Ken tin Derecho

Haya sa si bo tin derecho riba e pakete di AZV

Si bo ta biba na Aruba y bo ta inscribi den e registro di poblacion (Censo) bo tin derecho riba AZV. Asina facil e ta, bon mira. Cu e derecho ta bin algun deber tambe. Aunke cu AZV ta un seguro obligatorio, bo tin cu inscribi personalmente na AZV pa haya un prueba di seguro, scohe un dokter di cas, botica y dentista. Si bo no ta inscribi na AZV e obligacion di paga prima ta keda.


    Inscripcion

    Pa inscribi na AZV bo mester trece un identificacion valido, manera un paspoort of cedula valido, y e prueba di inscripcion di Censo. E asina yama ‘papel di 5 florin’.

    Bo por haci uzo di AZV for di e momento cu bo ta inscribi na oficina di AZV. Na cada bishita cerca un dunado di cuido bo mester presenta bo prueba di inscripcion di AZV, e asina yama ZorgPas.

    Den caso cu bo ta naci na Aruba y di nacionalidad Hulandes, e documentonan menciona aki riba ta conta pa bo. Ora di renoba bo ZorgPas, mester trece e ZorgPas 'bieu' y un identificacion valido.


    Personanan cu mester trece documentacion adicional

    Si bo ta naci na Aruba y tin nacionalidad Hulandes, e documentonan menciona akiriba ta conta pa bo. Pues un identificacion valido y e prueba di inscripcion di Censo, pero den varios otro caso tin otro exigencianan cu nos lo splica aki bou:

     

    Den caso cu bo ta na Aruba a base di un permiso bo mester trece tambe:

    • un documento pa demonstra cu bo tin estadia legal na Aruba por ehempel un permiso di estadia valido.

    Den caso cu bo ta na Aruba a base di un contract cu Pais Aruba:

    • Bo mester trece tambe un Landsbesluit of un Verklaring of un Arbeidscontract (por ehempel un maestro of un huez).

    Den caso cu bo ta un persona di nacionalidad Hulandes pero no a naci na Aruba y di cual un di bo mayornan si ta naci na Aruba cu nacionalidad Hulandes:

    • Bo mester presenta tambe bo acta di nacemento y identificacion valido di bo mayornan.

    Den caso cu bo tin nacionalidad Hulandes y bo tabata biba na Aruba prome cu 1 di januari 1986:

    • Bo mester trece tambe bo Verklaring sedert ingeschreven (awg. 10,=) di Censo.

    Den caso cu bo a naturalisa na Aruba:

    • Bo mester trece tambe e Koninklijk Besluit di naturalisacion.

    Pa e inscripcion di menornan di edad bo mester trece, banda di e documentonan ya menciona y den caso cu ta aplicabel, tambe:

    • un prueba di identificacion valido di e mayor of voogd cu ta bin inscribi e mucha;

    • e prueba di identificacion di e tata den caso cu ta trata di un mama soltero y reconocemento di e tata cu tin nacionalidad Hulandes;

    • e prueba di voogdijschap den caso cu bo ta voogd di e mucha;

    • buki di casamento of acta di nacemento of e carchi di nacemento di hospital (carchi roos of blauw).


    Ora AZV no ta aplicabel

    Nos a splica ken tin derecho riba AZV y con bo por bin na remarca pa haci uzo di e derecho aki, pero tin un paar di exepcion tambe. Personanan cu no ta cay obligatoriamente bou di AZV. AZV no ta applicabel pa bo si:

    • abo y e miembronan di bo famia, siendo residente, ta exento di e participacion na e seguronan social, den virtud di acuerdonan internacional di cualnan Aruba ta forma parti;

    • abo y e miembronan di bo famia, siendo residente, tin un relacion di trabou, na otro lugar cu un persona huridico, estableci na otro lugar den Reino y tin un entrada di esey;

    • pa ley, bo a ser priva di bo libertad.

    Por sosode cu bo ta registra den e Registro di Poblacion (Censo), pero bo tin un seguro medico caba den exterior. Den e caso ey bo por bini na consideracion pa un exencion di e AZV y consecuentemente di e cuota obligatorio si bo por demostra cu:

    • bo tin un seguro medico den exterior, cu un cobertura similar na esun di AZV y e seguro medico aki tin su base den un regulacion legal.