Malesa contagioso


Dengue

Dengue ta un malesa transmiti pa e sangura "Aedes aegypti". Ora cu e sangura, infecta cu e virus di dengue, pica bo, bo por keda contagia cu un di e cuatro tiponan di dengue. Pa e motibo aki bo por keda contagia mas cu 1 biaha.

Tene cuenta cu

  • Uzo di aspirin ta contra indica.
  • Uzo di fruta citrico, manera apelsina, lamunchi y grapefruit. Motibo ta cu nan ta haci e sanger awa y esaki por tin como consecuencia sangramento interno.
  • Mester bebe hopi likido, preferible-mente awa.
  • Por bebe Calpol/Paracetamol pa dolor.
  • Mester tuma sosiego.

 

PA PREVENI DENGUE:

  • Controla bo camber riba sangura.
  • Uza repelente of insecticida.
  • Bisti carson y camisa manga largo, si bo tin hopi molester di sangura.
  • Drumi bou di un muskitero.
  • Controla rond di cas y den cas si tin recipiente cu awa aden. E sangura ta pone su webo, por ehempel, den hemchi, bleki, taira, florero etc. cu awa para.
  • Por yama "Gele Koorts en Muskiet Bestrijding", ora bo tin hopi molester di sangura, pa nan controla si tin e sangura cu ta transmiti Dengue.

 

TUMA CONTACTO CU BO DOKTER DI CAS

  • Si bo tin 2 of mas di e siguiente
  • sintomanan:
  • Keintura di mas cu 38,5°C
  • Dolor patras di bo wowo.
  • Erupcion (Uitslag) riba bo curpa.
  • Diarea di mas cu 3 bes pa dia.
  • Sangramento di carni di djente.
  • Dolor di weso of joint.
  • Dolor di curpa.
  • Malestar general.

 

TUMA CONTACTO CU BO DOKTER DI CAS INMEDIATAMENTE

  • Si bo tin pleki blauw (hematoma).
  • Si bo tin sanger den bo saca.
  • Si bo tin sanger den bo sushi.
  • Si bo tin sanger den bo orina.
  • Si bo tin sangramento di nanishi.

 

No tin vacuna

contra Dengue!


    Tuberculosis

    Tuberculosis ta un malesa causa pa e bacteria "Mycobacterium Tuberculo-sis". E forma di transmision ta via aire. Esey kier men cu ora un persona cu ta contagia nister of tosa riba un otro persona, e bacteria, cu ta circula den aire, lo drenta via boca of nanishi bay na e pulmon. E por multiplica su mes den e pulmon y e por haci e persona ey malo.

    PA PREVENI TUBERCULOSIS:

    Na e luganan unda Tuberculosis ta endemico, e babynan recien naci ta haya un vacuna, yama BCG, cu ta proteha nan contra Tuberculosis.

    Aki na Aruba vacunacion no ta necesario, ya cu e casonan di Tuberculosis ta caso importa y na Aruba Tuberculosis no ta endemico.

    Tin cura pa Tuberculosis, pero mester tene na cuenta cu e tratamento ta pa un temporada largo (por ta te cu 1 aña).

    TUMA CONTACTO CU BO DOKTER DI CAS

    Si bo tin 2 of mas di e siguiente sintomanan:

    • Sodamento den anochi.
    • Cansancio constante.
    • Keintura di mas cu 38,5°C.
    • Curpa kibra.
    • Perdemento di peso.

     

    TUMA CONTACTO CU BO DOKTER DI CAS INMEDIATAMENTE

    • Si bo ta haya dolor den pecho ora bo tosa.
    • Si bo tin tosamento pa 3 siman of mas (tin biaha cu presencia di sanger den e excrecion for di pulmon).

    H.I.V. of AIDS

    HIV (Human Immunodeficiency Virus = Virus di Inmunodeficiencia Humano) ta e virus causante di AIDS/SIDA (Acquired Immune Deficiency Syndrome = Sindrom di Inmuno Deficiencia Adkiri). Ora un persona ta HIV positivo, e ta mustra saludabel, pero e por infecta otro persona y e por biba mas o menos 10 aña sin sintoma.

    Ora un persona su curpa no por bringa infeccion mas, pasobra e sistema di defensa a keda destrui door di e HIV/VIH, nos ta papia di AIDS/SIDA.

    E forma di transmision ta:

    • Via sanger of producto di sanger infecta (transfusion di sanger).
    • Via contacto sexual.
    • Door di comparti hangua conta-mina.
    • Via di mama pa yiu durante parto.

     

    HIV/AIDS no ta pega via contacto casual. No tin cura pa HIV/AIDS, pero si tin remedi cu ta yuda tene e cantidad di e virus abou den sanger, evitando asina cu e persona por desaroya AIDS/SIDA.

    TUMA CONTACTO CU B0 DOKTER DI CAS

    Si bo tin 2 of mas di e siguiente sintomanan:

    • Sodamento den anochi.
    • Keintura frecuente.
    • Klier hincha.
    • Diarea constante sin motibo conoci.
    • Mancha blanco of blaar den boca.
    • Perdemento notabel di hopi peso den poco tempo.

     

    PA PREVENI HIV/AIDS SIDA:

    • Abstene bo di relacion sexual.
    • Tene relacion cu un solo partner, cu no ta infecta.
    • Uza condon, si bo tin mas partner.

    Cambio na e organo sexual

    Malesa Transmiti Sexualmente (M.T.S.) ta un grupo di malesa cu un persona por transmiti pa un otro persona, mayoria di biaha door di contacto sexual. Bou di contacto sexual nos kier men tur contacto intimo cu tin di haber cu e areanan sexual di curpa humano, manera penis, vagina, boca y ano.

    Un persona por keda infecta cu un M.T.S. diferente biaha y por ta infecta cu mas di un M.T.S. pareu. Por haya complicacion serio ora tin un M.T.S. y esaki no haya tratamento di dokter na tempo.

    TUMA CONTACTO CU BO DOKTER DI CAS

    Si bo tin 2 of mas di e siguiente sintomanan:

    • Segregacion colo geel berde for di e penis of e vagina hunto cu kimamento y dolor ora di orina.
    • Herida riba e penis, e vagina y e ano cu no por cura di mes.
    • Aglomeracion di blaar chikito, hopi doloroso mes, na e area genital.
    • Segregacion colo blanco/colo di slijm.
    • Grawatashi y e area di vagina irita.
    • Fret na e area genital.

     

    PA PREVENI CONTAGIO:

    • Abstene bo di relacion sexual durante e temporada cu bo tin e sintomanan.
    • Si bo no por abstene, ta recomenda uzo di condon.