Cuido di dentista


Cuido dental pa medio di AZV
Pa e cuido dental ta distingui dos grupo di asegurado:

  • tur asegurado y;
  • asegurado hubenil.

 

Tur asegurado
E derecho riba cuido dental pa tur asegurado
ta limita y ta encera:

  • tratamento di dolor: den tur caso, pa rancamento di djente of kies y e incsion necesario di postema. Pa e tratamento completo, ta compensa no mas cu 2 potret intra-oral;
  • cuido dental quirurgico di indole general: extirpacion di carni di djente, extirpacion y coreccion quirurgico di e maxilar, tratamento di fractura, limpiesa extenso di herida, ceramento di e orificio surgí entre e cavidad bocal y e cavidad nasal, despues di extraccion y extirpacion quirurgico di djente of kies implanta of ranca (incluyendo  verstandskies), restonan di rais dental of cuerpo aheno. Pa esakinan bo mester e aprobacion di e Organo Ehecutivo AZV prome.
  • protesis: aki ta trata di un plancha parcial of completo. E substitucion di e protesis parcial of completo ta ser paga si e protesis actual no ta sirbi mas y por lo menos cuatro aña a pasa despues di su suministro.

Pa protesis bo mester haya aprobacion prome di Organo Ehecutivo AZV y
tambe ta ser rekeri un aporta propio pa protesis:

  • un protesis completo :

    Afl. 200,- (maximal)

  • un protesis parcial :

    Afl. 100,- (maximal)

Cuido dental specialisa.
Como asegurado bo tin derecho riba e cuido aki si keda comproba cu:

  • e cuido special aki ta necesario relaciona cu e tratamento di trastorno severo di desaroyo of crecemento, of deformacion grave adkiri di e sistema djente-cachete-boca, cu ta rekeri e co-diagnostico y co-tratamento di otro disiplinanan, of;
  • segun huicio di e Organo Ehecutivo AZV tratamento medico sin e cuido aki, lo tabatin resultado deficiente.

Pa bishita un dentista bo no tin mester di un carta di referencia di bo dokter di
cas. Pa e cuido dental cual AZV no ta cubri, bo por cera un seguro complementario cu un compania priva di seguro.

Asegurado hubenil
Un mayor cu ta desea pa su yiu bin den remarca pa cuido dental pa medio di
Organo Ehecutivo AZV mester cumpli cu algun rekisito. Ta importante pa tuma nota cu e prome gastonan di control cerca un dentista pa bo yiu ta core pa bo propio cuenta (kiermen como mayor bo mes mester cubri e gasto di su prome control of prome tratamento cerca su dentista).

Ta asina cu un asegurado di edad hoben (bou di 18 aña) tin algun derecho
extra riba cuido dental via Organo Ehecutivo AZV compara cu un asegurado
adulto. Pa bin na remarca pa esaki no solamente mester cubri e prome
gastonan di su control (of tratamento dental) sino tambe mester ta sigur cu e
dentadura di bo yiu ta liber di caries y placa dental. E dentista cu ta haci e
control di e dentadura di bo yui ta e persona cu por suministra un certificado
di sanacion; e asina yama saneringskaart.

Awendia mayoria dentista mes ta haci e servicio pa mayornan dor di avisa
Organo Ehecutivo AZV cu tin un mucha cu ta ‘cla’ (ta cumpli na e condicionnan) y cu proximamente lo wordo cubri dor di Organo Ehecutivo AZV. E dentista mes ta manda Organo Ehecutivo AZV e informacion tocante e sanacion. E certificado di sanacion mes ta valido pa 1 aña.

Pakete dental AZV pa asegurado hubenil:

  • Un biaha pa aña, saminacion periodico
  • Un biaha pa aña mantencion preventivo
  • Restauracion di djente y kiesnan (vulling), cu material plastico (pa e tratamento aki e mayor ta paga e dentista un aporta propio di Afls. 15,-)
  • Un biaha pa aña, aplicacion di fluor (ta cuminsa for di 6 aña)
  • Sealing di kies permanente (pa aña ta trata por lo menos 4 kies y den total ta paga e gasto di 8 kies)
  • Anestesia
  • Cuido paradontal, endodontico y gnatologico (mester di un aprobacion di AZV prome)
  • Cuido quirurgico dental di indole general (riba cierto indicacion)
  • Cuido di ortodoncia cu excepcion di bridge y corona. (mester di un aprobacion prome y ta pidi un aporta propio di Afls. 75,- pa cada luna di tratamento)
  • Tratamento di dolor: den tur caso, pa rancamento di djente of kies y e incision necesario di postema.
  • Cuido dental quirurgico di indole general; por ehempel extirpacion di carni di djente of limpiesa extenso di herida. (mester di un aprobacion di AZV prome)
  • Protesis. Aki ta trata di un plancha parcial of completo. E substitucion di e protesis ta ser paga si e protesis actual no ta sirbi mas y por lo menos cuatro aña a pasa despues di su suministro. (mester di un aprobacion prome di AZV)