Cuido dental


Pa e cuido dental ta distingui dos grupo di asegurado
 o   tur asegurado y; 
 o   asegurado hubenil. 

Tur asegurado
E derecho riba cuido dental pa tur asegurado ta limita y ta encera:

  • tratamento di dolor: den tur caso, pa rancamento di djente of kies y e incision necesario di postema. Pa e tratamento completo, ta compensa no mas cu 2 potret intra-oral; 
  • cuido dental quirurgico di indole general: extirpacion di carni di djente, extirpacion y coreccion quirurgico di e maxilar, tratamento di fractura, limpiesa extenso di herida, ceramento di e orificio surgí entre e cavidad bucal y e cavidad nasal, despues di extraccion y extirpacion quirurgico di djente of kies implanta of ranca (incluyendo verstandskies), restonan di rais dental of   cuerpo aheno. Pa esakinan bo mester e aprobacion di e Organo Ehecutivo AZV prome. 
  • protesis: aki ta trata di un plancha parcial of completo. E sustitucion di e protesis parcial of completo ta ser paga si e protesis actual no ta sirbi mas y por lo menos cuatro aña a pasa despues di su suministro. Ta ser rekeri un aporte propio pa protesis:  o  un protesis completo : Afl. 200,- pa maxilar  o  un protesis parcial  : Afl. 100,- pa maxilar. Pa protesis bo mester aprobacion prome di e Organo Ehecutivo AZV.
  • Cuido dental specialisa. Como asegurado bo tin derecho riba e cuido aki si keda comproba cu:* e cuido special aki ta necesario relaciona cu e tratamento di trastorno severo di desaroyo of crecemento, of deformacion grave adkiri di e sistema djente-cachete-boca, cu ta rekeri e co-diagnostico y co-tratamento di otro disiplinanan, of; * segun huicio di e Organo Ehecutivo AZV tratamento medico sin e cuido aki, lo tabatin resultado deficiente. 

Pa bishita un dentista bo no tin mester di un carta di referencia di bo dokter di cas. Pa e cuido dental cual AZV no ta cubri, bo por cera un seguro complementario cu un compania priva di seguro.

Asegurado hubenil
Un mayor cu ta desea pa su yui bin den remarca pa cuido dental pa medio di Organo Ehecutivo AZV mester cumpli cu algun requisito. Ta importante pa tuma nota cu e prome gastonan di control serca un dentista pa bo yui ta core pa bo propio cuenta (kiermen como mayor bo mes mester cubri e gasto di su prome control of prome tratamento serca su dentista).

Ta asina cu un asegurado di edad hoben (bou di 18 aña) tin algun derecho extra riba cuido dental via Organo Ehecutivo AZV compara cu un asegurado adulto. Pa bin na remarca pa esaki no solamente mester cubri e prome gastonan di su control (of tratamento dental) sino tambe mester ta sigur cu e dentadura di bo yui ta liber di caries i placa dental. E dentista cu ta haci e control di e dentadura di bo yui ta e persona cu por suministra un certificado di sanacion; e asina jama saneringskaart. 

Awendia mayoria dentista mes ta haci e servicio pa mayornan dor di avisa Organo Ehecutivo AZV cu tin un mucha cu ta ‘cla’ (ta cumpli na e condicionnan) i cu proximamente lo wordo cubri dor di Organo Ehecutivo AZV. E dentista mes ta manda Organo Ehecutivo AZV e informacion tocante e sanacion. E certificado di sanacion mes ta valido pa 1 aña. 

Pakete dental AZV pa asegurado hubenil:

  • Un biaha pa aña, saminacion periodico
  • Un biaha pa aña mantencion preventivo
  • Restauracion di djente i kiesnan (vulling), cu material plastico (pa e tratamento aki e mayor ta paga e dentista un aporte propio di Afls. 15,-)
  • Un biaha pa aña, aplicacion di fluor (ta cuminsa for di 6 aña)
  • Sealing di kies permanente (pa aña ta trata por lo menos 4 kies i den total ta paga e gasto di 8 kies)
  • Anestecia
  • Cuido paradontal, endodontico i gnatologico (mester di un aprobacion di AZV prome)
  • Cuido quirurgico dental di indole general (riba cierto indicacion)
  • Cuido di ortodoncia cu excepcion di bridge y corona. (mester di un aprobacion prome i ta pidi un aporte propio di Afls. 75,- pa cada luna di tratamento)
  • Tratamento di dolor: den tur caso, pa rancamento di djente of kies y e incision necesario di postema.
  • Cuido dental quirurgico di indole general; por ehempel extirpacion di carni di djente of limpiesa extenso di herida. (mester di un aprobacion di AZV prome)
  • Protesis. Aki ta trata di un plancha parcial of completo. E substitucion di e protesis ta ser paga si e protesis actual no ta sirbi mas i por lo menos cuatro anja a pasa despues di su suministro. (mester di un aprobacion prome di AZV)