Cuido di dokter di cas

Ora cu bo inscribi na AZV, bo lo mester scoge un dokter di cas, un botica y un dentista. Cerca nan bo ta acudi ora bo bira malo. Cada inscripcion ta individual y esey ta nifica cu cada miembro di famia mester scoge un dokter di cas, un botica y un dentista. Ta recomendabel pa registra henter e famia na e mesun dokter di cas. Esaki en conexion cu por ehempel malesanan hereditario.


Scoge un dokter di cas:

Pa dokter di cas ta conta cu por scoge dentro di e cantidad di dokter di cas cu e momento ey tin disponibel. E dokter di cas ta un profesional cu a studia medicina general y despues a specialisa su mes como dokter di cas. E tin conocemento amplio y por yuda e pashent cu diferente tipo di malesa. E ta e prome persona cerca kende abo como asegurado di AZV ta acudi ora bo bira malo.

Servicio di dokter di cas:

E gran mayoria di e dokternan di cas ta wordo representa door di e Asociacion di Dokter di Cas di Aruba (Huisartsen Vereniging Van Aruba). E dokter di cas mester ta 32 ora pa siman disponibel pa atende asegurado di AZV (consulta cu pashent). E resto di oranan den siman ta pa e dokter haci administracion (p.e. firma receta, lesa resultado di test of haci bishita na cas di pashent).

Regla di oficina di dokter di cas

Otro aspecto importante cu abo como pashent mester sa ta e reglanan di e oficina di bo dokter di cas. Bo dokter di cas of e assistente mester por duna informacion manera orario di oficina, orario pa yama pa afspraak (receta of pa haya resultado di test), unda pa localisa dokter ora tin un emergencia pafo di orario normal di oficina di dokter y unda pa acudi ora dokter a bay cu vakantie of dokter mes a bira malo.

Sistema di Triage:

Mayoria dokter di cas ta traha cu e sistema di ‘triage’. Triage ta e evaluacion di pashentnan den diferente categoria, na unda nan ta wordo clasifica segun e gravedad di e sintomanan, lesionnan y malesa. ‘Traige’ ta dus un sistema pa por determina e urgencia di e pashentnan cu ta yama pa haya un cita cerca nan dokter di cas of cu ta yega na Spoed Eisende Hulp (SEH) pa wordo atendi.

E assistente di e dokter di cas ta esun cu ta haci traige. E ta traha bou di e responsabilidad di e dokter di cas. Semper e assistente lo consulta cu e dokter di cas den caso di cualkier preocupacion. Aplicando ‘traige’ ta haya sa cua pashent ta haya un afspraak e mesun dia y cua pashent ta haya afspraak por ehempel pa su siguiente dia.

E assistente di dokter di cas:

E assistente di dokter di cas ta un persona cu a studia den e sistema di haci triage. Su persona ta evalua e historia medico di e pashent y ta haci pregunta na e pashent tocante su kehonan (sintomanan) pa percura cu e cuido wordo duna na e bon momento. Banda di esey, triage tambe ta wordo uza cada bes mas pa indica door di ken e pashent (eventualmente) mester wordo yuda y kico e continuacion di tratamento ta.

Praktijkondersteuner:

Aruba tabata tin un situacion unda cada biaha mas pashent tabata haya malesanan cronico manera diabetes, curason y presion halto. E introduccion di praktijkondersteuners na 2012 hunto cu Stichting Wit Gele Kruis tabata un stap logico pa tuma ya cu tabata desea pa brinda e grupo di pashentnan aki un guia mas personal y di calidad halto.

E praktijkondersteuner ta un persona studia riba nivel di HBO y cu tin amplio experiencia den ramo di cuido di pashent. E tarea di e praktijkondersteuner ta pa asisti e dokter di cas den e cuido di pashentnan diabetico y pashentnan cu malesanan cardiovascular. E praktijkondersteuner ta e persona cu ta duna e pashent informacion, guia y motivacion pa e pashent por keda cumpli cu su controlnan regular. Tambe su persona t’ey pa corda e pashent riba e importancia di tuma su remedinan segun prescripcion di e dokter di cas. E praktijkondersteuner ta traha independiente pero semper bou responsabilidad di e dokter di cas.

Keho di dokter di cas

Bo tin un keho tocante e practica di bo dokter di cas? E ora bo por entrega un keho cerca bo dokter di cas. E ta importante pa purba di tene un combersacion cu bo dokter di cas prome. Esey ta hopi biaha e manera mas lihe di soluciona un keho.

Den caso cu e keho no a wordo soluciona of bo persona no tin e curashi pa papia cu bo dokter di cas, e ora bo por entrega e keho cerca e comision di keho di dokter di cas.

Un keho por wordo entrega na e siguiente manera cerca e comision di keho di dokter di cas:

  • Personalmente na Departamento di Servicio pa Cliente di AZV. E Departamento di Servicio pa Cliente di AZV por yuda bo persona pa yena e formulario di keho tocante dokter di cas.
  • Imprimi (print) e formulario di keho di dokter di cas for di e website di AZV, yena esaki, firma y scan esaki. E scan di e formulario di keho bo ta manda pa e funcionario di keho na:  klachtenfunctionaris@uoazv.aw
  • Bo por laga haci un afspraak cu e funcionario di keho via e central di telefon y of balie di AZV. E funcionario di keho ta disponibel tur diamars entre 8:30 -12:00 or. E afspraak ta dura 20 minuut.

Bo keho lo wordo atendi door di e comision di keho dentro di 6 siman.