Inscripcion di baby


Generalmente e hende muhe ta pasa un embaraso dushi y ta prepara su mes pa e cambionan cu ta bay presenta. E ta hopi importante pa bo tin bo documentonan na ordo, manera un paspoort valido y un ZorgPas valido. Por sosode cu pa motibo di complicacion durante bo embaraso bo mester wordo manda afo pa haya tratamento medico. E ta den bo propio interes y di bo yiu, pa den un caso asina bo wordo yuda mas lihe cu ta posibel. Den e publicacion aki AZV ta splica con por inscribi un baby na AZV y kico ta e rekisitonan den diferente scenario. E rekisito pa inscripcion ta varia ora ta trata un persona cu ta biba na Aruba cu permiso, ora e baby a nace den exterior y si e mama di e baby ta un menor di edad.


UN INSCRIPCION DEN PRINCIPIO TA VALIDO DESDE E FECHA CU TA ACUDI NA AZV. GASTONAN MEDICO TA BIN NA REMARCA PA WORDO CUBRI DOOR DI AZV, CUMINSANDO DESDE E FECHA CU TA ACUDI NA AZV.


Inscripcion di baby na AZV 
Riba e regla akiriba  tin un excepcion ora ta referi un inscripcion di baby y ta cumpli cu tur exigencia di AZV. Semper ta consehabel pa inscribi bo baby mas lihe cu ta posibel despues di su nacemento, tanto na Censo como na AZV. Pero den caso cu bo no logra mesora, e ora mester percura pa dentro di 30 dia desde e nacemento di bo baby bo acudi na AZV. E ora e baby por wordo inscribi retroactivamente; cuminsando for di e fecha di nacemento di e baby. Un di e mayornan of un apoderado ta bin inscribi e baby na AZV. 

Mester trece pa e inscripcion di e baby:
•    e acta di nacemento di e baby;
•    plus un identificacion (valido) di un di e mayornan. 
•    Si ta trata di un baby reconoci door di e tata, mester trece e acta di reconocimento y e identificacion di e tata. 
•    Si ta un apoderado ta bin inscribi e baby; e mester trece un carta den cual e mayor ta  apodera e persona y e apoderado ta trece su identificacion valido.  

E mayor of apoderado ta ricibi e ZorgPas (caarchi di AZV) cual ta wordo duna pa 1 aña. E caarchi aki no tin potret. Despues di 1 aña e mayornan (of un di e mayornan) ta pasa AZV cu e baby pa renoba e caarchi. E ora si AZV lo saca potret di e baby y ta haya un caarchi nobo cu potret ariba. 


Baby ta keda interna den Hospital
Si bo baby keda di biaha interna den Dokter Horacio Oduber Hospital (kiermen di biaha despues di su nacemento), e proceso di inscripcion ta keda mescos.


Baby cu tin mester di permiso 
Ora ta trata di un baby di un mayor cu permiso, mester tene cuenta cu e mayor tin cu regla un permiso pa e baby tambe (aunke cu el a nace na Aruba nos leynan ta stipula esey). Entrega e peticion pa permiso mas lihe cu ta posibel na DIMAS. A base di nos maneho ‘inscripcion di baby cu permiso’, nos por inscribi bo baby pa un periodo temporal anticipando riba e otorgamento di e permiso y inscripcion na Censo. Tambe pa e categoria aki ta conta cu tin 30 dia pa inscribi bo baby na AZV pa bin na remarca pa wordo inscribi ‘retro-activo’ (es decir desde fecha di nacemento). 
Otro puntonan importante pa tene na cuenta ora acudi na AZV ta:
•    bo baby mester ta naci na Aruba;
•    bo baby no ta mas bieu cu 1 aña;
•    mester tin un comprobante cu e peticion pa permiso pa e baby a wordo entrega na DIMAS of tin e permiso di e baby caba;
•    un di e mayornan -referiendo na e mayor cu tin e obligacion di cuido- tin un permiso di estadia valido of tin un peticion entrega na DIMAS pa prolongacion di su permiso y ta inscribi na AZV.  

Tratamento medico den exterior – durante embaraso
Por sosode cu pa motibo di complicacion durante di bo embaraso, bo mester wordo manda afo pa haya tratamento medico den exterior y pa haya bo baby den exterior. Importante ta pa bo tin bo paspoort den bon ordo y asina lo bo por biaha via AZV si cualkier situacion surgi. Den e caso aki tambe bo ta bin na remarca pa bo baby wordo inscribi retroactivamente, esta desde e fecha di nacemento di bo baby den exterior. Sin embargo, mester corda pa inscribi e baby na Censo prome na regreso di exterior. 
Mester trece: 
•    e acta di nacemento ‘apostilla’ di e pais unda e baby a nace;
•    plus un identificacion (valido) di un di e mayornan. 
•    Si ta trata di un baby reconoci door di e tata, mester trece e acta di reconocimento y e identificacion di e tata. 

Tuma nota! Akinan ta mantene un regla mas estricto: inscripcion retroactivo ta tuma luga ora abo acudi na AZV dentro di 1 siman despues cu bo a yega for di exterior. Mas lihe mas miho. 
Tambe si bo ta un mayor cu ta na Aruba a base di permiso, mester corda di entrega un peticion pa permiso pa e baby na DIMAS. Despues di entrega e peticion pa un permiso pa e baby, ta acudi na AZV cu e documentonan akiriba menciona plus e peticion pa permiso.
Tambe por sosode cu net despues di nacemento di bo baby, bo baby mester wordo manda urgente afo pa ricibi tratamento medico. Den e caso aki tambe ta conta cu un mayor of un apoderado mester pasa inscribi e baby na AZV. Mester corda cu pa inscribi e baby na AZV, mester a pasa pa inscripcion di e baby na Censo prome. Pa esnan cu permiso, mester corda prome pa entrega e peticion pa permiso di e baby na DIMAS. 


Embaraso di un menor di edad
Ora ta trata di un baby (yiu) di un mama menor di edad mester corda di cumpli cu algun rekisito adicional: 
•    Mester acudi na Directie Voogdijraad prome pa regla e nomber di e representante legal (voogd).
•    Mester presenta na AZV cu e carta di Directie Voogdijraad.
•    Mester presenta cu un identificacion di e mama menor di edad.
•    Mester trece identificacion di e representante legal y of curator. 
•    Den caso cu ta trata di un baby di un mama menor di edad cu tin permiso, mester percura pa haci peticion pa permiso di e baby na Dimas. 
•    E acta di nacemento di e baby;
•    Si ta trata di un baby reconoci door di e tata, mester trece e acta di reconocimento y e identificacion di e tata. 


TUMA NOTA!
E documentonan cu ta wordo tuma como ‘identificacion valido’ ta:
•    Un paspoort Hulandes of;
•    Un paspoort stranhero valido of;
•    Un cedula di Reino Hulandes valido of;
•    Un rijbewijs di Reino Hulandes valido.

☼ IMPORTANTE ☼
AZV TA PONE ENFASIS CU NOS NO TA HACI NINGUN EXCEPCION DEN CASO CU TA INSCRIBI BO BABY MAS LAAT CU E 30 DIA PA MOTIBO CU E PROCESO DI RECONOCIMENTO DI BABY, ESTA E DNA-TEST, TA TUMA MUCHO MAS TEMPO DI LOKE TA SPERA.