General › Inscripcion na AZV

Desde 2001 Aruba tin un seguro medico general pa tur habitante: e AZV (Algemene Ziektekosten Verzekering).

Loke tur ta wordo cubri door di AZV ta describi den un ley, e ley di AZV. Pa haci uso di AZV bo mester cumpli cu algun rekisito pa inscripcion y haya bo ZorgPas. E ZorgPas ta bo prueba di inscripcion na AZV.

 

A base di articulo 3 di e Ley di Ordenansa Estatal AZV bo tin derecho riba AZV ora cu:

 

1. bo ta inscribi den e administracion basico di Registro Civil y Censo y;

2. bo tin Aruba como residencia principal, ta cumpli cu e Ley di Ordenansa Estatal di Admision y Expulsion (LTU).

 

Ora bo ta cumpli cu articulo 3 di e Ley di AZV bo no solamente tin e derecho riba AZV pero tambe bo tin e obligacion pa paga e prima AZV. E prima AZV ta wordo ehecuta door di Servicio di Impuesto di Aruba.

 

Bo por haci uso di AZV for di e momento cu bo inscribi na e oficina di Organo Ehecutivo AZV. Na cada bishita cerca un dunado di cuido bo mester presenta bo prueba di inscripcion di AZV, e asina yama ZorgPas.

 

Pa bo inscribi bo mester pasa personalmente cerca nos. E ley di Ordenansa Estatal AZV ta prescribi cu bo mester tin un dokter di cas, botica y dentista fiho.

 

Esaki bo ta yena pa cada miembro di famia riba e formulario di inscripcion.

Despues cu e empleado di AZV caba di yena tur dato, e lo saca un potret di bo persona pa bo ZorgPas. Tambe bo ta ricibi un formulario di polisa. E gastonan tdi inscripcion ta 10 florin pa persona.

 

Cua documentonan bo mester trece pa inscripcion nobo?

Den tur caso bo mester trece:

- un identificacion valido manera un paspoort valido of un carchi di identificacion valido otorga dentro di Reino Hulandes, por ehempel e cedula.

- un extracto di Censo no mas bieu cu 30 dia.

Den caso cu bo ta naci na Aruba y di nacionalidad Hulandes, e documentonan menciona aki riba ta conta pa bo.

 

Den caso cu bo ta na Aruba a base di un permiso bo mester trece tambe:

- un documento pa demonstra cu bo tin estadia legal na Aruba por ehempel un permiso di estadia valido.

 

Den caso cu bo ta na Aruba a base di un contract cu Pais Aruba:

Bo mester trece tambe un Landsbesluit of un Verklaring of un Arbeidscontract (por ehempel un maestro of un huez).

 

Den caso cu bo ta un persona di nacionalidad Hulandes pero no a naci na Aruba y di cual un di bo mayornan si ta naci na Aruba cu nacionalidad Hulandes:

Bo mester presenta tambe bo acta di nacemento y identificacion valido di bo mayornan.

 

Den caso cu bo tin nacionalidad Hulandes y bo tabata biba na Aruba prome cu 1 di januari 1986: Bo mester trece tambe bo Verklaring sedert ingeschreven (awg. 10,=) di Censo.

 

Den caso cu bo a naturalisa na Aruba:

Bo mester trece tambe e Koninklijk Besluit di naturalisacion.

 

Pa e inscripcion di menornan di edad bo mester trece, banda di e documentonan ya menciona y den caso cu ta aplicabel, tambe:

- un prueba di identificaccion valido di e mayor of voogd cu ta bin inscribi e mucha;

- e prueba di identificacion di e tata den caso cu ta trata di un mama soltero y reconocemento di e tata cu tin nacionalidad Hulandes;

- e prueba di voogdijschap den caso cu bo ta voogd di e mucha;

- buki di casamento of acta di nacemento of e carchi di nacemento di hospital (carchi roos of blauw).

Obligacion pa entrega bo ZorgPas.

Na momento cu bo bay biba den exterior bo mester percura pa entrega bo ZorgPas bek na AZV ya cu AZV ta solamente valido na Aruba.

 

Ora bo presenta cerca AZV pa entrega bo ZorgPas bo mester trece:

- bo uitschrijvingsbewijs di Censo;

- bo ticket di biahe;

- bo ZorgPas.

 

A base di e documentonan aki, AZV ta sera bo polisa segun e fecha menciona riba bo ticket di biahe.

Tambe lo bo ricibi un carta di AZV cu ta declara cu bo tabata sigura contra gastonan medico na Aruba. E carta aki ta wordo pidi den algun pais pa bo comproba cu bo tabata sigura.

Dokter na warda
Pabow di brug Telefon: 527 4580HuisartsenpostOranjestad583-4200 Pariba di brug Telefon: 524 8833 Centro MedicoSan Nicolas584-4000
Botica na warda
Pabow di brug Pariba di brug
Back to top