Inscripcion y Prolongacion

Pa inscribi na AZV bo mester percura pa cumpli cu algun rekisito segun ley AZV. Bo mester ta:

Inscribi na Censo;
Biba na Aruba (residencia principal ta Aruba);
Dispone di un permiso valido.

E ta importante pa bo sa cerca cua dokter di cas, botica y dentista bo kier inscribi. Y pa e proceso di inscripcion bay mas lihe, e ta bon pa bo scoge un dokter di cas cu ta habri, esta cu tin luga pa tuma pashent nobo. Bo por wak cua dokter di cas tin luga, akinan riba nos website. Tras di e nomber di e dokternan di cas cu tin luga ta menciona ʾhabriʾ.

Scoge dokter di cas cu ta habri

Unabes bo a scoge cua dokter di cas bo ta desea, yena e formulario di inscripcion completo y manda esaki hunto cu un scan di bo ID (sea paspoort, cedula of rijbewijs) na [email protected]

Scoge un dokter di cas cu ta cera

Den caso cu bo toch kier inscribi na un dokter di cas cual ta cera (yen), e ora e ta nifica cu bo mes mester busca e aprobacion di e dokter di cas prome. Bo ta download y print e formulario di inscripcion di AZV pa bay cu esaki cerca e dokter di cas di bo interes. Si e dokter di cas por tuma bo, e lo mester firma y stempel e formulario pa bo. Bo ta finalisa na yena e formulario y manda esaki pa AZV hunto cu un scan di bo ID (sea paspoort, cedula of rijbewijs valido) na [email protected] Como cu nos ta traha directamente cu DIMAS, nos mes lo controla bo permiso.

Kico ta sosode?

Na momento cu nos ricibi bo peticion, nos ta procesa esaki. Bo lo haya un email cu e invitacion pa download e AZV app for di Google Play of Apple App Store pa bo digi-ZorgPas. Den e email lo bo ricibi un QR code y instruccion pa bo registra mas lihe pa bo digi-ZorgPas. Den bo digi-ZorgPas lo bo wak tur bo dunadonan di cuido. Door di activa e boton di notificacion, AZV lo por comunica directo cu bo.

Prolongacion

Si bo tin AZV a base di un permiso di estadia of un declaracion (verklaring) pa tempo defini, e ta importante pa bo corda di renoba bo permiso of declaracion pa mantene bo seguro AZV activo y asina evita eventual gastonan medico cu por presenta den e periodo cu bo no tabata segura. AZV ta traha cu DIMAS, e Departamento di Integracion, Maneho y Admision di Stranhero.

Cu cada peticion pa extension (prolongacion) di AZV bo mester corda di email nos na [email protected] e siguiente:

Bo prueba di identidad.
Si bo mes no por haci esaki, bo representante mester presenta bo prueba di identidad hunto cu su mes prueba di identidad como tambe un carta di autorizacion firma door di bo persona unda bo ta declara cu e representante ta actua den bo nomber.

Bo ta bin den remarca pa un extension (prolongacion) di bo seguro AZV bou di e siguiente condicionnan:

Bo peticion (solicitud) pa extension di bo permiso di estadia of declaracion pa tempo defini a wordo otorga door di DIMAS pa e siguiente periodo. E extension di bo seguro AZV ta wordo duna segun e duracion di bo permiso nobo.
Bo peticion pa extencion di bo permiso di estadia of declaracion pa tempo defini pa e siguiente periodo a wordo haci na tempo pero ta den proceso ainda na DIMAS. E extension di seguro AZV ta wordo duna pa e duracion di e periodo consecutivo na cua e solicitud a wordo haci.
Bo peticion pa extencion di bo permiso di estadia of declaracion pa tempo defini a wordo nenga door di DIMAS, bo a entrega un apelacion contra e decision di DIMAS dentro di e limite di tempo cu ta wordo duna pa entrega apelacion (bezwaar) y bo tabata tin un permiso (of declaracion) valido pa e periodo anterior. E extencion di seguro AZV ta wordo duna pa e periodo consecutivo na cual e peticion pa extencion (prolongacion) ta referi.

Algemene Ziektekosten Verzekering