Noticia › Relato financiero 2016 entrega na tempo na e ministernan

Pa e di shete biaha consecutivo AZV a entrega prome cu 1 di april e relato financiero na e minister di Salud Publico y e minister di Finanzas.

E relato anual 2016 ta contene un declaracion di aprobacion di e accountant externo, tanto pa loke ta e exactitud di e documento como tambe e legitimidad. 

 

Gastonan di cuido mas halto cu a spera

Compara cu 2015 e gastonan total a subi cu 5,2%. Esey ta un crecemento mas halto di loke a spera. Esaki ta wordo ocaciona primordialmente door di un calculacion demasiado abou di e obligacionnan cu mester a cumpli cu ne pa loke ta cuido medico den exterior. Entre tanto a tuma pasonan pa evita e riesgo aki den e siguiente añanan.

A pesar di e crecemento fuerte y inespera den 2016, e crecemento promedio di e gastonan den e ultimo cinco añanan ta keda modera: e periodo 2012-2016 ta conoce un crecemento anual promedio di rond di 2,7%. Den e mesun periodo e inflacion anual tabata un promedio di -0,5% y e crecemento anual promedio di e poblacion tabata 1,6%.

 

Contribucion di Pais Aruba ta keda baha

E parti di e contribucion di Pais Aruba den e financiamento di AZV den aña 2016 un biaha mas a baha. Den e periodo desde di introduccion di AZV e parti di e contribucion di Pais Aruba den e financiamento a baha alrededor di 60% den 2001 pa 13% den 2016.

 

E disminucion (bahada) di e parti di e contribucion di Pais Aruba a bay man den man cu e aumento di e parti di entradanan di prima y di e impuesto ‘bestemmingsheffing AZV’ (BAZV).

Pa e siguiente añanan te 2020 AZV ta tene cuenta cu un aumento promedio di alrededor  4%. E aumento den e crecemento anual aki compara cu e periodonan anterior tin su causa den e desaroyo di iniciativanan nobo manera e renobacion y construccion di hospital, e introduccion di cardiologia intervencionista, e ampliacion di capacidad di operacion den ImSan y e introduccion di radioterapia den ImSan.

Ki efecto e operacion gradual di e refineria lo tin riba e entradanan di e prima y e BAZV no ta sigur ainda. P’esey mes e efectonan aki por lo pronto no a wordo calcula den e proyeccionnan. 

Den caso cu e entrada di prima y BAZV keda igual, e expectativa ta cu e parti di e contribucion di Pais Aruba lo bolbe subi den e siguiente añanan.

 

Dokter na warda
Pabow di brug Telefon: 527 4580HuisartsenpostOranjestad583-4200 Pariba di brug Telefon: 524 8833 Centro MedicoSan Nicolas584-4000
Botica na warda
Pabow di brug Pariba di brug
Back to top