cu no tin un broker, e ora abo mes of bo acompañante social ta contact e Departamento di Cuido Medico Den Exterior di AZV. Akinan tambe ta conta cu e biahe di regreso ta wordo regla despues cu ricibi e informe medico.

Regreso pa Aruba – Air Ambulance

Den casonan excepcional, ora cu e specialista den exterior indica cu bo tin cu bolbe Aruba cu un air-ambulance, AZV lo mester evalua esaki prome. Den caso cu AZV duna aprobacion pa regreso cu air ambulance, lo nifica cu e asegurado mester warda, te ora un siguiente caso urgente di otro pashent na Aruba presenta y cu lo mester pidi un air ambulance. Esaki por dura mas o menos 1 siman. Una bes cu e Air Ambulance yega Aruba, ta traslada e pashent pa Dokter Horacio Oduber Hospital.

Recomendacion

Despues cu bo yega Aruba, ta consehabel pa bo tuma contacto cu bo specialista y dokter di cas pa informa nan di bo tratamento cu bo a caba di haya den exterior.

Fayecimento den exterior

Por sosode cu bo ta fayece durante di bo tratamento den exterior. Esaki ta un situacion tristo y dificil, unda bo acompañante social tin cu bay regla e documentonan oficial pa por prepara y transporta bo curpa bek pa Aruba. Esaki ta un proceso cu ta tuma algun dia. Pa cos cana mas lihe, bo famia tin cu apunta -mas pronto cu ta posibel- un funeraria na Aruba.

Den caso di fayecimento, AZV ta pidi e acompañante social pa haci mas lihe cu ta posibel y cumpli cu tur loke ta wordo pidi pa asina e curpa di e fayecido wordo transporta lihe pa Aruba.

AZV ta cubri e gastonan di preparacion y transportacion di e fayecido te na yegada na aeropuerto na Aruba.
Gastonan di transportacion local y di entiero ta pa cuenta di e famia di e fayecido.

Algemene Ziektekosten Verzekering